ވިދާ ގުގުރުމުގެ ހާދިސާތައް ވަގުތުން ވަގުތަށް ދެނެގަނެވޭނެ ލައިޓްނިން ޑިޓެކްޝަން ސިސްޓަމެއް ވެލާނާ އިންޓަނޭޝަނަލް އެއާޕޯޓާއި ގަން އިންޓަނޭޝަނަލް އެއާޕޯޓުގައި ގާއިމުކޮށްފި އެވެ.
މައި އެއާޕޯޓާއި ގަން އެއާޕޯޓުގައި މިކަމަށްޓަކައި ލޯންގްރޭންޖް ލައިޓްނިން ޑިޓެކްޝަން އިކުއިޕްމަންޓް ބަހައްޓާފައިވާއިރު، މިއީ ރާއްޖޭގައި ފުރަތަމަ ފަހަރަށް ގާއިމުކުރެވޭ މިފަދަ ނިޒާމެވެ.
މި މަސައްކަތް ކުރީ ޗައިނީސް އެކަޑެމީ އޮފް ސައިންގެ ދަށުން ހިނގަމުންދާ އިންސްޓިޓިއުޓް އޮފް އިލެކްޓްރިކަލް އިންޖިނިއަރިން އާއި މޯލްޑިވްސް މީޓިއޮރޮލޮޖިކަލް ސާވިސް ގުޅިގެންނެވެ.
އެންވަޔަރަމަންޓް މިނިސްޓްރީން މިކަމާ ގުޅޭ ގޮތުން ނެރުނު ނޫސް ބަޔާނެއްގައި ބުނި ގޮތުގައި، ރާއްޖޭގެ ނިޒާމު ސަރަހައްދީ ވިއުގައާ ގުޅާލުމުން ރާއްޖެ އާއި ރާއްޖޭގެ ވަށައިގެން ވާ ސަރަޙައްދަށް އަންނަ ވިދާ ގުގުރުމުގެ ހާދިސާތައް ވަގުތުން ވަގުތައް ދެނެގަނެވޭނެ އެވެ. އަދި މި ވިއުގަ އިތުރަށް ތަރައްގީކުރުމަށް ޝޯޓްރޭންޖް ލައިޓްނިންގް ޑިޓެކްޝަން އިކުއިޕްމެންޓް ހަރުކުރުމުގެ މަސައްކަތްވެސް އަދި ފަހުން ކުރިއަށް ގެންދެވޭނެ ކަމަށް އެ މިނިސްޓްރީން ބުންޏެވެ.
މިފަދަ ނިޒާމެއް މުހިންމު ވަނީ ކީއްވެކަން ސާފުކޮށްދެމުން އެންވަޔަރަމަންޓުން ބުނީ ވިދާ ގުގުރާ ހޮނު އެޅުމުގެ ސަބަބުން އެންމެ ގިނައިން ހަލާކުވަނީ އިލެކްޓްރިކް، އިލެކްޓްރޯނިކްސް އަދި މުވާސަލާތީ އާލާތްތައް ކަމަށެވެ. އަދި ބައެއް ފަހަރު އެހެނިހެން ތަކެއްޗަށާއި މުދަލާއި ފުރާނަޔަށް ބޮޑެތި ގެއްލުން ލިބިފައި ވާއިރު، ވައިގެ ދަތުރުފަތުރާއި ކަނޑު ދަތުރުގެ ސަލާމަތާއި ރައްކާތެރިކަމަށް ވެސް އޭގެ އަސަރު ކުރުވާ ކަމަށް ވެސް އެ މިނިސްޓްރީން ބުންޏެވެ.
ލައިޓްނިން ޑިޓެކްޝަން ނެޓްވޯކް އެއްކޮށް ގާއިމުކޮށް ނިމުމުން، ވިދާގުގުރުމުގެ އެކި މަރުހަލާތައް ތަފާތުކޮށް ވަގުތުން ބަލައިލެވޭނެ ކަމަށް ވެސް އެ މިނިސްޓްރީން ބުންޏެވެ. ހަމައެހެންމެ، ވިދުވަރާއި ގުޅިފައިވާ ކޮޅިގަނޑު ދަތުރުކުރާ މިސްރާބު ދެނެގަނެވި ކުރިއަށް ލަފާކުރުމާއި ދުރާލާ ދެވޭ އިންޒާރުގެ ސައްހަކަން އިތުރު ވެގެން ދާނެ އެވެ.
އޭގެ އިތުރުން ވައިގެ ދަތުރުފަތުރުގެ ސަލާމަތާއި ރައްކާތެރިކަމަށްޓަކައި، އިންޓަނޭޝަނަލް ސިވިލްއޭވިއޭޝަނާއި ރާއްޖޭގެ ސިވިލް އޭވިޝަން ރެގިއުލޭޝަން ނަމްބަރު 3 އާއި އެއްގޮތްވާގޮތުގެ މަތިން ނެރެންޖެހޭ މޫސުމީ ސަމާލު (SIGMET) އަދި ފޯކާސްޓް (TREND) ތަކުގެ އެކިޔުރެސީ ވަރަށްބޮޑަށް މަތިވެގެން ދާނެ ކަމަށް ވެސް އެންވަޔަރަމަންޓް މިނިސްޓްރީން ބުންޏެވެ.
