އިންޓަނެޓް މެދުވެރިކޮށް އޮންލައިންކޮށް ދެމުންދާ ހިދުމަތްތައް މެދުކެނޑުމުގެ ސަބަބުން ދުނިޔޭގެ ބޮޑެތި ބޭންކްތަކާއި, އެއާލައިންތައް އަދި އެހެނިހެން ހިދުމަތްދޭ ކުންފުނިތައް ހުއްޓުމަކަށް އަތުވެއްޖެ އެވެ.
މިއީ މައިކްރޯސޮފްޓް ވިންޑޯސްއާ ގުޅިފައިވާ މައްސަލައެއް ކަމަށް ވަނީ މިހާރު ދެނެގަނެވިފަ އެވެ. އަދި, އެ މައްސަލަ ހައްލު ކުރުމަށް މަސައްކަތް ކުރަމުންދާ ކަމަށް މައިކްރޯސޮފްޓުން ވަނީ ބުނެފަ އެވެ.
މިކަމުގެ އަސަރު އެންމެ ބޮޑަށް ކޮށްފައިވަނީ އޮސްޓްރޭލިއާއަށެވެ. އެ ގައުމުގެ ފްލައިޓުތައް ގްރައުންޑް ކޮށްފައިވާއިރު ބޭންކުތަކުގެ ހިދުމަތެއް ވެސް ނުލިބެ އެވެ. މިކަމުގެ ސަބަބުން ވިޔަފާރި ކުރަން ވެސް ވަނީ ދަތިވެފަ އެވެ.
ދުނިޔޭގެ ބޮޑެތި އެއާޕޯޓުތަކުގެ ހިދުމަތްތަކަށް ވެސް ވަނީ ބުރޫއަރާފަ އެވެ. އޭގެ ތެރޭގައި ހޮންކޮން އެއާޕޯޓާއި ލޮސް އެންޖެލިސް އެއާޕޯޓު, އެމްސްޓަޑަމް އެއާޕޯޓް އަދި ބާލިން އެއާޕޯޓު ހިމެނެ އެވެ. އޭގެ އިތުރުން ވެސް ގިނަ އެއާޕޯޓުތަކުން ވަނީ މައްސަލަތައް ރިޕޯޓުކޮށްފަ އެވެ.
އެމެރިކާގެ އެކި ސްޓޭޓުތަކަށް ވެސް މިކަމުގެ އަސަރު ވަނީ ކޮށްފަ އެވެ. ބައެއް ސްޓޭޓްތަކަށް 911 ގެ ހިދުމަތް މެދުކެނޑިފައިވާއިރު ސުޕަމާޓުތަކުގެ ޕީއޯއެސް މެޝިންތައް ބޭނުން ނުކުރެވޭތީ ވިޔަފާރި ކުރަން ވަނީ ދަތިވެފަ އެވެ.
ލަންޑަން ސްޓޮކް އެކްސްޗޭންޖު ވެސް އެއްކޮށް ހުއްޓިފައިވާއިރު މި މައްސަލަތައް ހައްލު ކުރެވޭނެ އިރެއް އަދި ނޭނގެ އެވެ
