ލަންޑަން (އޮގަސްޓް 17) - އާސެނަލްގެ ކުޅުންތެރިން މި ވަގުތު ތިބި ރޫހަށް ބަލާއިރު، މި ސީޒަނުގައި އެ ޓީމަށް އިނގިރޭސި ޕްރިމިއާ ލީގުގެ ޗެމްޕިއަންކަން ހޯދިދާނެ ކަމުގެ އިހުސާސް ކުރެވޭ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
މިދިޔަ ސީޒަނުގައި އާސެނަލަށް އިނގިރޭސި ޕްރިމިއާ ލީގުގެ ތަށި ގެއްލުނީ ސީޒަނުގެ ފަހު ދުވަހުގަ އެވެ. ސިޓީން ވަނީ ޖެހިޖެހިގެން ހަތަރު ވަނަ ފަހަރަށް ލީގުގެ ޗެމްޕިއަންކަން ހޯދައިފަ އެެވެ.
ޕްރިމިއާ ލީގުގެ އާ ސީޒަނުގައި، އާސެނަލުން ކުޅޭ ފުރަތަމަ މެޗުގައި މިރޭ އަމިއްލަ ދަނޑުގައި ވުލްވްސްއާ ދެކޮޅަށް ނުކުންނާނެ އެވެ. އެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި، އާޓެޓާ ވަނީ، އާ ސީޒަނަށް އެ ޓީމުގެ ތައްޔާރީތަކާއި ޓީމުގެ ރޫހު ރަނގަޅުކަން ފާހަގަކޮށްފަ އެވެ.
"ކްލަބްގެ ހުރިހާ ކުޅުންތެރިންގެ ބައްދަލުވުމެއް އޮތްއިރު، އެންމެން އެއްވެފައި، އަހަރެން ގާތުގައި ބުނީ މި ފަހަރު މި ކަން (ލީގު ހޯދަން ޖެހޭ ކަަމަށް). އިތުރު ކުރިއެރުމާއި ކާމިޔާބު ބޭނުން ކަމަށް،" އާޓެޓާ ބުންޏެވެ.
"އިތުރަށް މަސައްކަތް ކުރެވޭނެ ކަމުގެ އުންމީދު އެބައޮތް، އެ ރޫހު އެބަ ފެނޭ، ކާމިޔާބު ހޯދޭނެ ކަމުގެ އިހުސާސް ވެސް ކުރެވޭ،"
އާޓެޓާ ބުނީ، ލީގު ހޯދާނަމަ ޔަގީނުން ވެސް ކުރަން ޖެހޭނެ ކަމަކީ، މިދިޔަ އަހަރު ހެދި ގޯސްތައް ތަކުރާރު ނުކުރުން ކަމަށެވެ. އަދި އެންމެ މުހިންމު ކަމަކީ އަމިއްލަ އަތުގައި އޮންނަ ކޮންޓްރޯލެއް ގެއްލުނަނުދީ އެހެން ބަޔަކަށް ބަރޯސާނުވުމަށް ކަމަށް އާޓެޓާ ފާހަގަކޮށްފައިވެ އެވެ.
ރެއާލް ސޮސިއެޑާޑްގެ މިޑްފީލްޑަރު، މިކޭލް މެރީނޯ ހޯދަން އާސެނަލުން މަސައްކަތް ކުރަމުން އަންނައިރު، އާޓެޓާ ވަނީ އެ ޑީލާ ބެހޭގޮތުން ވާހަކަ ދައްކަން ދެކޮޅު ހަދައިފަ އެވެ.
