އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު ރަސްމީ ދަތުރެއްގައި މާދަމާ ރާއްޖެއަށް ވަޑައިގަންނަވާނެ ކަމަށާއި އޭނާ ވަޑައިގަންނަވަނީ ފޮރިން މިނިސްޓަރު ޒަމީރުގެ ދައުވަތަކަށް ކަމަށް ސަރުކާރުން ބުނެފި އެވެ.
ޖައިޝަންކަރު މާދަމާ ރާއްޖެއަށް ވަޑައިގަންވާކަން އިންޑިއާ ސަރުކާރުން ވެސް ވަނީ ހާމަކޮށްފަ އެވެ.
ފޮރިން މިނިސްޓްރީން މިއަދު ބުނީ މާދަމާއިން އާދިއްތަ ދުވަހުގެ ނިޔަލަށް ޖައިޝަންކަރު ކުރައްވާ ދަތުރަކީ ޒަމީރުގެ ދައުވަތަކަށް ކުރައްވާ ދަތުރެއް ކަމަށެވެ. މި ދަތުރުގައި ޖައިޝަންކަރު، ރައީސް ޑރ. މުހައްމަދު މުއިއްޒުއާ ބައްދަލުކުރައްވާނެ ކަމަށްވެސް ވެސް ބުންޏެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނުގައި ބުނީ، މި ދަތުރުގެ މަގުސަދަކީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކޮށް އިތުރަށް ގުޅުން ބަދަހިކުރެވޭނެ ދާއިރާތައް ދެނެގަތުން ކަމަށެވެ.
މިއީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުން އިންޑިއާގެ އިސް އޮފިޝަލަކު ރާއްޖެއަށް ކުރައްވާ ފުރަތަމަ ދަތުރެވެ. އެމަނިކުފާނު ވެރިކަމުގެ ހުވާ ކުރެއްވި ރަސްމިއްޔާތަށް ވަޑައިގެންނެވީ އިންޑިއާގެ އޭރުގެ އާތު ސައިންސް މިނިސްޓަރު ކިރެން ރިޖުޖޫ އެވެ.
ޖައިޝަންކަރު ރާއްޖެއަށް ދަތުރެއް ކުރައްްވަން ނިންމަވާފައި މިވަނީ ޕީއެންސީގެ ވެރިކަމުގެ ކުރީކޮޅު ދެ ގައުމުގެ ދެމެދު އޮތް ހާރިޖީ ނުތަވަނަސްކަމަށް ފަހު ގުޅުން ބަދަހި ކުރަން ފަށާފައިވާ ދުވަސްވަރެއްގަ އެވެ.
ޖައިޝަންކަރު އެންމެ ފަހުން ރާއްޖެ ވަޑައިގަތީ އިންޑިއާ ސަރުކާރުގެ އެހީގައި ހދ. ހަނިމާދޫ އެއާޕޯޓު ތަރައްގީ ކުރުމަށް ހިންގާ މަޝްރޫއުގެ އަމަލީ މަސައްކަތް ފެށުމަށް ބޭއްވި ހާއްސަ ރަސްމިއްޔާތުގައި ބައިވެރިވެވަޑައިގަތުމަށް މިދިޔަ އަހަރުގެ ޖެނުއަރީ މަހު އެވެ. އޭގެ ކުރިން 2022 ގެ އޮގަސްޓު މަހުވެސް އޭނާ ރާއްޖެ ވަޑައިގެންނެވި އެވެ.
