ސްކޮލަޝިޕާއި، ލޯނުގައި ކިޔަވަން ގޮސް ތިބި ބައެއް ދަރިވަރުންނަށް ފައިސާ ނުފޮނުވާތީ ކުރިއަށް އޮތް ސެމިސްޓާގައި ކިޔެވުމުގެ ފުރުސަތު ގެއްލިދާނެ ކަމުގެ ބިރު ބޮޑުވެފައިވާ ކަމަށް ބައެއް ބެލެނިވެރިންނާއި ދަރިވަރުން ބުނެފި އެވެ.
ސަރުކާރުގެ ހަރަދުގައި މި އަހަރު ކުރީކޮޅު މެލޭޝިއާ އަށް ކިޔަވަން ދިޔަ ދަރިވަރެއްގެ ބެލެނިވެރިޔަކު އަދަދު ނޫހަށް ބުނީ އޭނާގެ ދަރިފުޅު ކިޔަވަމުންދާ ޔުނިވާސިޓީ އަށް ސަރުކާރުން ފައިސާ ދެއްކުން ލަސްވަމުންދާ ކަމަށެވެ.
އެ މައްސަލައިގައި ހަޔަ އެޑިއުކޭޝަން މިނިސްޓްރީގައި ސުވާލުކުރާތާ އެތައް ދުވަހެއް ވެއްޖެ ކަމަށާއި ނަމަވެސް އެކަށީގެންވާ ޖަވާބެއް ލިބިފައި ނެތް ކަމަށް އޭނާ ބުންޏެވެ.
"ކުރީ ސެމިސްޓާގައި ވެސް ފައިސާ ފޮނުވުން ލަސްވި. މިފަހަރު ހަޔާ އެޑިއުކޭޝަން މިނިސްޓްރީން ބުނަނީ ފިނޭންސް މިނިސްޓްރީ އަށް ފޮނުވައިފައޭ ވަނީ [ފައިސާ ފޮނުވަން]،" އެ ބެލެނިވެރިޔާ ބުންޏެވެެ.
މާލޭޝިއާގައި ކިޔަވަމުންދާ ދަރިވަރަކު ބުނީ ލާރި ދެއްކުން ލަސްވުމުގެ ސަބަބުން ޔުނިވާސިޓީގެ ސްޓްޑަންޓް ފޯޓަލްގެ އެކްސެސް އޭނާ އަށް ކަނޑާލާފައިވާ ކަމަށެވެ.
"މިފެށޭ ސެމިސްޓާ ގައި ބައިވެރި ނުވެވި ކޯސް ފަސްކުރަން ޖެހިދާނެ،" އެ ދަރިވަރު ފޮނުވި މެސެޖުގައިވެ އެވެ.
ސަރުކާރުގެ ސްކޮލާޝިޕްތަކުގައި އަދި ސްޓޫޑެންޓު ލޯނު ނަގައިގެން ބޭރުގައި ކިޔަވާ ދިވެހި ދަރިވަރުންނަށް ހަޔާ އެޑިއުކޭޝަން މިނިސްޓްރީން ފައިސާ ނުފޮނުވާތީ ކުއްޔާއި ޓިއުޝަން ފީ ނުދެއްކި ބައެއް ދަރިވަރުން މިދިޔަ ޖޫން މަހު ވެސް ހާލުގައި ޖެހުނެވެ.
އެ ފަހަރު ފައިސާ ފޮނުވުން ލަސްވީ ޑޮލަރުގެ ތާށިކަން ބޮޑުވެގެން ކަމަށް ހަޔާ އެޑިއުކޭޝަން މިނިސްޓްރީން ބުނެފައިވެ އެވެ.
މިފަހަރު ދަރިވަރުންނަށް ފައިސާ ފޮނުވުން ލަސްވެފައި ވާއިރު، ދައުލަތުގެ މާލީ ހާލަތު ވަނީ ކުރިއަށް ވުރެ ގޯސްވެފަ އެވެ.
