ދާހިލީ ހަމަނުޖެހުމަކަށް ގޮސްފައިވާ ބަންގްލަދޭޝްގެ ބޮޑުވަޒީރު ޝެއިހް ހަސީނާ އިސްތިއުފާ ދެއްވައިފި ކަމަށް މީޑިއާ ރިޕޯޓުތަކުގައި ބުނެފި އެވެ.
ބަންގްލަދޭޝް ސަރުކާރުގެ އޮފިޝަލަކާ ހަވާލާދީ ރޮއިޓާސް އިން ބުނީ ހަސީނާ މިގުތު ހުންނެވީ ފިއްލަވައި ކަމަށާއި މިހާރު އިސްތިއުފާ ވެސް ދެއްވާފައިވާ ކަމަށެވެ.
މިދިޔަ ޖެނުއަރީ މަހު ފަސް ވަނަ ދައުރަކަށް އިންތިހާބުވެވަޑައިގެންނެވި ހަސީނާ ދިރިއުޅުއްވާ ގަނޑުވަރަށް އެ ގައުމުގެ އާންމު ވަދެގަނެފައިވާ ކަމަށް ވެސް މީޑިއާ ރިޕޯޓުތަކުން ބުނެ އެވެ.
ހަސީނާ މިވަގުތު ހުންނެވީ ބަންގްލަދޭޝްގައި ނޫން ކަމަށް ވެސް މީޑިއާ ރިޕޯޓުތަކުން ބުނެ އެވެ. ރިޕޯޓުތަކުން ބުނަނީ މިލިޓަރީ ހެލިކޮޕްޓަރެއްގައި އެކަމަނާ ފިއްލެވީ އިންޑިއާއަށް ކަމަށެވެ.
ބަންގްލަދޭޝްގައި ޔުނިވާސިޓީ ދަރިވަރުންނާއި އާންމުން މުޒާހަރާ ކުރަން ފެށީ ސިވިލް ސާވިސްގެ ވަޒީފާ އެ ގައުމުގެ ވަކި ބަޔަކަށް ރިޒާވްކޮށްފައި އޮންނަ އުސޫލު ބަދަލު ކުރާށެވެ.
ހަސީނާ ވަނީ ދަރިވަރުންނާ ދެކޮޅަށް އެ ގައުމުގެ ސިފައިން ނެރެ މަދުވެގެން 300 އަށް ވުރެ ގިނަ މީހުން މަރާލައިފަ އެވެ. ހަސީނާއަށް ތާއީދު ކުރާ އެ ގައުމުގެ ގޭންގުތަކުން ވެސް ވަނީ މުޒާހަރާ ކުރާ މީހުންނާ ދެކޮޅަށް ތެދުވެފަ އެވެ.
މިވަގުތު ވެސް މިލިއަނަކަށް ވުރެ ގިނަ ރައްޔިތުން ދަނީ މަގުތަކަށް ނުކުމެ މުޒާހަރާ ކުރަމުން ކަމަށްވެ އެވެ.
ހަސީނާ އިސްތިއުފާ ދެއްވުމުން އެ ގައުމުގެ އަސްކަރިއްޔާގެ ވެރިޔާ ވާކިރުއްޒަމާން ވަނީ ހަމަނުޖެހުން މައިތިރިކުރުމުގެ މަސައްކަތް ފަށައިފަ އެވެ. އަދި ވަގުތީ ސަރުކާރެއް އެކުލަވާލުމަށް އިދިކޮޅު ޕާޓީތަކާއެކު މިއަދު ވާހަކަ ދެއްކުމަށް ހަމަޖެހިފައިވާ ކަމަށް ވެސް އޭނާ ވިދާޅުވި އެވެ.
ހަމަނުޖެހުމުގައި މަރުވި އެންމެންގެ މައްސަލަތައް އިންސާފުވެރިކަމާއެކު ތަހުގީގު ކުރާނެކަމުގެ ޔަގީންކަން ވެސް އަސްކަރިއްޔާގެ ވެރިޔާ އެ ގައުމުގެ ރައްޔިތުންނަށް ދެއްވި އެވެ.
