ސަރުކާރުގެ 100 ޕަސަންޓް ހިއްސާ އޮންނަ މޯލްޑިވްސް އޯޝަން ކަނެކްޓް މޯލްޑިވްސް (އޯސީއެމް) ސަބްމެރިން ކޭބަލް އިންޑިއާގެ ރިލަޔަންސް ޖިއޯ ކުންފުންޏަށް ވިއްކާލަން އުޅޭ ވާހަކަ އެ ކުންފުނިން ދޮގުކޮށްފި އެވެ.
އެ ކުންފުނިން ބުނީ ސޯޝަލް މީޑިއާގައި ކުންފުންޏާ ގުޅޭގޮތުން ދޮގު ވާހަކަތައް ފަތުރަމުން އަންނަނީ ސަރުކާރަށް އޮތް އިތުބާރު ގެއްލުވާލައި، ހަގީގަތް އާންމުންނަށް އޮޅުވާލަން ކަމަށެވެ.
"ސޯޝަލް މީޑިއާގައި ކުންފުންޏާ ގުޅޭގޮތުން ފަތުރަމުން ދަނީ ހަގީގަތާ ހިލާފު ދޮގު ވާހަކަތަކެއް. ކުންފުނިން މަސައްކަތް ކުރަމުންދާ ގޮތުގެ ހަގީގަތް ވަނީ އޮޅުވާލާފައި. މަޝްރޫއާ ގުޅޭ މައުލޫމާތު ސަރުކާރަށް ނޭގޭ ކަމަށް ބުނެ ވަނީ އޮޅުވާލާފައި،" އެ ކުންފުނިން ބުންޏެވެ.
މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އާއި އޯސީއެމްއިން ސަބްމެރިން ކޭބަލްގެ މަޝްރޫއު ކުރިއަށް ކުރިއަށް ގެންދާނެ ކަމަށް ވެސް އެ ކުންފުނިން ބުނެ އެވެ.
އޭގެ އިތުރުން ސަރުކާރުން އެ މަޝްރޫއަށް ދޭ އަހައްމިއްޔަތުކަން ފާހަގަކޮށް އޯސީއެމްއިން ބުނީ މަޝްރޫއު ހުއްޓާލުމުގެ އެއްވެސް ވިސްނުމެއް ނުގެންގުޅޭ ކަމަށެވެ.
އޯސީއެމް-އައިއޭއެކްސް ކޭބަލްގެ ނަމުން ނަން ދެވިފައިވާ ކޭބަލް ރާއްޖެއާ ގުޅާލުމުގެ މަސައްކަތް ކުރީ (އޯސީއެމް) އާއި އިންޑިއާގެ ޓެލެކޮމް ކުންފުނި ޖިއޯ ޓެލެކޮމް ގުޅިގެންނެވެ.
އިންޑިއާގެ ޖިއޯ ޓެލެކޮމް ކުންފުނިން ފްރާންސުގެ މާސޭ އާއި ސިންގަޕޫރާ ދެމެދު އަޅާ އެންމެ ޒަމާނީ ގިންތީގެ ސަބްމެރީން ކޭބަލް ވިއުގަ ހުޅުމާލެއަށް އެއްގަންކޮށް، ކޭބަލް ލޭންޑިން ސައިޓާ ގުޅާލީ މިދިޔަ އަހަރުގެ އޯގަސްޓް މަހު އެވެ.
ކުރީ ސަރުކާރުގެ ޑިޖިޓަލް ރާއްޖޭގެ ސިޔާސަތުގެ ދަށުން ދައުލަތުން އިންވެސްޓުކޮށްގެން އެޅި އެ ކޭބަލްއަކީ އިންޓަނެޓުގެ އަގު ހެޔޮ ކުރުމާއި ސްޕީޑު ހަލުވި ކުރުމާ އެކު، ޑޭޓާ އެކްސްޕޯޓު ފަދަ ވިޔަފާރިތަކަށް ހުޅުވާލުމުގެ މަގުސަދުގައި އެޅި ކޭބަލްއެކެވެ.
