ދިރިއުޅެން އެކަށީގެންނުވާ ވަރަށް ބައުވެ ހަލާކުވެފައިވާ ގެއެއްގެ، މުޑުދާރު މާހައުލެއްގައި ކާތަކެތި ތައްޔާރުކުރަން ތިބި ތިން ބިދޭސީން، އިމިގްރޭޝަނުގެ ބެލުމުގެ ދަށަށް މިއަދު ގެންގޮސްފި އެވެ.
އިމިގްރޭޝަނުން ބުނި ގޮތުގައި އެ ތަން ބަލައި ފާސްކޮށް ތިން މީހުން ހައްޔަރުކުރީ ގަވައިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ރިޕޯޓްކުރަން ގާއިމްކޮށްފައިވާ "އިމިގްރޭޝަން ވޮޗް" ޕޯޓަލް މެދުވެރިކޮށް މީހަކު ދިން މައުލޫމާތަކާ ގުޅިގެން ހިންގި އޮޕަރޭޝަނެއްގަ އެވެ.
އެ ތިން މީހުން ހައްޔަރުކޮށް، އެމީހުން ދިރިއުޅުނު ތަނުގެ ފޮޓޯތައް އިމިގްރޭޝަނުން މިއަދު އާއްމުކުރި އެވެ.
އެ ފޮޓޯތަކުން ފެންނަ ގޮތުގައި މާރުކޭޓްތަކާއި ފިހާރަތަކުން ދިވެހިން އާއްމުކޮށް، ގަންނަ ބާވަތްތަކެއް ކަމަށްވާ ކުދިގުޅަ އާއި އަތުޖެހި ފަދަ ބާވަތްތައް ތައްޔާރުކުރުމުގެ މަސައްކަތް އެމީހުން ކުރަމުން ދިޔައީ ވަރަށް މުޑުދާރު މާހައުލެއްގަ އެވެ. ކުދިގުޅައާއި އަތުޖެހީގެ އިތުރުން ތެލުލިފަތާއި ކިއްލި ފަދަ ބާވަތްތައް ވެސް އެތަނުގައި ތައްޔާރުކޮށްފައި ހުއްޓެވެ.
"މި ރެއިޑުގައި ގިނަ އަދަދަކަށް އާންމުން ފިހާރަތަކުން ގަނެއުޅޭ ކާބޯތަކެތި ފެނިފައިވާތީ، މިކަން ވާނީ ކަމާބެހޭ އިދާރާތަކުގެ ސަމާލުކަމަށް ގެނެވިފައި" ފޮޓޯތަކާ އެކު އެކްސްގައި ކުރި ޕޯސްޓްގައި އިމިގްރޭޝަނުން ބުންޏެވެ.
ގަވައިދާ ހިލާފަށް އުޅޭ ބިދޭސީން ހޯދަން ހިންގަމުން އަންނަ އޮޕަރޭޝަންތަކުގައި މިފަދަ އެތައް ތަނެއް މީގެ ކުރިން ވެސް ބަލައިފާސްކޮށްފައި ވެ އެވެ. އެ ތަންތަނުން ހައްޔަރުކުރި ގިނަ ބިދޭސީން މިހާރު ވަނީ ރާއްޖޭން ޑީޕޯޓްވެސް ކޮށްފަ އެވެ.
