މިނިވަން ދުވަހާ ގުޅުވައިގެން "ސައްބީސް އަށާވީސް" ނަމުގައި ހާއްސަ ހަރަކާތްތަކެއް ހއ. އިހަވަންދޫގައި ކުރިއަށް ގެންދަން ނިންމައިފި އެވެ.
އިހަވަންދޫ އެންމެ ގިނަ ދުވަސްވީ މަދަނީ ޖަމިއްޔާ، އިހަވަންދޫ މަސްވެރިންގެ ގުޅުން، "އިމަގު"ން ކުރިއަށް ގެންދާ މި ހަރަކާތްތަކަކީ އެ ޖަމިއްޔާއިން އިސްނަގައިގެން ތަރައްގީ ކުރަމުންދާ ޒަމާނީ ފެންވަރުގެ އައުޓް ޑޯ ވޮލީ ކޯޓު އިފްތިތާހުކުރުމުގެ ރަސްމިއްޔާތާ ގުޅުވައިގެން ކުރިއަށް ގެންދާ ހަރަކާތެކެވެ.
މި މަހުގެ 25 ވަނަ ދުވަހުގެ ރޭ ވޮލީ ކޯޓު އިފްތިހާހުކުރުމުގެ ހަފުލާ ކުލަ ގަދަކޮށް ކުރިއަށް ގެންދަން އެ ޖަމިއްޔާއިން ނިންމާފައިވަނީ އެއީ މިނިވަންދުވަހުގެ އުފަލުގައި އެ ޖަމިއްޔާއިން އެ ރަށުގެ ރައްޔިތުންނަށް ދޭ މިނިވަން އުފާ ހަދިޔާއެއް ކަމަށްވެފައި، ޖަމިއްޔާގެ 28 ވަނަ އަހަރީ އުފާ ފާޅުކުރުން އެ އުފަލާއާ ގުޅުވާލުމަށެވެ.
އިމަގު ޖަމިއްޔާ ފާހަގަވެފައިވަނީ މުޅި ތިލަދުންމަތިން ވެސް މަދަނީ ހިދުމަތުގައި ނަމޫނާ ދައްކަމުން ގެންދާ ޖަމިއްޔާއެއްގެ ގޮތުގައެވެ. އިހަވަންދޫގެ ތަރައްގީއަށް ހިންގާ ހަމަ ކޮންމެ ހަރަކާތެއްގައި ޝާމިލުވެ ބައިވެރިވެ އެއް ރޫހެއްގައި މަސައްކަތްކުރާ މަދަނީ ޖަމިއްޔާއެއްގެ ގޮތުގައެވެ. ކުޅިވަރާއި ފަންނުވެރިކަން ދިރުވާ އާލާކުރުމަށް ހިލޭ ސާބަހަށް މަސައްކަތްކުރާ ޖަމިއްޔާއެއްގެ ގޮތުގައެވެ.
އިމަގުގެ ހިދުމަތުގެ އަގުވަޒަންކޮށް ހއ. އަތޮޅު ކައުންސިލުން ދެއްވާ އަތޮޅުގެ އެންމެ ހިދުމަތްތެރި ޖަމިއްޔާގެ އިނާމު ހޯދާފައިވާ އިރު، ޖަމާއަތަށް ހިދުމަތްކުރުމުގެ ދާއިރާއިން ރައީސުލްޖުމުހޫރިއްޔާ ދެއްވާ ހިތްވަރު ދިނުމުގެ ގައުމީ އިނާމު ވެސް އިމަގުން ވަނީ ހާސިލުކޮށްފަ އެވެ. އަދި 2023ވަނަ އަހަރު ޔޫތު މިނިސްޓްރީން ދެއްވަން ފެއްޓެވި ސިވިލް ސޮސައިޓީ އެވޯޑްގެ ތައުލީމީ ދާއިރާއަށް ހިދުމަތްކުރުމުގެ ގިންތިން އެ އެވޯޑު ވެސް އެ ޖަމިއްޔާއިން ވަނީ ހާސިލުކޮށްފަ އެވެ.
