ބަންގްލަދޭޝްގެ ބޮޑުވަޒީރު ޝައިހް ހަސީނާއާ ދެކޮޅަށް މަރުގެ މައްސަލައެއް އެ ގައުމުގެ ވެރިރަށް ޑާކާގެ މެޖިސްޓްރޭޓް ކޯޓަކަށް އާންމު މީހަކު ވެއްދި މައްސަލަ ބަލައިގެންފި އެވެ.
ކޯޓާގެ މައްސަލައިގައި ބަންގްލަދޭޝްގެ ދަރިވަރުން ކުރި މުޒާހަރާގައި ޖުލައި 19، ގައި އަބޫ ސައީދު ކިޔާ މީހަކު ފުލުހުން ބަޑި ޖަހައި މަރާލި މައްސަަލަ ހުށަހެޅީ އާމިރު ހަމްޒާ ކިޔާ މީހެކެވެ.
"އަހަންނަކީ ހަސީނާ ކުރި ކަންތަކާ ދެކޮޅަށް މިފަދަ ގާނޫނީ މައްސަލައެއް ހުށަހަޅަން ކެރުނު ފުރަތަމަ އާންމު މީހާ. މައްސަލަ ނިމިގެންދާނެ ގޮތް ބަލަން މިހުރީ،" ހަމްޒާގެ ވަކީލު އަންވަރުލް އިސްލާމް ރޮއިޓާސްއާ ވާހަކަ ދައްކަމުން ބުންޏެވެ.
ހަމްޒާ ބުނީ އޭނާއަކީ ސައީދުއާ އާއިލީ ގޮތުން ވެސް ގުޅުމެއް އޮތް މީހެއް ނޫން ކަމަށެވެ. ނަމަވެސް އެ މައްސަަ ހުށަހެޅީ އޭނާގެ އާއިލާގައި މައްސަލަ ހުށަހަޅައިގެން ކުރިއަށް ދިޔުމުގެ ތަނަވަސްކަން ނެތުމުން ކަމަށް އޭނާ ބުންޏެވެ.
މުޒާހަރާތަކުގައި 300 އަށްވުރެ ގިނަ މީހުން މަރުވި އެވެ. އޭގެ ތެރެއިން ގިނަ މީހުން މަރުވީ ފުލުހުންނާއި އަސްކަރިއްޔާއިން ހަމަލާދީގެންނެވެ.
އެ މުޒާހަރާތާއް ވަރުގަދަވުމާ ގުޅިގެން ބަންގްލަދޭޝްގެ ބޮޑުވަޒީރުކަމުން ހަސީނާ ވަނީ އިސްތިއުފާ ދެއްވުމަށްފަހު އޯގަސްޓް 5، ގައި ފިއްލަވައިގެން އިންޑިއަށް ވަޑައިގެންފަ އެވެ.
ބަންގްލަދޭޝްގައި މިވަގުތު އޮތީ ވަގުތީ ސަރުކާރެކެވެ. އެ ސަރުކާރު ހިންގުމާ ހަވާލުވެވަޑައިގެން ހުންނެވީ ނޯބެލް ސުލްހައިގެ އިނާމު ލިބުނު މުހައްމަދު ޔޫނުސް އެވެ.
