ބަންގްލަދޭޝްގެ ހާލަތު ގޯހުން ގޯހަށް ގޮސް، ކޮލެޖު ދަރިވަރުން ކުރާ މުޒާހަރާގައިގެ ޑިމާންޑާ އެއްގޮތަށް އެ ގައުމުގެ ގާނޫނު ހަދާ މަޖިލިސް އުވާލަން ރައީސް މުހައްމަދު ޝަހާބުއްދީން ނިންމަވައިފި އެވެ.
ބަންގްލަދޭޝްގައި ކުރަމުންދާ މުޒާހަރާތައް ކޮންޓްރޯލުން ނެއްޓުމާ ގުޅިގެން އެ ގައުމުގެ ބޮޑުވަޒީރު ޝައިހް ހަސީނާ ވަނީ އިސްތިއުފާ ދެއްވުމަށް ފަހު، ގައުމު ދޫކުރައްވާ އިންޑިއާއަށް ފިއްލަވައިގެން ގޮސްފަ އެވެ.
"ރައީސް ޝަހާބުއްދީން ވަނީ ގާނޫނު ހަދާ މަޖިލިސް އުވާލުމަށް ނިންމަވާފައި،" ބަންގްލަދޭޝް ރައީސް އޮފީހުގެ ޕްރެސް ސެކްރެޓަރީ ވިދާޅުވި އެވެ.
މުޒާހަރާތަކުން ހައްޔަރުކުރި އެންމެން ބަންދުން ދޫޫކޮށްލުމުގެ އިތުރުން ކޮރަޕްޝަންގެ ކުށް ސާބިތުވެ 17 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދިޔަ ބަންގްލަދޭޝްގެ ކުރީގެ ބޮޑުވަޒީރު ބޭގަމް ހާލިދާ ޒިއާ ގޭބަންދުން ވަނީ ދޫކޮށްލާފަ އެވެ.
ބަންގްލަދޭޝްގެ އަސްކަރިއްޔާގެ ޗީފު ވާކިރުއްޒަމާނު ވަނީ މުޒާހަރާތަކުގައި ހިނގި މަރުގެ މަރުގެ މައްސަލަތައް ބަލައި، ހުރިހާ އެންމެންނަށް އިންސާފު ހޯދައިދޭނެކަމުގެ ޔަގީންކަން ދެއްވާފަ އެވެ.
މީގެ އިތުރުން ބަންގްލަދޭޝްގައި ވަގުތީ ސަރުކާރެއް އިދިކޮޅު ލީޑަރުންނާއި ގުޅިގެން އުފެއްދުމުގެ މަސައްކަތް ވީހާ ވެސް އަވަހަށްކޮށް ނިންމާނެ ކަމަށް އޭނާ ވަނީ ވިދާޅުވެފަ އެވެ.
ނަމަވެސް ބަންގްލަދޭޝްގައި ކުރަމުންދާ މުޒާހަރާތައް ވަރުގަދަވެ، އިތުރު ޑިމާންޑުތައް ކޮށް މުޅި ގައުމުގައި ދަނީ ހަމަނުޖެހުން ހިންގަމުންނެވެ. އެގޮތުން އާންމުންގެ މުދަަލަށް ގެއްލުންތީ ތަންތަން ލޫޓުވުމުގެ އިތުރުން ފައްޅިތަކަށް ވެސް ދަނީ ގެއްލުން ދެމުންނެވެ.
