ތިން މިނިސްޓަރަކު، ރަސްމީ ދަތުރެއްގައި މާދަމާ ޗައިނާއަށް ފުރާވަޑައިގަންނަވާ ގޮތަށް ހަމަޖެހިއްޖެ އެވެ.
މާދަމާއިން ފެށިގެން ހަތަރު ދުވަހުގެ މުއްދަތަކަށް ޗައިނާއަށް ކުރައްވާ އެ ދަތުރުފުޅުގައި ވަޑައިގަންނަވާ ވަޒީރުންނަކީ ފޮރިން މިނިސްޓަރު މޫސާ ޒަމީރު، ފިނޭންސް މިނިސްޓަރު ޑރ. މުހައްމަދު ޝަފީގު، އަދި އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބު އެވެ.
ފޮރިން މިނިސްޓްރީން ބުނީ އެއީ ޗައިނާގެ ފޮރިން މިނިސްޓަރު ހިޒް އެކްސެލެންސީ މިސްޓަރ ވަންގް ޔީގެ ދައުވަތަކަށް ފޮރިން މިނިސްޓަރާއި އަދި ދެ މިނިސްޓަރުން ކުރައްވާ ރަސްމީ ދަތުރެއް ކަމަށެވެ.
މި ދަތުރުގައި ފޮރިން މިނިސްޓަރު ޒަމީރު، ޗައިނާގެ ފޮރިން މިނިސްޓަރު ވަންގް ޔީއާ އެކު ރަސްމީ މަޝްވަރާތަކެއް ކުރެއްވުމަށް ހަމަޖެހިފައިވާއިރު، ސަރުކާރުގެ އިސްވެރިންނާ ބައްދަލުކުރައްވާނެ އެވެ.
ރާއްޖޭގެ އިގްތިސާދީ ކުރިއެރުމުގައި އިސް ދައުރެއް އަދާކޮށްފައިވާ ޗައިނާގެ މުހިންމު ކުންފުނިތަކާ އެކު މިނިސްޓަރު ޒަމީރު މަޝްވަރާ ކުރައްވާނެ ކަމަށް ވެސް ފޮރިން މިނިސްޓްރީން ބުންޏެވެ.
