އައިޖީއެމްއެޗްގައި މަސައްކަތް ކުރި ނަރުސް މޭރީ ގްރޭސް މަރާލި މައްސަލާގައި ދައުލަތުން ހުށަހެޅި މުހިންމު ދެ ހެކިން ކަމަށްވާ ބޭރުގެ ދެ ޑޮކްޓަރުންގެ ހެކިބަސް ނެގުމަށް އިންޑިއާގެ އެކްސްޓާނަލް މިނިސްޓްރީން ހުއްދަ ނުލިބި ހެކިބަސް ނެގުމަށް ދަތިތަކެއް ކުރިމަތިވެއްޖެ އެވެ.
މޭރީގެ މަރުގެ މައްސަލައިގައި ދައުލަތުން ދައުވާ ކުރަނީ، އައިޖީއެމްއެޗްގައި ނަރުހުންގެ ގޮތުގައި މަސައްކަތް ކުރި، އޭނާގެ ފިރިމީހާ މާވިނާއި، މާވިންގެ ސިއްރު ލޯބިވެރިޔާ ކަމަށް ބުނާ ހަލީމަތު ލަމްހާގެ މައްޗަށެވެ. މަރާލުމުގެ ދައުވާ ކުރަނީ މާވިނަށެވެ. ލަމްހާއަށް ކުރަނީ މަރާލުމުގައި ބައިވެރިވުމުގެ ދައުވާއާއި ހުއްދަ ނޫން ބޭސްތަކެއް ނެގި ކަމުގެ ދައުވާ އެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމަށް ދެ ޑޮކްޓަރުންގެ ހެކިބަސް ނެގުމަށް ނިންމާފައިވީ ނަމަވެސް އިންޑިއާގެ އެކްސްޓާނަލް މިނިސްޓްރީން ހުއްދަ ނުލިބިގެން ޝަރީއަތަށް ހެކިބަސް ނެގޭ ގޮތެއް ނުވި އެވެ.
ރާއްޖޭން ބޭރުގައި ތިބޭ މީހުންގެ ހެކިބަސް ނަގަމުން އަންނަނީ އެ ގައުމެއްގައި ހުންނަ ރާއްޖޭގެ ޑިޕްލޮމެޓިކް މިޝަނަކަށް އެމީހަކު ހާޒިރުކޮށް، އޮންލައިންކޮށް ޝަރީއަތުގެ މަޖިލީހާ ގުޅާލައިގެންނެެވެ. އެ ކަމަށް އެ ގައުމުގެ ހުއްދަ ވެސް ނަގަން ޖެހެ އެވެ.
މިއަދުގެ އަޑުއެހުމުގައި، ޕްރޮސެކިއުޓަ ޖެނެރަލްގެ ވަކީލު އައިޝަތު ޝާމާ ނަސީރު ވިދާޅުވީ ގާނޫނީ ގޮތުން ބައެއް ކަންކަން ސާފު ކުރަން ރާއްޖޭގެ ފޮރިން މިނިސްޓްރީން ބޭނުންވާ ކަން ފާހަގަ ކޮށްފައިވާ ކަމަށެވެ. އެހެންވެ އެ ކަމަށް އެޓާނީ ޖެނެރަލްގެ އޮފީހުން ގާނޫނީ ލަފާ ހޯދުމަށް އެދިފައިވާނެ ކަމަށެވެ. އެހެން ނަމަވެސް މިއަދަށް ހެކިން ހާޒިރު ނުކުރެވެނީ އެޓާނީ ޖެނެރަލްގެ އޮފީހުން ދޭން ޖެހޭ ލަފާ އަދިވެސް ނުލިބޭތީ ކަމަސެވެ.
މޭރީ މަރުގެ މައްސަލަ
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. ފިލިޕީންސްގައި ވަރިކުރުމަކީ މަނާކަމެއް ގޮތުގައި އޮތް އިރު، ލަމްހާއާއި މާވިން އުޅުނީ ސިއްރު ލޯބީގެ ގުޅުމެއް ބާއްވައިގެން ކަމަށް ތުހުމަތު ކުރެ އެވެ.
އޮކްޓޯބަރު 19, 2021 ގައި ގްރޭސް ދަންޖެހިގެން މަރުވި ކަމަށް ބުނެ މާވިން ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު އިތުރަށް ހިންގަމުން ދިޔައީ އެވެ.
އަދި ގްރޭސް މަރާލި ކަމުގެ ތުހުމަތުގައި މާވިން ހައްޔަރު ކުރީ އެ އަހަރުގެ އޮކްޓޯބަރު 27 ގަ އެވެ. ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.
މާވިންގެ މައްޗަށް އެނގި ހުރެ މީހަކު މަރާލުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ކުރަނީ އެނގި ހުރެ މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
އޭގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް ލަމްހާގެ މައްޗަށް ކުރެ އެވެ. އެ ދައުވާތައް ލަމްހާގެ މައްޗަށް ކުރަނީ އައިޖީއެމްއެޗުން ހުއްދަ ނުނަގައި، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
މި ދައުވާތަކަށް އިންކާރުކޮށް ލަމްހާއާއި މާވިން ވަނީ ދިފާއީ ހެކިން ވެސް ހުށަހަޅައިފަ އެވެ.
