މަސްތުވާތަކެތިން ސަލާމަތްވާން ފުރިހަމަ ކުރަންޖެހޭ ރިހެބިލިޓޭޝަން ޕްރޮގްރާމް ނިންމި 419 މީހުންގެ އަގުވަޒަންކޮށް އެމީހުންނަށް ހިތްވަރު ދިނުމަށް ޑްރަގް ކޯޓުން ހާއްސަ ހަފުލާއެއް ބާއްވައިފި އެވެ.
ސޮލައިޓް ރެސްޓޯރަންޓުގައި ބޭއްވި އެ ހަފުލާގައި ފަރުވާގެ ނިޒާމަށް އިތުރު 30 މިލިއަން ރުފިޔާ ހަމަޖައްސާނެ ކަމަށް ނެޝަނަލް ޑްރަގް އެޖެންސީގެ ބޯޑުގެ ޗެއާމަން ލުބްނާ ޒާހިރު ހުސެއިން ވިދާޅުވި އެވެ.
ރިހެބިލިޓޭޝަން ޕްރޮގްރާމުތައް ހިންގަން މިދިޔަ އަހަރުގެ ބަޖެޓުގައި ޖަހާފައި އޮތީ 103 މިލިއަން ރުފިޔާ އެވެ.
މަސްތުވާތަކެތީގެ ފަރުވާ ހޯދައި ނިންމާ މީހުންނަށް ވަޒީފާ ހޯދައިދިނުމަށް ސަރުކާރު ހިއްސާވާ ކުންފުނިތަކުން އެހީތެރިވެދިނުމަށް ވެސް އެ ހަފުލާގައި ވާހަކަ ދައްކަވަމުން ލުބްނާ އެދިވަޑައިގަތެވެ.
އެ ހަފުލާގައި ވާހަކަ ދައްކަވަމުން ޑްރަގް ކޯޓުގެ އިސް ގާޒީ އަބްދުއްސައްތާރު އަބްދުލްހަމީދު ވިދާޅުވީ މަސްތުވާތަކެތިން ސަލާމަތްވުމަކީ ފަސޭހަ ކަމެއް ނޫން ކަމަށެވެ. ނަމަވެސް ފަރުވާގެ ދުވަސްވަރު އެކަމުން އަރައިގަތުމަށް ގަދައަޅައި މަސައްކަތް ކުރަން ގާޒީ ނަސޭހަތްތެރިވި އެވެ.
ފަރުވާ ހޯދަން މިހާރު ހުރި ގޮންޖެހުންތައް ހައްލު ކުރަން ވެސް އޭނާ ގޮވައިލެއްވި އެވެ. އެގޮތުން ފަރުވާ ދިނުމަށް ބޭނުންވާ ވަސީލަތްތައް ނެތުމުގެ މައްސަލަ އާއި ފަރުވާ ނުފެށި ލަސްވާ މައްސަލަ ހައްލު ކުރަން އޭނާ އެދިވަޑައިގަތެވެ.
އެ ހަފުލާގައި، މަސްތުވާތަކެއްޗާ ދެކޮޅަށް މަސައްކަތް ކުރާ އަލީ އަދީބަށް ޑްރަގް ކޯޓުން ވަނީ ހަނދާނީ ފިލައެއް އަރުވައިފަ އެވެ. އޭނާއަކީ މަސްތުވާތަކެތިން މީހުން ސަލާމަތް ކުރަން އެކި ގޮތްގޮތުން މަސައްކަތް ކުރާ ކަމުގެ ތަޖުރިބާކާރެކެވެ.
މަސްތުވާތަކެތި ބޭނުންވާ 7000 އަށް ވުރެ ގިނަ މީހުން ރާއްޖޭގައި އުޅެ އެވެ. ޖަލު ހުކުމް ތަންފީޒު ކުރާ މީހުންގެ ތެރެއިން ވެސް 80 ޕަސެންޓަކީ މަސްތުވާތަކެއްޗާ ގުޅުން ހުރި އެކި ކުށްތަކުގައި ހުކުމް ތަންފީޒު ކުރާ މީހުންނެވެ.
