ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސާސް ކޮމިޓީއަށް އެންޓި ކޮރަޕްޝަން ކޮމިޝަނުގެ މެންބަރުން މިއަދު ހާޒިރުކޮށް ސުވާލު ކުރަން ނިންމައިފި އެވެ.
ރައްޔިތުންގެ މަޖިލީހުން ބުނީ އޭސީސީގެ މެންބަރުން އެސްއޯއީ ކޮމިޓީއަށް ހާޒިރު ކުރަނީ ސަރުކާރު ހިއްސާވާ ކުންފުނިތަކުގެ މައްސަލަ ބެލުމަށާއި އެ ކުންފުނިތައް ހަރުދަނާ ކުރެވޭނެ ގޮތަކާމެދު މަޝްވަރާ ކުރަން ކަމަށެވެ.
އެސްއޯއީ ކޮމިޓީގެ މުގައްރިރު، ވެރިކަން ހިންގާ ޕީއެންސީގެ އިބްރާހިމް ސުޖާއު ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ވިދާޅުވީ އޭސީސީގެ މެންބަރުން އެސްއޯއީ ކޮމިޓީއަށް ވަޑައިގެން އެ ކޮމިޓީއަށް މިއަދު "ޖަވާބުދާރީވެވަޑައިގަންނަވާނެ" ކަމަށެވެ.
އޭސީސީގެ މެންބަރުން އެސްއޯއީ ކޮމިޓީއަށް މިއަދު ހާޒިރު ކުރާއިރު އާންމުންގެ ފަރާތުން އެ ކޮމިޝަނަށް ވަރަށް ގިނަ ފާޑުކިޔުންތައް ދަނީ އަމާޒުވަމުންނެވެ. އެންމެ ބޮޑަށް ފާހަގަ ކުރެވޭ މައްސަލައަކީ ސަރުކާރަށް އަމާޒުވާ ކޮރަޕްޝަންގެ ތުހުމަތުތައް ނުބެލުމެވެ.
އެގޮތުން ރައީސް ޑރ. މުހައްމަދު މުއިއްޒުގެ ފަރާތުން ކޮންމެ މަހަކު ޕީއެންސީގެ މަޖިލިސް މެންބަރުންނަށް ދޭ ކަމަށް އޭގެ ތެރެއިން ބައެއް މެންބަރުން ވިދާޅުވާ ބައިލައްކަ ރުފިޔާގެ މައްސަލަ ވެސް ނުބަލާ ކަމަށް އޭސީސީން ވަނީ ބުނެފަ އެވެ.
ބައެއް އެސްއޯއީތަކުން ނުގަވާއިދުން ކުރާ ކަންކަން އޭސީސީން ނުބެލުމަކީ ވެސް ކަންބޮޑުވުމެކެވެ. އެގޮތުން އެމްޕީއެލްގެ ބައެއް މައްސަލަތައް ނުބަލައިގެން ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވެސް އެ ކޮންބޮޑުވުން ފާޅު ކުރި އެވެ.
