އިންޑިއާގެ އެންމެ ނުފޫޒުގަދަ އެއް ވަޒީރު، އެކްސްޓާނަލް އެެފެއާޒް މިނިޓަރު ސުބްރަމަނިއަމް ޖައިޝަންކަރު ރާއްޖެއަށް ކުރައްވާ ރަސްމީ ދަތުރާއެކު ދެ ގައުމުގެ ދެމެދު އޮތް ގުޅުން އިތުރަށް ބަދަހިވެ ވަރުގަދަވާނެ ކަމަށް އުންމީދުކުރައްވާ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
ތިން ދުވަހުގެ ދަތުރުގައި ޖައިޝަންކަރު ރާއްޖެއަށް ވަޑައިގެންނެވީ އިއްޔެ ހަވީރު އެވެ. ރަސްމީ މަޝްވަރާތަކާއި ދެ އެއްބަސްވުމެއްގައި ސޮއިކުރުމަށްފަހު ދެ ވަޒީރުން އެކުގައި ދެއްވި ގުޅިފައިވާ ބަޔާނުގައި ޒަމީރު ވިދާޅުވީ، އިންޑިއާ އަކީ ދިވެހިންގެ އެންމެ ގާތް އެކުވެރިޔާ އަދި ތަރައްގީގެ މަދަދުގާރެއް ކަމަށެވެ. އަދި، ދެ ގައުމުގެ ގުޅުން ބިނާވެފައިވަނީ އިހުތިރާމުގެ މައްޗަށް ކަމަށްވެސް އޭނާ ވިދާޅުވި އެވެ.
"ދެ ގައުމުގެ ދެމެދު ކުރަމުން އަންނަ މަތީ ފަންތީގެ މަޝްވަރާތަކާއެކު ބޭނުންވާ ދާއިރާތަކުން ގުޅުން ދަނީ އިތުރަށް ބަދަހިވަމުން. އަޅުގަނޑުމެން މި ތިބީ، ދެ ގައުމަށްވެސް ފައިދާވާނެހެން މި ގުޅުން މިހާރަވަށްވުރެވެސް ވަރުގަދަ ކުރަން ތައްޔާރަށް،" ޒަމީރު ވިދާޅުވި އެވެ.
މި ސަރުކާރުގެ ފުރަތަމަ ކޮޅު އިންޑިއާއާ ގުޅުން ގޯސްވި ނަމަވެސް، އެ ގައުމާ ދެކޮޅު ބަހުރުވައާއި ދިވެހި ސަރުކާރުން ދުރުވެ އެ ގައުމާ ގާތްވުމަށް މިހާރު ގެންދަނީ ގިނަ މަސައްކަތަކެއް ކުރަމުންނެވެ.
ޒަމީރުގެ ވާހަކައިންވެސް އެކަން ފެނިގެންދިޔަ އެވެ. އެގޮތުން އިޖުތިމާއި އަދި އިގުތިސޯދީ ގޮތުން އިންޑިއާއިން ޒަމާނުއްސުރެ ދެމުން ގެންދާ އެހީތެރިކަމަށް ހާރިޖީ ވަޒީރު ވަނީ ތަކުރާރުކޮށް ޝުކުރުއަދާކުރެއްވި އެވެ. މިސާލެއްގެ ގޮތުގައި އައިޖީއެމްއެޗް ހޮސްޕިޓަލާއި މިހާރު މަސައްކަތް ކުރަމުންދާ ތިލަމާލެ ބުރިޖުވެސް ދެއްކެވި އެވެ.
އޭނާ ފާހަގަކުރެއްވި ގޮތުގައި ފޮރިން މިނިސްޓްރީ އަދި ރައީސް އޮފީހުގެ ބައެއް ވަޒީރުން ބޭއްވި ބައްދަލުވުމުގައި ގިނަ ދާއިރާތަކަކުން ގުޅުން ބަދަހިކުރަން ވަނީ މަޝްވަރާކޮށްފަ އެވެ. އޭގެ ތެރޭގައި މާލީ، އިންވެސްޓްމަންޓު، ތައުލީމު، ދިފާއީ ދާއިރާ، އަދި ސަރަހައްދީ ގުޅުމުގެ ދާއިރާ ހިމެނެ އެވެ.
މީގެ ތެރެއިން ދިފާއި ގޮތުން އިތުރަށް ގުޅުން ބަދަހިކޮށް ކުރިއަށް އޮތް ތަނުގައި ދެ ގައުމުގެ ސިފައިން އެކުގައި ބާއްވާ އަސްކަރީ ހަރަކާތްތައް އިތުރު ކުރުމަށްވެސް އެއްބަސްވެފައިވެ އެވެ.
