ބަންގްލަދޭޝްގެ ބޮޑުވަޒީރު ޝައިހް ހަސީނާ މަގާމުން އިސްތިއުފާ ދެއްވުމާ ގުޅިގެން އުފައްދާ ވަގުތީ ސަރުކާރު ލީޑްކުރާނީ ނޯބެލް ސުލްހައިގެ އިނާމު ލިބުނު މުހައްމަދު ޔޫނުސް، 83، ކަމަށް މިއަދު ނިންމައިފި އެވެ.
ބަންގްލަދޭޝްގެ ރައީސް މުހައްމަދު ޝަހާބުއްދީންގެ ތަރުޖަމާނު ޖޮއިނަލް އަބެޑިން ވިދާޅުވީ އިދިކޮޅު ލީޑަރުންނާ އެކު ކުރި މަޝްވަރާތަކަށް ފަހު ވަގުތީ ސަރުކާރު ލީޑްކުރަން ޔޫނުސް ހަމަޖައްސަން ނިންމާފައިވާ ކަމަށެވެ.
"ކުރެވޭ އިތުރު މަޝްވަރާތަކަށް ފަހު ވަގުތީ ސަރުކާރު އެކުލަވާލުމުގެ މަސައްކަތް ކުރިއަށް އޮތް ދުވަސްތަކުގައި އެއްކޮށް ނިމޭނެ. ނިމުނުހާ އަވަހަކަށް ނަންނަތައް ހާމަކުރާނަން،" އޭނާ ވިދާޅުވި އެވެ.
ޝަހާބުއްދީން ލީޑްކުރައްވާ މަޝްވަރާ ބައްދަލުވުންތަކުގައި ދަރިވަރުންގެ ލީޑަރުން، އިދިކޮޅު ޕާޓީތަކުގެ އިތުރުން އަސްކަރިއްޔާގެ ވެރިންނާއި، ސިވިލް ސޮސައިޓީގެ މެންބަރުންނާއި، ވިޔަފާރިވެރިން ވެސް ބައިވެރިވެ އެވެ.
ބަންގްލަދޭޝްގެ ބޮޑުވަޒީރުކަމުން ހަސީނާ އިސްތިއުފާ ދެއްވީ ވަޒީފާގެ ކޯޓާގެ މައްސަލައިގައި ދަރިވަރުން ކުރަމުންދިޔަ މުޒާހަރާތައް ކޮންޓްރޯލުން ނެއްޓުމާ ގުޅިގެންނެވެ.
އެ ގައުމުގައި ކުރަމުންދިޔަ މުޒާހަރާތައް ވަރުގަދަވެ، އިތުރު ޑިމާންޑުތައް ކޮށް މުޅި ގައުމުގައި ދަނީ ހަމަނުޖެހުން ހިންގަމުންނެވެ. އެގޮތުން އާންމުންގެ މުދަަލަށް ގެއްލުންތީ ތަންތަން ލޫޓުވުމުގެ އިތުރުން ފައްޅިތަކަށް ވެސް ދަނީ ގެއްލުން ދެމުންނެވެ.
