ސްރީލަންކާގެ ރިޔާސީ އިންތިހާބުގައި އެ ގައުމުގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން އުމުރުން 38 އަހަރުގެ ނަމާލް ރާޖަޕަކްސަ އެސްއެލްޕީޕީގެ ކެންޑިޑޭޓެއް ގޮތުގައި ވާދަކުރަން އުޅޭ ކަމުގެ އަޑުތައް ގަދަވެއްޖެ އެވެ.
ލަންކާގެ މީޑިއާތަކުން ބުނީ އެސްއެލްޕީޕީގެ ކެންޑިޑެންސީ ދޭން ނިންމާފައިވާ މަޝްހޫރު ވިޔަފާރިވެރިޔާ ދަމިކާ ޕެރޭރާ ކެންޑިޑެންސީ ދޫކޮށްލަން ނިންމާފައިވާ ކަމަށާއި އެގޮތުން ކެންޑިޑެންސީ ދިނުން ދެން އެންމެ ގާތީ ނަމާލްއަށް ކަމަށެވެ.
"ދަމިކާ ކެންޑިޑެންސީ ގަބޫލު ނުކޮށްފިނަމަ، ނަމާލް ހުރީ އިންތިހާބުގައި ވާދަކުރަން ތައްޔާރަށް،" ލަންކާއިން ރަޝިއާއަށް ކުރިން ކަނޑައަޅުއްވާފައި ހުންނަވާ ސަފީރު އުދަޔަންގަ ވީރަޓުންގަ ވިދާޅުވި އެވެ.
އިންތިހާބުގައި އެސްއެލްޕީޕީގެ ފަރާތުން ނެރޭނެ ކެންޑިޑޭޓެއް އިންތިހާބަށް ކުރިމަތިލުމަށް ދީފައިވާ އޯގަސްޓް، 15 ގެ މުއްދަތުގެ ކުރިން އިލެކްޝަން ކޮމިޝަނަށް ހުށަހަޅަން ޖެހޭނެ އެވެ. މިއަދު އެ ޕާޓީގެ ރިޔާސީ ކެންޑިޑޭޓު އިއުލާނު ކުރާނެ ކަމަށް ބެލެވެ އެވެ.
ލަންކާ އިންތިހާބުގައި އެ ގައުމުގެ މިހާރުގެ ރައީސް ރަނިލް ވިކްރަމްސިންހު ވާދަކުރައްވަން ނިންމެވުމާ ގުޅިގެން، އެސްއެލްޕީޕީން ވަނީ އެ ޕާޓީން ވަކިން ކެންޑިޑޭޓަކު ނެރޭނެކަން އިއުލާންކޮށްފަ އެވެ.
ލަންކާގެ ވެރިކަމާ 2022 ގައި ރަނިލް ހަވާލުވެވަޑައިގެންނެވީ އެ ގައުމުގެ ރައީސް ގޮތަބަޔާ ރާޖަޕަކްސަ އިސްތިއުފާ ދެއްވުމާ ގުޅިގެންނެވެ.
ސެޕްޓެމްބަރު 21، 2023 ގައި އޮންނަ އިންތިހާބުގައި ލަންކާގެ އާބާދީގެ 22 މިލިއަން މީހުންގެ ތެރެއިން 17 މިލިއަނެއްހާ މީހުންނަށް ވޯޓުލުމުގެ ހައްގު ލިބޭނެ އެވެ.
