ބަންގްލަދޭޝްގައި ވަޒީފާ ކޯޓާއާ ގުޅިގެން ކުރަމުންދާ މުޒާހަރާ ރޭވި ކަމަށް ތުހުމަތު ކުރެވޭ ތިން ދަރިވަރުން ހޮސްޕިޓަލުގައި ފަރުވާ ހޯދަމުންދަނިކޮށް ހައްޔަރުކޮށްފި އެވެ.
ބަންގްލަދޭޝްގެ ކޮލެޖު ދަރިވަރުން އިސްނަގައިގެން އެ މުޒާހަރާތައް ފެށީ 1971 ގައި ޕާކިސްތާނާ ދެކޮޅަށް ހަނގުރާމަކުރި އެ ގައުމުގެ އަސްކަރިއްޔާގެ މީހުންނަށް ސަރުކާރުން ދޭ 30 ޕަސަންޓުގެ ވަޒީފާގެ ކޯޓާއާ ގުޅިގެންނެވެ.
ބަންގްލަދޭޝްގެ ނޫސްތަކުން ބުނީ އެ ތިން ދަރިވަރުން ހައްޔަރުކުރީ ގަދަކަމުން ހޮސްޕިޓަލުން ޑިސްޗާޖުކޮށްގެން ކަމަށާއި ނަމަވެސް ބަންގްލަދޭޝް ސަރުކާރުން އެ ދަރިވަރުންތައް ހައްޔަރުކުރިކަން ދޮގުކުރާ ކަމަށެވެ.
ބަންގްލަދޭޝްގެ ހޯމް މިނިސްޓަރު އަސަދުއްޒަމާން ހާން ވިދާޅުވީ އެ ތިން ދަރިވަރުން ފުލުހުންގެ ބެލުމުގެ ދަށަށް ގެންދިޔައީ ހިމާޔަތް ދިނުމަށް ކަމަށާއި އެ ދަރިވަރުންނަށް ނުރައްކާ އޮތް ކަމަށް އެ ދަރިވަރުން ބުނެފައިވާ ކަމަށެވެ.
ނަމަވެސް ފުލުހުންގެ ބެލުމުގެ ދަށަށް އެ ދަރިވަރުން ގެންޔުމާ ގުޅިގެން، އެ ދަރިވަރުންނަށް ހިމާޔަތް ލިބޭނެކަމާމެދު ގިނަ ބަޔަކު ދަނީ ސުވާލު އުފައްދަމުންނެވެ. އެއީ ފުލުހުންގެ އަނީޔާކޮށްގެން މިހާރު ވެސް ގިނަ ދަރުވަރުންތަކެއް މަރުވެފައިވާ ކަމަށް ތުހުމަތު ކުރެވޭތީ އެވެ.
ބަންގްލަދޭޝްގައި ކުރި މުޒާހަރާގައި މިހާތަނަށް 150 މީހުން ވަނީ މަރުވެފަ އެވެ. އޭގެ ތެރޭގައި ގިނައީ ދަރިވަރުންނެވެ. އަދި މުޒާހަރާއާ ގުޅިގެން ގިނަ ބަޔަކު ވަނީ ހައްޔަރުވެސް ކޮށްފަ އެވެ.
ބަންގްލަދޭޝްގެ މަސްރަހު ގޯސްވުމާ ގުޅިގެން އެ ގައުމުގައި މުވާސަލާތީ ހިދުމަތްތަކުގެ އިތުރުން އިންޓަނެޓުގެ ހިދުމަތް ވެސް ސަރުކާރުން ވަނީ މެދުކެނޑާލި އެވެ.
