ރާއްޖޭގެ އެކި ރަށްރަށުގައި ހިިނގާ ތަރައްގީގެ މަޝްރޫއުތަކާ ގުޅޭގޮތުން އިންފްރާސްޓްރަކްޗާ މިނިސްޓަރު، އަބްދުﷲ މުއްތަލިބުއާ ސުވާލު ކުރުމަށް މިއަދު މަޖިލީހުގައި ލިބުނު ވަގުތުގެ ބޭނުން ނުކޮށް ޕީއެންސީގެ މެންބަރުން ދޫކޮށްލައްވައިފި އެވެ.
މުއްތަލިބު މަޖިލީހަށް ވަޑައިގެންނެވީ ކެންދޫ ދާއިރާގެ އެމްޑީޕީ މެންބަރު، މައުރޫފް ޒާކިރު ކުރެއްވި ސުވާލަކަށް ޖަވާބު ދެއްވުމަށެވެ. މައުރޫފްގެ ސުވާލަށް ޖަވާބު ދެއްވުމަށް ފަހު މިނިސްޓަރާ ސުވާލު ކުރަން 30 މިނެޓުގެ ވަގުތެއް ރިޔާސަތުން ދެއްވި އެވެ.
ނަމަވެސް އެ ވަގުތުގައި މިނިސްޓަރާ ސުވާލު ކުރެއްވީ ޕީއެންސީގެ އެންމެ މެންބަރަކު ފިޔަވައި ހުސް އިދިކޮޅު އެމްޑީޕީގެ މެންބަރުންނާއި މިނިވަން މެންބަރެކެވެ. ޕީއެންސީގެ ފަރާތުން މުއްތަލިބުއާ ސުވާލު ކުރެއްވީ އިނގުރައިދޫ ދާއިރާގެ މެންބަރު އިބްރާހިމް ފަލާހު އެކަންޏެވެ.
އޭނާ ވެސް ސުވާލު ކުރެއްވީ ތަރައްގީގެ މަޝްރޫއުއަކާ ގުޅޭގޮތަކުން ނޫނެވެ. ފަލާހު ސުވާލު ކުރެއްވީ މަޝްރޫއުތައް ހިންގުމަށް ބަޖެޓުގައި ހިމެނި ފައިސާގެ އަދަދާއި އެމްޑީޕީ އެ މަޝްރޫއުތަކާ ގުޅޭގޮތުން އެމްޑީޕީ މެންބަރުން މިނިސްޓަރާ ބައްދަލު ކުރެއްވި ތޯ އެވެ.
"އެމްޑީޕީން ފަށާފައި މިހުރި މަޝްރޫއުތަކުގައި އެ މަޝްރޫއުތައް ހިންގައި ނިންމޭ ވަރަށް ބަޖެޓުގައި އެ ބޭފުޅުން ފައިސާ ހިމަނުއްވާފައި އަދި އެ ފައިސާ އެބަހުރިތޯ؟ ދެވަނަ ސުވާލަކީ އެ ބޭފުޅުން ރައްޔިތުން އެ ދާއިރާތައް އެ ބޭފުޅުންގެ ދާއިރާތަކުގައި ނުކުރެވި ހުރި މަސައްކަތްތައް، އެ މަސައްކަތްތަކުގެ ތަފުސީލު ހޯދަން ވަޒީރުގެ އަރިހަށް ދިޔުމަށްޓަކައި ވަޒީރަށް ސިޓީގެ ޒަރިއްޔާއިންވިޔަސް އަދި އެ ނޫން ވެސް ޒަރިއްޔާއަކުން ވެސް މަސައްކަތް ކޮށްފައިވޭތޯ ވަޒީރާ ބައްދަލު ކޮށްގެން އެ ތަފުސީލުތައް ހޯދަން،" ފަލާހު ސުވާލު ކުރެއްވި އެވެ.
ތަރައްގީގެ އެއްވެސް މަޝްރޫއުއަކާ ގުޅޭގޮތުން މިނިސްޓަރާ ޕީއެންސީ މެންބަރުން ސުވާލު ކުރައްވާފައި ނުވާއިރު، މިދިޔަ ހަފުތާގައި އިދިކޮޅު އެމްޑީޕީގެ ގައުމީ މަޖިލިސް ކުރިއަށްދިޔަ ވަގުތު އެ ޕާޓީގެ ޗެއާ ޕާސަން، ފައްޔާޒު އިސްމާއިލްއަށް ޕީއެންސީގެ މަޖިލިސް މެންބަރަކު ފޮނުވި ކަމަށް ވިދާޅުވެ މެސެޖެއް ހިއްސާ ކުރެއްވި އެވެ.
ފައްޔާޒު އެރޭ ވިދާޅުވީ އެ މެސެޖުގައި އޮތީ "ރަށްރަށުގައި ފަށައިގެން ކުރިއަށްގެންދާ ޕްރޮޖެކްޓުތައް ސަރުކާރުގެ މާލީ ހާލަތު މިވަގުތު ދަށްވަމުން ދާތީ އެ ޕްރޮޖެކްޓުތަކުގެ ވާހަކަ ނުދެއްކުމަށް ރައީސް މުއިއްޒު ވަނީ އަޅުގަނޑުމެންނަށް އަންގަވާފައި،" ކަމަށެވެ.
އެ މެސެޖު ފައްޔާޒު ހިއްސާ ކުރެއްވި ރޭ، ޕީއެންސީގެ ބައެއް މަޖިލިސް މެންބަރުން ލައްވައި ރައީސްގެ އެއްވެސް މެސެޖެއް ލީކު ނުކުރާ ކަމަށް ހުވާ ވެސް ކުރުވި އެވެ. އެކަން ޕީއެންސީގެ މަޖިލިސް މެންބަރުން "އަދަދު" އަށް ކަށަވަރު ކޮށްދެއްވި އެވެ.
