އަންނަ ސެޕްޓެމްބަރު މަހު އޮންނަ ސްރީލަންކާގެ ރިޔާސީ އިންތިހާބުގައި އެސްއެލްޕީޕީގެ ކެންޑިޑޭޓަކަށް އެ ޕާޓީގެ ލީޑަރު މަހިންދަ ރާޖަޕަކްސަގެ ދަރިކަލުން ނަމާލް ރާޖަޕަކްސަ މިއަދު ހަމަޖައްސައި އެކަން އިއުލާންކޮށްފި އެވެ.
ކޮލޮމްބޯގައި ހުންނަ އެސްއެލްޕީޕީގެ ހެޑްކުއާޓާސްގައި އެސްއެލްޕީޕީގެ ޖެނެރަލް ސެކްރެޓަރީ ސަގަރަ ކަރިޔަވަސަމް ވިދާޅުވީ ޕާޓީގައި ކުރެވުނު މަޝްވަރާތަކަށްފަހު ޓިކެޓު ނަމާލް، 38، އަށް ދިނުމަށް ނިންމާފައިވާ ކަމަށެވެ.
ލަންކާގެ ނޫސްތަކުން ބުނާ ގޮތުން އެސްއެލްޕީޕީން ނަމާލްއަށް ޓިކެޓު ދޭން ނިންމީ، ޓިކެޓު ކުރިން ދޭން އުޅުނު މަޝްހޫރު ވިޔަފާރިވެރިޔާ ދަމިކާ ޕެރޭރާ އެ ފުރުސަތު ދޫކޮށްލުމުންނެވެ.
އިންތިހާބުގައި ނަމާލް ވާދަކުރައްވާނެކަން ކަށަވަރުވުމާއެކު ގިނަ ބަޔަކު ސޯޝަލް މީޑިއާގައި އަންނަނީ އޭނާއަށް ތާއީދުކުރާނެކަން ހާމަކުރަމުންނެވެ.
ލަންކާ އިންތިހާބުގައި އެ ގައުމުގެ މިހާރުގެ ރައީސް ރަނިލް ވިކްރަމްސިންހަ ވާދަކުރައްވަން ނިންމެވުމާ ގުޅިގެން، އެސްއެލްޕީޕީން ވަނީ އެ ޕާޓީން ވަކިން ކެންޑިޑޭޓަކު ނެރޭނެކަން އިއުލާންކޮށްފަ އެވެ.
ލަންކާގެ ވެރިކަމާ 2022 ގައި ރަނިލް ހަވާލުވެވަޑައިގެންނެވީ އެ ގައުމުގެ ރައީސް ގޮތަބަޔާ ރާޖަޕަކްސަ އިސްތިއުފާ ދެއްވުމާ ގުޅިގެންނެވެ.
ސެޕްޓެމްބަރު 21، 2024 ގައި އޮންނަ އިންތިހާބުގައި ލަންކާގެ އާބާދީގެ 22 މިލިއަން މީހުންގެ ތެރެއިން 17 މިލިއަނެއްހާ މީހުންނަށް ވޯޓުލުމުގެ ހައްގު ލިބޭނެ އެވެ.
