ލ. ފޮނަދޫ ކައުންސިލްގެ ސެކްރެޓަރީ ޖެނެރަލްގެ މަގާމުން މުހައްމަދު ފާއިގު ވަކިކޮށްފި އެވެ.
ފާއިގު މަގާމުން ވަކިކުރަން ސިވިލް ސާވިސް ކޮމިޝަން(ސީއެސްސީ) އަށް މައްސަލަ ހުށައެޅީ ފޮނަދޫ ކައުންސިލުން ބޭއްވި 19 ވަނަ އާންމު ޖަލްސާގައި ނިންމުމަށް ފަހު އެވެ.
އެ މައްސަލަ ސިވިލް ސާވިސް ކޮމިޝަނުން ބަލަމުންދާ ކަމަށް ބުނީ މޭ މަހުގެ ތެރޭގަ އެވެ. އަދި އޭނާ މަގާމުން ވަކި ކުރީ މިދިޔަ މަހުގެ 18 ގަ އެވެ.
ފާއިގު މަގާމުން ވަކިކުރަން ހުށައެޅީ މަގާމުގެ ޒިންމާތަކާއި މަސްއޫލިއްޔަތު އަދާ ނުކުރާތީ އާއި ކައުންސިލުގެ ނިންމުންތައް ތަންފީޒު ކުރުމުގައި އެއްބާރުލުން ނުދޭ ކަމަށް ކައުންސިލުން ތުހުމަތުކޮށްފަ އެވެ.
އެގޮތުން އަތޮޅު ކައުންސިލަށް ފޮނުވަންޖެހޭ ރިޕޯޓުތައް ނުފޮނުވުމާއި, ހާލުބެލުން ޕޯޓަލްގެ މަސައްކަތް ނުކުރުމާއި, މަސައްކަތް ހޭންޑްއޯވާ ނުކޮށް ޗުއްޓީއަށް ދިއުމުގެ އިތުރުން ހެނދުނުގެ ބްރީފިންތަކަށް ހާޒިރުނުވުން ފަދަ ކަންކަން އޭނާއާ ދެކޮޅަށް ފާހަގަކޮށްފައިވެ އެވެ.
ކައުންސިލުން މި ތުހުމަތުތައް ކުރި ނަމަވެސް، ފާއިގު އެ ހުރިހާ ތުހުމަތުތައް ދޮގުކުރައްވަ އެވެ. ކުރިން އޭނާ "އަދަދު" އަށް ދެއްވި އިންޓަވިއުއެއްގައި ވިދާޅުވީ މައްސަލަ ޖެހުނީ ނިމިދިޔަ ރައްޔިތުންގެ މަޖިލިސް އިންތިހާބުގައި، ޕީއެންސީގެ ކެންޑިޑޭޓު، އަބްދުއްރަހީމް އަބްދުﷲ (މިހާރު ރައްޔިތުންގެ މަޖިލީހުގެ ރައީސް) އަށް ތާއިދު ނުކޮށް، އަމިއްލަ ގޮތުން ވާދަކުރި އިބްރާހިމް އަނީސް އަށް އޭނާ ތާއިދު ކުރުމުން ކަމަށެވެ.
މަގާމުން ވަކިކުރުމާ ގުޅިގެން "އަދަދު" އިން ސުވާލުކުރުމުން ފާއިގު މިއަދު ވިދާޅުވީ ވަޒީފާއިން ވަކިކުރި މައްސަލަ ވަޒީފާއާ ޓްރައިބިއުނަލްއަށް ހުށައަޅަން ނިންމައިފައިވާ ކަމަށެވެ.
އޭނާ ހުރި މަގާމު ހުސްވުމާއި ގުޅިގެން އެ މަގާމަށް މީހަކު ނެގުމަށް ސީއެސްސީ އިން ވަނީ ޖުލައި 29، ގައި އިއުލާންކޮށްފަ އެވެ.
