ހަމާސްގެ ޕޮލިޓިކަލް ޗީފް، އިސްމާއިލް ހަނިއްޔާ ޝަހީދުކޮށްލި މައްސަލައިގައި ރައީސް ޑރ. މުހައްމަދު މުއިއްޒުގެ ސަރުކާރާއި ރާއްޖޭގައި ހިންގާ ބައެއް ދީނީ ޖަމިއްޔާ ޖަމާއަތްތަކުން ހަނު ތިބި ތިބުން، ކުރީގެ އިސްލާމިކް މިނިސްޓަރު ޑރ. އަހުމަދު ޒާހިރު ކުށްވެރި ކުރައްވައިފި އެވެ.
ހަނިއްޔާ ޝަހީދުކޮށްލާފައި ވަނީ އިރާނުގެ އައު ރައީސް ހުވާ ކުރެއްވުމުގެ ރަސްމިއްޔާތަށް އެގައުމުގެ ވެރި ރަށް، ތެހެރާނަށް ވަޑައިގެން ހުންނަވަނިކޮށް ބުދަ ދުވަހުގެ ފަތިހު އެވެ. ހަނިއްޔާ ޝަހީދުކޮށްލި ހަމަލާ ދީފައި ވަނީ އޭނާ ހުންނެވި އިމާރާތަށް ދިން ހަމަލާއެއްގަ އެވެ. އެ ހަމަލާގައި ހަނިއްޔާގެ ބޮޑީ ގާޑެއް ވެސް ޝަހީދުފައިވެ އެވެ.
ހަނިއްޔާ އަށް ދިން ހަމަލާގެ ޒިންމާ އަދި އެއްވެސް ފަރާތަކުން އުފުލައިފައެއް ނުވެ އެވެ. ނަމަވެސް އެއީ އިޒްރޭލުން ދިން ހަމަލާއެއް ކަމަށް ހަމާސްއިން ވަނީ ތުހުމަތުކޮށްފަ އެވެ.
ހަނިއްޔާ އަށް ދިން ހަމަލާ އާ ގުޅޭގޮތުން ރާއްޖެއިން ބަހެއް ނުބުނާތީ އެކަމަށް ފާޑުކިޔައި ބައެއް މީހުން އަންނަނީ ސޯޝަލްމީޑިއާގައި ފާޑު ކިޔަމުންނެވެ.
ކުރީގެ އިސްލާމިކް މިނިސްޓަރު ޑރ. ޒާހިރު ވިދާޅުވީ ހަނިއްޔާ ޝަހީދު ކޮށްލުމާވިދިގެން، ގައުމުތަކާއި ޖަމުއިއްޔާ ޖަމާއަތްތަކުން އަދި ފަރުދުން، އެ އަމަލު ކުށްވެރިކޮށް، ތައުޒިޔާ ކިޔާއިރު ދިވެހި ސަރުކާރާއި ބައެއް ދީނީ ޖަމުއިއްޔާ ޖަމާއަތަކުން ފަލަސްތީނުގެ ރައްޔިތުންނާއި އިސްލާމީ އުއްމަތަށް ތައުޒިޔާ ނުލިޔައި، ހަނު ތިބުމަކީ، ޞަހްޔޫނީންގެ އަނިޔާވެރިކަމުން ފަލަސްތީނު މިނިވަން ކުރުމަށްޓަކައި ފަލަސްތީނުގެ ހައްގުގައި ޖިހާދުކޮށް، އަޑުއުފުލާ ފަރާތްތަކާއި ފަލަސްތީނުގެ ރައްޔިތުންގެ ހައްގުގައި ވެވޭ ވަރަށް އިހާނެތި އަމަލެއް ކަމަށެވެ.
"އިސްމާއީލް ހަނިއްޔާގެ މުޅި ހަޔާތް ހޭދަ ކުރެއްވީ ސާބިތު ކަމާއެކު ޖިހާުދު ކުރެއްވުމުގަ. މާތް ﷲ، އަޅަމެންގެ ބަހާއި އަމަލު އެއްގޮތް ކުރައްވާ، ހެޔޮވިސްނުން ދެއްވާށި،" ޑރ. ޒާހިރު އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ.
"ފަލަސްތީނުގެ ހައްގުގައި، ބައިނަލް އަގުވާމީ މައިދާނުގައި ކުރެވޭ ކޮންމެ ކަމެއްގައި ރާއްޖޭން ބައިވެރިވެ ދެމިއޮންނާނެ،" ކަމަށް މެއި، 20 ގައި އެކްސްގައި ކުރެއްވި ރައީސް މުއިއްޒު ކުރެއްވި ޕޯސްޓެއްގައި ވިދާޅުވެފަ އެވެ.
