ސަރުކާރުގެ ވިސްނުން ހުރީ ވެރިކަމާއި ރައްޔިތުންގެ މަޖިލިސް ދައުރު އިތުރުކޮށްލުމަށް ކަމަށް އެމްޑީޕީގެ ރައީސް އަބްދުﷲ ޝާހިދު ރޭ ވިދާޅުވެއްޖެ އެވެ.
އެމްޑީޕީން ބޭއްވި ގައުމީ މަޖިލިސް ބައްދަލުވުމުގައި ޝާހިދު ވިދާޅުވީ މިއަދު އައިސް އޮތީ ބާރުތައް އެއްކޮށްލުމުގެ ވިސްނުން އޮތް ސަރުކާރެއް ކަމަށާއި ރައްޔިތުންގެ މަޖިލީހުގެ މުޅި ނިޒާމު ތަގައްޔަރުވެ މިސްރާބު ޖަހާފައި ވަނީ ބާރުތައް އެއްކޮށްލުމަށް ކަމަށެވެ.
"ވިސްނުން ހުރީ ވެރިކަމާއި މަޖިލިސް ދައުރުގެ މުއްދަތު އިތުރުކޮށްލުމަށް. މިނިވަން މުއައްސަސާތަކުގެ ބާރު ހަނިކޮށް، މިނިވަން މުއައްސާތައް އުވާލުމަށް ގިނަ މަސައްކަތްތަކެއް ކުރުން. ޖަހަމުންދާ ރަނގަބީލަކީ ބިރުވެރި ކަމުގެ ރަނގަބީލެއް،" ޝާހިދު ވިދާޅުވި އެވެ.
ގާނޫނު އަސާސީން ރައްޔިތުންނަށް އެންމެ ފުރިހަމައަށް ލިބިފައިވާ އެއް ބާބަކީ އަސާސީ ހައްގުތަކުގެ ބާބުކަން ފާހަގަކުރައްވައި ޝާހިދު ވިދާޅުވީ އެކަމާ ގުޅިގެން ދައްކަމުންދާ ވާހަކަތަކުން ފިއްކަނޑައިގެންދާ ކަމަށާއި ފުރަތަމަ އަމާޒު ހިފާފައި ހުރީ ލާމަރުކަޒީ ނިޒާމު ކޮށައި މަށައި އުވާލުމަށް ކަމަށެވެ.
ކަތީބު ސިސްޓަމަކަށް ދިޔުން ރަނގަޅު ކަމަށް މަޖިލީހުގައި ވާހަކަ ދެއްކުން އެއީ ނުރައްކާތެރިކަމުގެ ރަނގަބީލެއްކަން ގަބޫލުކުރަން ޖެހޭ ކަމަށް ވެސް ޝާހިދު ވިދާޅުވި އެވެ.
މި ސަރުކާރަށް ނުވަ މަސް ވެގެންދާއިރު ހިންގަމުންދިޔަ ހުރިހާ މަޝްރޫއުތަކެއް ހުއްޓި، ސަރުކާރުގެ ވިސްނުން ހުއްޓިފައި އޮތީ އެތެރޭގެ ކޯޅުމަށް ކަމަށާއި ނަމަވެސް އެމްޑީޕީގެ ވިސްނުން ހުންނަން ޖެހޭނީ ރާއްޖެ ހަމަ މަގަށް އެޅުވުމާ ދީމަލަށް ކަމަށް ވެސް އޭނާ ވިދާޅުވި އެވެ.
ރާއްޖޭގައި ކުރިން އޮތީ ވެރިކަމުގައި ހުންނަވާ އެއް ބޭފުޅެއްގެ ކޮންޓްރޯލުގައި ވެރިކަން ހިންގުމުގެ ނިޒާމެއް ކަމަށާއި ނަމަވެސް އެމްޑީޕީން އިސް ނަގައިގެން ކުރި ބުރަ މަސައްކަތުން މިހާރު މި އޮތް ގާނޫނުއަސާސީ ގެނެވުނު ކަމަށް ވެސް ވިދާޅުވި އެވެ.
