ބަންގްލަދޭޝްގައި ދަރިވަރުން އިސްނަގައިގެން ކުރިއަށްގެންދާ މުޒާހަރާއާ ގުޅިގެން ކާފިއު ހިންގައި، މަގުތަކަށް ސިފައިން ނެރެފި އެވެ.
އެ މުޒާހަރާ ދަރިވަރުން ކުރަމުންދަނީ 1971 ގެ ހަނގުރާމާގައި ބައިވެރިވި ބަންގްލަދޭޝް ސިފައިންގެ އާއިލާތަކަށް ސަރުކާރުގެ ވަޒީފާތަކުގެ 30 ޕަސެންޓު ދޭން ނިންމުމާ ގުޅިގެންނެވެ.
ބަންގްލަދޭޝްގައި ކުރަމުންދާ މުޒާހަރާތައް ހުއްޓުވުމަށް ފުލުހުންނާއި ސިފައިން މަސައްކަތް ކުރަމުން އައި ނަމަވެސް، ކުރަމުންދާ މުޒާހަރާތައް ވަނީ ވަރުގަދަކޮށްފަ އެވެ.
އެގޮތުން މަގުތަކަށް ނިކުމެ ޓްރާންސްޕޯޓާއި އެހެނިހެން ހިދުމަތްތަކަށް މުޒާހަރާގެ ބައިވެރިން އަންނަނީ ހުރަސް އަޅައި، އާންމު ހުރިހާ ހިދުމަތްތައް ހުއްޓުމަކަށް ގެންނަމުންނެވެ.
އެ މުޒާހަރާއާ ގުޅިގެން ބަންގްލަދޭޝްގެ ސަރުކާރުން މިހާތަނަށް ވެސް މުޒާހަރާގެ ބައިވެރިންނަށް އެދެވޭ ކަހަލަ ޖަވާބެއް ދީފައެއް ނުވެ އެވެ. އޭގެ ބަދަލުގައި ސަރުކާރަށް ތާއީދުކުރާ ސަޕޯޓަރުންނާއި ފުލުހުން އަދި ސިފައިން ވަނީ މުޒާހަރާގެ ބައިވެރިންނާ ކުރިމަތިލައި ހަމަނުޖެހުން ހިންގާފަ އެވެ.
ރިޕޯޓްތައް ބުނާގޮތުން މިހާތަނަށް މުޒާހަރާގައި މަރުވި މީހުންގެ އަދަދު 30 އަށް ވަނީ އަރާފަ އެވެ. އެއަށްވުރެ އަދަދު އިތުރުވާނެ ކަމަށް ވެސް ރިޕޯޓްތައް ބުނެ އެވެ.
ބަންގްލަދޭޝްގައި ވަޒީފާ ނެތް މީހުންގެ އަދަދު އިތުރުވެފައިވާ ދަނޑިވަޅެއްގައި، ސަރުކާރުގެ ވަޒީފާ ވަކި ބަޔަކަށް ދޭން ނިންމުމާ ގުޅިގެން އެ ގައުމުގެ ރައްޔިތުން އަންނަނީ ނުރުހުން ފާޅު ކުރަމުންނެވެ.
ބަންގްލަދޭޝްގައި ކޮންމެ އަހަރަކު ހަތަރު ލައްކަ ދަރިވަރުން ގްރެޖުއޭޓްވެ އެވެ. ނަމަވެސް އޭގެ ތެރެއިން ވަޒީފާ ލިބެނީ އެންމެ 3،000 ދަރިވަރުންނަށެވެ.
