ރިސޯޓުތަކާއި ވިޔަފާރިތަކުން ބިމު ކުއްޔާއި ޓެކްސްގެ ގޮތުގައި ދައްކަން ޖެހި ނުދައްކާ ހުރި ފައިސާގެ އަދަދު 13 ބިލިއަން ރުފިޔާ އަށް އަރާ ކަމަށާއި ކޯޓަށް ގޮސްގެން ވިޔަސް އެ ފައިސާ ހޯދާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ޒުވާނުންގެ މަރުކަޒުގައި ރޭ ބޭއްވި މިނިވަން ދުވަހުގެ ޖަލްސާގައި ރައީސް މުއިއްޒު ވިދާޅުވީ ދައުލަތަށް ލިބެންޖެހޭ އެ ފައިސާ މިދިޔަ ސަރުކާރުތަކުން ނުހޯދައި ދޫކޮށްލި ކަމަށާއި އެކަމަށް ލޯމަރާލުމަކީ އަދުލުވެރިވުމެއް ނޫން ކަމަށެވެ.
ނުލިބި ހުރި ފައިސާ
- ބިމު ކުލި: 513 މިލިއަން އެމެރިކާ ޑޮލަރު
- ޓީޖީއެސްޓީ: 102 މިލިއަން އެމެރިކާ ޑޮލަރު
- ޖީއެސްޓީ 3.3 ބިލިއަން ރުފިޔާ
- ކޯޕަރޭޓް އިންކަމް ޓެކްސް: 1 ބިލިއަން ރުފިޔާ
"މި ފައިސާ އެކަނި ހޯދިޔަސް އަޅުގަނޑުމެންގެ ދަރަނީގެ މައްސަލަ ހައްލުވީ،" ސަރުކާރުގެ މާލީ ހާލަތު ގޯހުން ގޯހަށް ދާ ދަނޑިވަޅުގައި އެކަން ފޫބެއްދުމުގެ ގޮތުން ފައިސާ ހޯދަން ފަށާފައިވާ މަސައްކަތާ ގުޅޭ ގޮތުން ރައީސް ވިދާޅުވި އެވެ.
އެ ފައިސާ ހޯދަން ސިޓީ ފޮނުވަން ފަށާފައިވާ ކަމަށާއި މިދިޔަ ހަފުތާގައި ވެސް ބައެއް ފަރާތްތަކުން ފައިސާ ދެއްކި ކަމަށް ރައީސް ވިދާޅުވި އެވެ. ލިބެން ހުރި އެ ފައިސާގެ ދެ ބައިކުޅަ އެއްބައި ކޯޓަށް ނުގޮސް ލިބޭނެ ކަމަށް ގަބޫލު ކުރެއްވޭ ކަމަށް އެ މަނިކުފާނު ވިދާޅުވި އެވެ.
"މިދެންނެވި ފައިސާ އިރާދަ ކުރެއްވިއްޔާ އަޅުގަނޑުމެން ގައުމުގެ އިގުތިސާދީ ސިޔާދަތު ޔަގީންކުރުމަށްޓަކައި ދަރަނިން ސަލާމަތްކުރުމަށްޓަކައި އަޅުގަނޑުމެން ހޯދާނަން. އަޅުގަނޑުމެން ބޭނުން ވަނީ ނިޒާމުގެ ތެރެއިން ކުރަންޖެހިފައި ހުރި ކަންކަން ދޫކޮށް ނުލައި ކުރަން،" އެ މަނިކުފާނު ވިދާޅުވި އެވެ.
އެމްއެމްޕީއާރުސީގެ ހިޔާނާތާއި ވައްކަންތަކުން ދައުލަތަށް ގެއްލުނު ފައިސާ ހޯދަން މިދިޔަ ސަރުކާރުތަކުން ބިރު ގަތް ކަމަށާއި އެކަމަށް މި ސަރުކާރުން އެއްވެސް ބިރެއް ނެތް ކަމަށް ރައީސް މުއިއްޒު ވިދާޅުވި އެވެ.
"ގައިމުވެސް އަޅުގަނޑެއް ނުހުންނާނެ އެކަމުގައި އެންމެ ލޯލާރިއެއް ވެސް އެއިން އެއްވެސް ބޭފުޅަކު އަތުން އެއްވެސް ކަމެއްގައި ދުވަހަކުވެސް ހޯދާފައި. އެހެންވީމަ އަޅުގަނޑު ބިރު ގަންނަންޖެހޭ އެއްވެސް ކަމެއް ނެތެއް ނޫންތޯ. އެހެންވީމަ އެކަން ކުރާނަން،" އެ މަނިކުފާނު ވިދާޅުވި އެވެ.
އެމްއެމްޕީއާރުސީގެ ފައިސާ ހޯދަން އަދި ޖުމުލަކޮށް ގެއްލިފައިވާ ފައިސާ ހޯދުމަށް ގާނޫނެއް އެކުލަވާލުމުގެ މަސައްކަތް ކުރިއަށްދާ ކަމަށް ވެސް ރައީސް މުއިއްޒު ވިދާޅުވި އެވެ.
ކޮރަޕްޝަން ނައްތާލުމަށް އެހެން ބަޔަކު ނުކުރާ މިންވަރަށް މަސައްކަތް ކުރާނެ ކަމަށް ވިދާޅުވި
މި ސަރުކާރަށް އަދި ރައީސް ޑރ. މުހައްމަދު މުއިއްޒަށް ވެސް ކޮރަޕްޝަންގެ ތުހުމަތުތައް ކުރެވިފައިވެ އެވެ. ނަމަވެސް އެ މަނިކުފާނު ރޭ ދެއްވި ޔަގީން ކަމަކީ ވޭތުވެދިޔަ އެއްވެސް ސަރުކާރަކުން ނުކުރާ މިންވަރަށް ކޮރަޕްޝަން ނައްތާލަން މި ސަރުކާރުން މަސައްކަތް ކުރާނެ ކަމެވެ.
"ކޮރަޕްޝަން ނައްތާލުމަކީ އިގުތިސޯދު ހަރުދަނާ ކުރުމަށްޓަކައި އަދި ރަނގަޅު ގަވަނެންސް ނިޒާމެއް ގާއިމުކުރުމަށް މުހިއްމު ކަމެއް. ކޮރަޕްޝަން ނައްތާލުމަށް މި ސަރުކާރުން މަސައްކަތް ކުރާނަން ދުވަހަކު ރާއްޖޭގައި ނުކުރާ މިންވަރަށް. ދުވަހަކު ނުކުރާ މިންވަރަށް،" އެ މަނިކާނު ވިދާޅުވި އެވެ.
ދެފުށް ފެންނަ ޓްރާންސްޕޭރަންޓު ސަރުކާރެއް ގާއިމު ކުރާނެ ކަމަށާއި އެކަމަށްޓަކައި ފިނޭންސް މިނިސްޓްރީން އާންމު ފަރާތްތަކާއި ވިޔަފާރިތަކަށް ދައްކަންޖެހޭ ބިލްތަކުގެ ތަފްސީލްތައް އެންމެންނަށް ފެންނާނެ ގޮތް ވެސް ހަދާނެ ކަމަށް ރައީސް މުއިއްޒު ވިދާޅުވި އެވެ.
