ދާހިލީ ހަމަނުޖެހުމަކަށް ގޮސްފައިވާ ބަންގްލަދޭޝްގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވުމާ ގުޅިގެން އެ ގައުމުގައި ވަގުތީ ސަރުކާރެއް އެކުލަވައިލުމުގެ މަސައްކަތް ފަށާފައިވާ ކަމަށް އެ ގައުމުގެ އަސްކަރިއްޔާއިން ބުނެފި އެވެ.
މިދިޔަ ޖެނުއަރީ މަހު ފަސް ވަނަ ދައުރަކަށް އިންތިހާބުވެވަޑައިގެންނެވި ހަސީނާ ރިޔާސީ ގަނޑުވަރު ދޫކުރައްވައި ފިއްލެވީ މިހާރު އެ ގައުމުގައި މުޒާހަރާކުރަމުންދާ މީހުން ގަނޑުވަރަށް ވަދެގަތުމުންނެވެ.
ގައުމުގެ ހާލަތާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން އަސްކަރިއްޔާގެ ޗީފު ވާކިރުއްޒަމާނު ވަނީ ހަސީނާ އިސްތިއުފާދެއްވިކަން ޔަގީންކޮށްދެއްވާފަ އެވެ. އަދި، ވަގުތީ ސަރުކާރެއް އެކުލަވައިލުމުގެ މަސައްކަތް ސިޔާސީ ޕާޓީތަކާއެކު ކުރަމުންދާ ކަމަށްވެސް އޭނާ ވިދާޅުވި އެވެ.
ވަގުތީ ސަރުކާރު އެކުލަވައިލުމުގައި މިރޭ ރަނގަޅު މަގެއް ފެންނާނެ ކަމަށް ބެލެވޭ ކަމަށް ވެސް އޭނާ ވިދާޅުވި އެވެ. ނަމަވެސް މިވަގުތު ސީދާ އެކަމާ ގުޅޭ ގޮތުން ތަފުސީލު ދެވެން ނެތްކަމަށް ވިދާޅުވެ އޭނާ ވަނީ ވަނީ އާންމުން ގޭގައި މަޑުކުރަންވެސް ނަސޭހަތްތެރިވެފަ އެވެ.
އިސްތިއުފާ ދެއްވުމަށްފަހު ހަސީނާ ގައުމު ދޫކުރައްވާފައިވާ ކަމަށްވެސް ބައެއް ނޫސްތަކުން ދަނީ ރިޕޯޓުކުރަމުންނެވެ. ގިނަ ރިޕޯޓުތައް ބުނާ ގޮތުގައި ހަސީނާ ވަޑައިގަންނަވާނީ އަވަށްޓެރި އިންޑިއާ އަށެވެ.
ބަންގްލަދޭޝްގައި ޔުނިވާސިޓީ ދަރިވަރުންނާއި އާންމުން މުޒާހަރާ ކުރަން ފެށީ ސިވިލް ސާވިސްގެ ވަޒީފާ އެ ގައުމުގެ ވަކި ބަޔަކަށް ރިޒާވްކޮށްފައި އޮންނަ އުސޫލު ބަދަލު ކުރާށެވެ.
ހަސީނާ ވަނީ ދަރިވަރުންނާ ދެކޮޅަށް އެ ގައުމުގެ ސިފައިން ނެރެ މަދުވެގެން 300 އަށް ވުރެ ގިނަ މީހުން މަރާލައިފަ އެވެ. ހަސީނާއަށް ތާއީދު ކުރާ އެ ގައުމުގެ ގޭންގުތަކުން ވެސް ވަނީ މުޒާހަރާ ކުރާ މީހުންނާ ދެކޮޅަށް ތެދުވެފަ އެވެ.
މިވަގުތު ވެސް މިލިއަނަކަށް ވުރެ ގިނަ ރައްޔިތުން މަގުތަކަށް ނުކުމެ މުޒާހަރާ ކުރަމުންދާ ކަމަށް ރިޕޯޓްތައް ބުންޏެވެ.
