މާލެ ސަރަހައްދަށް ދިމާވެފައިވާ ޕާކިން މައްސަލަ ހައްލުކުރުމަށް ހުޅުމާލޭގައި އަޅަން ނިންމާފައިވާ 15 ޕާކިން އިމާރާތުން 4،000 އުޅަނދަށް ޖާގަ ލިބޭނެ ކަމަށް ހައުސިން ޑިވެލޮޕްމަންޓު ކޯޕަރޭޝަންގެ މެނޭޖިން ޑިރެކްޓަރު އިބްރާހިމް ފަޒުލް ވިދާޅުވެއްޖެ އެވެ.
ވެރި ރަށުގެ ޕާކިން މައްސަލަ ހައްލުކުރުމަށް ކަމާބެހޭ ފަރާތްތަކުން މިއަދު ބޭއްވި ބައްދަލުވުމަކަށް ފަހު ނޫސްވެރިންނާ ވާހަކަ ދައްކަވަމުން ފަޒުލް ވިދާޅުވީ، މި އިމާރާތްތަކަކީ ހުޅުމާލެ ޑިވެލޮޕްމަންޓު ޕްލޭނުގައި ހިމެނިގެން ތަރައްގީކުރެވޭ އިމާރާތްތަކެއް ކަމަށެވެ.
"15 ވަރަކަށް ޕާކިން ބިލްޑިން [އެޅިގެންދާނެ]. މިއަދު އަޅުގަނޑަށް ދަންނަވާލަން ކެރޭނެ ގާތްގަނޑަކަށް 4،000 ޕާކިން ފުރުސަތު ކުރިއަށް އޮތް ތަނުގައި ފަހިވެގެންދާނެ،" އޭނާ ވިދާލުވި އެވެ.
ފަޒުލް ސިފަކުރެއްވީ މި 4،000 ޖާގައަކީ ރައްޔިތުން ގެންގުޅޭ ކާރު ނުވަތަ އުޅަނދު "ނިދަން" ނުވަތަ "ދާއިމަށް" އޮންނާނެ ތަންތަނުގެ ގޮތުގަ އެވެ. މި ޖާގަތައް ދޫކުރާނީ ވިޔަފާރި އުސޫލުންނެވެ.
"މި ޕްރޮޖެކްޓުވެސް ކުރިއަށް އޮތް ތިން މަސްދުވަހުގެ ތެރޭގައި އަޅުގަނޑުމެން އިއުލާނު ކޮށްލާނަން. އަދި މީގެ ޕްރީސޭލްގެ މަސައްކަތްތަކެއް އަޅުގަނޑުމެން އިރާދަކުރެއްވިއްޔާ މި އަހަރު ނިމުމުގެ ކުރިން އަޅުގަނޑުމެން ފަށްޓާނެކަމުގެ ޔަގީންކަން ތިބޭފުޅުންނަށް އަރުވަން،" ފަޒުލް ވިދާޅުވި އެވެ.
ޕާކިން އިމާރާތްތަކުގެ އިތުރުންވެސް ހުޅުމާލޭގެ ޕާކިން މައްސަލަތަކަށް ހައްލު ގެނައުމަށް އެ ކުންފުނިން ރާވާފައިވާ ކަންކަން ފަޒުލް މިއަދު ހިއްސާކުރެއްވި އެވެ. އެގޮތުން ކުލި ދައްކައިގެން ޕާކު ކުރެވޭނެ ވަކި ސަރަހައްދުތަކެއް އިއުލާނުކޮށް، މަގުމަތިންވެސް ވަގުތީ ގޮތުން ޕާކުކުރަން ހާއްސަ ސަރަހައްދުތަކެއް ކަނޑައަޅަން އެޗްޑީސީން ވަނީ ނިންމާފަ އެވެ.
ޕާކިން މައްސަލައާ ގުޅިގެން މިއަދު ބޭއްވި ބައްދަލުވުމުގައި އެޗްޑީސީގެ އިތުރުން ހޯމް މިނިސްޓްރީ، ފުލުހުން، މާލެ ސިޓީ ކައުންސިލް އަދި ޓްރާންސްޕޯޓް މިނިސްޓްރީންވެސް ބައިވެރިވި އެވެ.
މާލެ ސަރަހައްދުގައި ޕާކިން އިމާރާތްތަކެއް އެޅުމުގެ މަސައްކަތް ފެށުމަކީ ރައީސް ޑރ. މުހައްމަދު މުއިއްޒު، ވެރިކަމުގެ ފުރަތަމަ 100 ދުވަހުގެ ތެރޭގައި ކުރަން ނިންމެވި ކަމެކެވެ. ނަމަވެސް ވެރިކަމަށް ނުވަ މަސް ވާން ކައިރިވެފައިވާއިރު، އަދިވެސް އެ މަޝްރޫއު ފެށިފައެއް ނުވެ އެވެ.
ހުޅުމާލެއިން 4،000 ޕާކިން ޖާގަ ލިބޭނެ އިމާރާތްތަކަށް އަޅަން ނިންމާފައިވާއިރު، މާލޭ ސަރަހައްދުގައި މިހާރު ވެސް 118،000 އަށް ވުރެ ގިނަ ވެހިކަލް ރަޖިސްޓްރީކޮށްފައިވާ ކަމަށް ޓްރާންސްޕޯޓު މިނިސްޓްރީން ބުނެ އެވެ. އޭގެ ތެރޭގައި އެކެއްގެ ނަމުގައި ވެސް ގިނަ އުޅަނދުތަކެއް ރަޖިސްޓްރީކޮށްފައިވެ އެވެ.
