ލައިޕްޒިގު (އޮގަސްޓް 7) - ބާސެލޯނާ އިން ބޭނުންވި ގޮތަށް އާރްބީ ލައިޕްޒިގަށް ކުޅެމުން އަންނަ ސްޕެއިންގެ ފޯވާޑް ޑެނީ އޮލްމޯގެ ޑީލް ނިންމުމަށް އެއްބަސްވުމަކާ ގާތަށް އަތުވެފައިވާ ކަމަށް ރިޕޯޓްތައް ބުނެފި އެވެ.
ޖަރުމަނާއި ސްޕެއިނުގެ މީޑިއާ ރިޕޯޓްތައް ބުނާގޮތުން، އޮލްމޯ، 26، ވަނީ ހަ އަހަރުގެ ޑީލެއްގައި ބާސެލޯނާއާ އެކު ސޮއިކުރަން އެއްބަސްވެފަ އެވެ. އަދި ބާސެލޯނާ އިން ވަނީ އޮލްމޯ ގަންނަން ލައިޕްޒިގަށް 65 މިިލިއަން ޑޮލަރު ޖުމްލަ އެކު ދައްކަން ނިންމައިފަ އެވެ. އޮލްމޯގެ ޑީލްގެ ފައިސާތައް ދެ އަހަރަށް ބަހާލައިގެން ދައްކަން، ބާސެލޯނާ އިން ވަނީ އެއްބަސްވެފަ އެވެ.
ޖަރުމަނުގެ އާރްބީ ލައިޕްޒިގުގެ ކޮންޓްރެކްޓްގައި އޮލްމޯ ހުރިއިރު، އެ އެއްބަސްވުމުގެ މާއްދާއެއްގައިވާ ގޮތުން، މިދިޔަ މަހު 20 ވަނަ ދުވަހުގެ ކުރިން، 55 މިލިއަން ޑޮލަރުގެ ފީއެއް ދެއްކުމަށް ފަހު، އޮލްމޯ ގަތުމުގެ ފުރުސަތު ކޮންމެ ޓީމަކަށް ވެސް އޮތެވެ. އެއީ، ލައިޕްޒިގާ އެކު، 2027 ވަނަ އަހަރުގެ ޖޫންގެ ނިޔަލަށް އޮތް އޮލްމޯގެ ކޮންޓްރެކްޓް އުވާލުމަށްފަހު އެވެ.
އެކަމަކު، ބާސެލޯނާ އިން އެ މުއްދަތުގައި އޮލްމޯ ނުގަންނަން ނިންމީ، މިދިޔަ މަހުގެ ނިޔަލަށް ގަވާއިދުގެ ތެރެއަށް ފައްތަން ޖެހޭ ބާސެލޯނާގެ މާލީ ކަންކަން ކޮޅެއްގައި ޖެއްސުމުގެ ގޮތުންނެވެ.
މި ފަހަރުގެ ޔޫރޯ ފުޓްބޯޅަ މުބާރާތް ސްޕެއިނުން ކާމިޔާބުކުރިއިރު، މުބާރާތުގައި އެންމެ ގިނަ ލަނޑު ޖެހި ކުޅުންތެރިންގެ ތެރޭގައި ހިމެނޭ އޮލްމޯގެ ޑީލެކޭ އެއްގޮތަށް ބާސެލޯނާ އިން ވަނީ ސްޕެއިނުގެ ނީކޯ ވިލިއަމްސް ވެސް ގަންނަން މަސައްކަތްކޮށްފަ އެވެ. އެކަމަކު، ބާސެލޯނާގެ މާލީ ހާލަތު ހުރިގޮތުން، އެތުލެޓިކް ބިލްބާއޯ އަށް ކުޅެމުން އަންނަ ނީކޯ ގަންނަން ކުރި މަސައްކަތް ކާމިޔާބެއްނުވި އެވެ.
ބާސެލޯނާގައި 2007-2014 އަށް ހޭދަކުރި އޮލްމޯ އަކީ އެ ކްލަބްގެ ޔޫތު ޓީމުތަކުގައި ވެސް ފާހަގަކޮށްލެވޭ މޮޅު ކުުޅުމެއް ދެއްކި ކުޅުންތެރިއެކެވެ. އެކަމަކު، ބާސެލޯނާ ދޫކޮށް އޮލްމޯ ވަނީ، 2014 ވަނަ އަހަރު ކްރޮއޭޝިއާގެ ޑިނަމޯ ޒަގްރެބަށް ބަދަލުވެފަ އެވެ. އަދި އެ ޓީމަށް ގިނަ އަހަރުތަކެއް ކުޅުމަށް ފަހު، އޮލްމޯ ވަނީ 2020 ވަނަ އަހަރު ޖެނުއަރީ މަހު، 35 މިލިއަން ޑޮލަރަށް ލައިޕްޒިގަށް ސޮއިކޮށްފަ އެވެ.
