ރިޔާސީ އިންތިހާބުގައި މި ސަރުކާރު ގެންނަން ދިވެހިން ވޯޓު ލީ އިންޑިއާ އަސްކަރިއްޔާ މިތަނުން ފޮނުވައިލަން ކަމަށާއި އެކަން އަދި ނުވުމަކީ ދިވެހިން އެކަން ބޭނުން ނުވުމެއް ނޫން ކަމަށް އުމަރު ނަސީރު ވިދާޅުވެއްޖެ އެވެ.
މާލެ ސިޓީ ކައުންސިލުގެ މެންބަރުންނާ ބައްދަލު ކުރެއްވުމަށްފަހު ބޭރަށް ނުކުމެވަޑައިގެންނެވި ވަގުތު "އަދަދު" އިން ކުރި ސުވާލެއްގެ ޖަވާބުގައި ރައީސް ދެއްކެވި ވާހަކަތަކަށް ރައްދު ދެއްވަމުންނެވެ.
އެގޮތުން އުމަރު ސޯޝަލްމީޑިއާގައި ލިޔުއްވި ޕޯސްޓެއްގައި ވިދާޅުވީ އިންޑިއާ އަސްކަރިއްޔާ ރާއްޖޭގައި ތިބުމުގެ ސަބަބުން ރާއްޖެގެ ސަލާމަތީ އަދި ހާރިޖީ މުހިންމު ނިންމުންތައް ދިވެހިން އަމިއްލައަށް ނިންމުމަށް ބުރޫ އަރާފައިވާ ކަމަށެވެ.
"ދިވެހިން އަދިވެސް ބޭނުންވަނީ އިންޑިއާ އަސްކަރިއްޔާ ރާއްޖޭގައި ފައި ހަރު ކޮށްލައިގެން 14 އަހަރު މި ތިބި ތިބުމަށް ނިމުމެއް ގެންނަން، އެކަން އިންޑިއާއިން ނުކޮށް ސިޔާސީ ވެރިން ރުއްސައިގެން އެ މީހުންގެ ރާގު ބަދަލު ކުރުވައިގެން ދެމިތިބެވިދާނެ ކަމަށް ހީކޮށްގެން ނުވާނެ، އެކަން ނިމުމަކަށް އަންނާނެ، ދިވެހި ތަރީހުން އެކަން އެނގޭނެ،" އޭނާ ލިޔުއްވާފައި ވެ އެވެ.
އިންޑިއާއަކީ ރާއްޖޭގެ ގާތް އަވައްޓެރިއެއްކަން ފާހަގަކުރައްވައި އުމަރުގެ ޕޯސްޓުގައި ލިޔުއްވާފައި ވަނީ އެ ގައުމާއެކު ގާތް ގުޅުމެއް ބޭއްވުމަށް ދިވެހިން އަބަދުވެސް އެދޭ ކަމަށެވެ. ނަމަވެސް އިންޑިއާގެ އުނގުގައި އިށީންނަން ދިވެހިން ނޭދޭ ކަމަށެވެ.
"ދިވެހިން އެދެނީ އެއްވެސް ބަހަނާއެއް ދެއްކުމަކާ ނުލައި އިންޑިއާގެ އަސްކަރިއްޔާ މި ގައުމުން ފޭނުމަށެވެ، އެކން ދިވެހިން ހާސިލު ކުރާނެ އެވެ،" އުމަރު ނަސީރުލިޔުއްވާފައިވެ އެވެ.
"އަދަދު" އިން ކުރި ސުވާލަކަށް ޖަވާބު ދެއްވަމުން ރައީސް މިއަދު ވިދާޅުވީ މި ސަރުކާރު ގެނައުމަށް ދިވެހިން ވޯޓު ދިނީ އެމަނިކުފާނުގެ ހާރިޖީ ސިޔާސަތަށް ރުހިގެން ކަމަށެވެ. އަދި، މިހާރު ވެސް ތަންފީޒު ކުރައްވަމުން ގެންދަވަނީ ރިޔާސީ ކެމްޕޭނު ތެރޭގައި ވެސް ވިދާޅުވެދެއްވި ހާރިޖީ ސިޔާސަތު ކަމަށް ރައީސް ވިދާޅުވި އެވެ.
ރައީސް މި ސަރުކާރުގެ ހާރިޖީ ސިޔާސަތު ސިފަކުރެއްވީ، ރާއްޖޭގެ މިނިވަންކަމާ ސިޔާދަތު ހިމާޔަތްވާކަން ޔަގީން ކުރެވޭ ގޮތަށް، އެއްބާރުލުން ލިބޭ ހުރިހާ ގައުމަކާ އެކު، ތަފާތުކުރުމެއްނެތި، ގާތްގުޅުން ބޭއްވުން ކަމަށެވެ.
"އެ ސިޔާސަތުން ކަސިޔާރުވެގެން އެއްކައިރިއަށް ދިޔަ އެއްވެސް ވަގުތެއް ނާންނާނެ. އެހެންވީމަ އަޅުގަނޑުމެން މައާފަށް އެދެން ޖެހޭ ސަބަބެއް ނެތެއްނޫންތޯ،" ރައީސް ވިދާޅުވި އެވެ.
ރައީސްގެ ވާހަކަތަކަށް އުމަރު ނަސީރުގެ އިތުރުން ވެސް ބައެއް އާންމު ފަރާތްތަކުން ސޯޝަލްމީޑިއާގައި ފާޑު ކިޔާފައިވެ އެވެ. ފާޑުކީ ބައެއް މީހުން ބުނެފައި ވަނީ "އިންޑިއާ އައުޓް" ކެމްޕޭނުގައި އިސްކޮށް ރައީސް މުއިއްޒު ހަރަކާތްތެރިވެވަޑައިގެންނެވިއިރު، ގުޅުން ބަދަހި ކުރައްވަން އެ ވިދާޅުވާ ގުޅުން އެމަނިކުފާނު ނުދަންނަ ކަމަށެވެ.
