ކުދިބޮޑު ގިނަބަޔަކު އިންތިޒާރުކުރަމުންދާ ދިވެހި ފިލްމު "ރޮބޯމޭން – ދަ މޫވީ" ގެ ޕޯސްޓަރު ރޭ ދައްކާލައިފި އެވެ.
ޕޯސްޓަރު ދައްކާލުމަށް ވައިޓް ރޫފްޓޮޕްގައި ބޭއްވި ހަފްލާއެއްގައި ދިވެހި ފިލްމީ ދާއިރާގެ މަގްބޫލު ގިނަ ތަރިންތަކުގެ އިތުރުން ފިލްމުގައި ރޮބޯމޭންއާއެކު އެކްޓްކުރުމުގެ ފުރުސަތު ލިބުނު ހުނަރުވެރި ދެ ކުޑަކުދިން ބައިވެރިވި އެވެ.
"މި ފިލްމު އޮލިމްޕަސް ސްކްރީނުގައި ރިލީޒްކުރުމަށް ހަމަޖެހިފައިވަނީ ސެޕްޓެމްބަރު، 26 ގައި. އެއަށްފަހު މީޑިއާނެޓުގެ ވީޑިއޯކްލަބް މެދުވެރިކޮށް ބެލުންތެރިންނަށް ޓީވީ އަދި ފޯނު މެދުވެރިކޮށް މި އަހަރު ފަހުކޮޅު ބަލާލެވޭނެ," މީޑިއާނެޓުން ބުންޏެވެ.
މި ފިލްމަކީ އެމް އޮރިޖިނަލްސް ބެނާގެ ދަށުން އުފައްދާ މީޑިއާނެޓު ވީޑިއޯކްލަބް އަދި އޯކޭޒް އިންކްގެ ފަރާތުން ތައްޔާރުކުރާ ފިލްމެކެވެ.
ދިވެހިންގެ މެދުގައި މަގްބޫލު ހުނަރުވެރި ހުށަހެޅުންތެރިޔާ ރޮބޯމޭން ފެންނަ، ހިޔާލީ ވާހަކައެއްގެ މައްޗަށް ތައްޔާރުކޮށްފައިވާ އެ ފިލްމުގެ ޓްރެއިލާ ރޮބޯމޭންގެ އިންސްޓަގްރާމް ޕޭޖުގައި ވަނީ އާންމުކޮށްފަ އެވެ.
100 އަށްވުރެ ގިނަ ކުދިންނާއެކު ކުރިއަށް ދިޔަ އޮޑިޝަންތައް ގިރާކުރުމަށްފަހު ރޮބޯމޭން އާއެކު ފިލްމުގައި އިސްރޯލެއް އަދާކުރުމުގެ ފުރުސަތު ލިބިުނީ އަމީލިއާ ނަސްރުﷲ ޝަކީބު އަދި މިޝާ އިސްމާއިލް ނިޔާޒް އަށެވެ. އެ ދެކުދިންގެ އިތުރުންވެސް އެކި ރޯލުތަކުން ގިނަ ކުދިންތަކެއް މި ފިލްމުން ފެނިގެންދެ އެވެ.
އެ ފިލްމުގައި ކެމިއޯ ރޯލުތަކުން ފެންނަ ދިވެހި ދެ ފިލްމީ ތަރިން ކަމަށްވާ މަރިޔަމް އައްޒަ އަދި ރަވީ ފާރޫގް ވަނީ ޕްރޮޖެކްޓް އެގްރީމަންޓްގައި ރޭ ސޮއިކުރި އެވެ. އަދި ފިލްމުގައި ސްޕޮންސަރުންގެ ގޮތުގައި ބައިވެރިވާ ފަރާތްތަކާއެކު ވެސް ވަނީ ސޮއިކޮށްފަ އެވެ.
