ހިޔާނާތުގެ މައްސަލައިގައި 17 އަހަރުގެ ޖަލު ހުކުމެއް ތަންފީޒު ކުރަމުން ދިޔަ ބަންގްލަދޭޝްގެ ކުރީގެ ބޮޑުވަޒީރު ބޭގަމް ޚާލިދާ ޒިއާ އިއްޔެ މިނިވަންކޮށްފި އެވެ.
އިދިކޮޅު ލީޑަރުންގެ ތެރޭގައި ހިމެނޭ ބަންގްލަދޭޝް ނެޝަނަލިސްޓް ޕާޓީ (ބީއެންޕީ) ގެ ޗެއާޕާސަން ޚާލިދާ ޒިއާ، 78 މިނިވަންކުރަން ނިންމީ ރައީސް ޝަހާބުއްދީންގެ އިތުރުން އަސްކަރިއްޔާގެ ޗީފު ވާކިރުއްޒަމާނު އާއި ސަރުކާރުގެ އިސްވެރިން އަދި އިދިކޮޅު ޕާޓީތަކުގެ ލީޑަރުން ބޭއްވި ބައްދަލުވުމަށް ފަހު އެވެ.
ޚާލިދާ މިނިވަން ކުރީ ބަންގްލަދޭޝްގެ ބޮޑުވަޒީރު ޝައިޚް ހަސީނާ އިއްޔެ އިސްތިއުފާ ދެއްވިތާ ގަޑިއިރުތަކެއް ފަހުންނެ އެވެ.
ހަސީނާގެ އިސްތިއުފާ ދެއްވަން މަޖުބޫރުވި، ދަރިވަރުންގެ މުޒާހަރާގައި ހައްޔަރުކުރި އެންމެން ދޫކޮށްލަން ވެސް ވަނީ ނިންމައިފައި ކަމަށް ރައީސް ޝަހާބުއްދީން ވިދާޅުވި އެވެ.
ބަންގްލަދޭޝްގެ ހާލަތު ގޯސްވީ 1971 ގައި ޕާކިސްތާނާ ދެކޮޅަށް ހަނގުރާމަކުރި އެ ގައުމުގެ އަސްކަރިއްޔާގެ އާއިލާތަކަށް ސަރުކާރުން ދޭ 30 ޕަސަންޓުގެ ވަޒީފާގެ ކޯޓާއާ ގުޅިގެންނެވެ. އެކަމާ ގުޅިގެން މިދިޔަ މަހު ފެށި މުޒާހަރާތަކުގައި 2،000 އަށްވުރެ ގިނަ ދަރިވަރުން ހައްޔަރުކުރި އެވެ.
މުޒާހަރާތައް ކޮންޓްރޯލުން ނެއްޓިގެންދިޔައީ މުޒާހަރާގައި ބައިވެރިވި 300 އަށްވުރެ ގިިނަ މީހުން، ސަލާމަތީ ބާރުތަކާއި ސަރުކާރަށް ތާއީދުކުރާ މީހުން މަރާލުމާ ގުޅިގެންނެވެ.
އެ މުޒާހަރާތައް ކޮންޓްރޯލް ނުކުރެވި އެންމެ ފަހުން ހަސީނާ އިސްތިއުފާ ދެއްވުމަށް ފަހު ހެލިކޮޕްޓަރެއްގައި ވިއްލަވައިގެން ވަނީ އިންޑިއާއަށް ވަޑައިގެންފަ އެވެ. އިންޑިއާއިން ހަސީނާ ދެން ވަޑައިގަތުމަށް ހަމަޖެހިފައިވަނީ އިނގިރޭސިވިލާތުން ހިމާޔަތް ހޯއްދަވައިގެން އެ ގައުމަށް ކަމަށް ރިޕޯޓްތައް ބުނެ އެވެ.
