ކައިވެނީގެ ނަމުގައި 13 އަހަރުގެ ކުއްޖަކު ރޭޕް ކުރަމުންދިޔަ މައްސަލާގައި ދައުލަތުން ދައުވާކޮށްފައިވާ އިސްމާއިލް ހައްމާދުގެ މައްޗަށް ކުށް ސާބިތުވެ 14 އަހަރުގެ ޖަލު ހުކުމެއް އިއްވައިފި އެވެ.
ހައްމާދު އެ ކުއްޖާ ރޭޕްކުރިކަން ފަޅާއެރީ އޭނާ ބައިވެރިވި ދީނީ ހަރުކަށި ފިކުރުގެ ގްރޫޕެއްގެ ތެރޭގައި ހައްމާދަށް ހަމަލާދިން މައްސަލައެއް ފުލުހުން ތަހުގީގުކުރަމުން ދަނިކޮށެވެ. އޭރު އެ ކުއްޖާ ވަނީ ހައްމާދުގެ ދަރިއަކު ވިހާފަ އެވެ.
ފުލުހުން އޭރު ބުނި ގޮތުގައި 13 އަހަރުގެ ކުއްޖާ ވިހެއި ދަރިފުޅުގެ ޑީއެންއޭ ހާއްމާދާ ދިމާވެ އެވެ. ރޭޕްގެ ޝިކާރައަކަށްވި ކުއްޖާއަކީ ވެސް ހަރުކަށި ފިކުރުގެ ބޮޑެއްގެ ދަރިއެކެވެ.
ކްރިމިނަލް ކޯޓުން މިއަދު ހައްމާދަށް 14 އަހަރުގެ ހުކުމެއް އިއްވިއިރު އެއީ ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަށް އަމަލު ކުރުމުގެ ގާނޫނު އޮންނަ އެންމެ ބޮޑު އަދަބެވެ. އެފަދަ ކުށެއް ކުރާ މީހަކަށް އިއްވެނީ 10 އަހަރާއި 14 އަހަރާ ދެމެދުގެ ހުކުމެކެވެ.
ރ. މަޑުއްވަރިއަށް ނިސްބަތްވާ ހައްމާދު ފުލުހުން ހައްޔަރުކުރީ ނޮވެމްބަރު، 2019، ގައި ކަނޑުމަތީގައި ހިނގި ކުރިން އިޝާރާތްކުރި މާރާމާރީގެ ސަބަބުން އޭނާއަށް ލިބުނު އަނިޔާތަކަށް ފަރުވާދިނުމަށްފަހު ހޮސްޕިޓަލުން ދޫކޮށްލުމުންނެވެ. އެ ހަމަލާއިން ހައްމާދު ސަލާމަތްވީ އެ މީހުން ތިބި ދޯނިން ފުންމާލައިގެން ފަތާފައި އއ. މާޅޮހަށް އަރައިގެންނެވެ.
އެ މާރާމާރީގައި ހައްމާދުގެ ގައިގެ އެކި ތަންތަނަށް ވަޅިން ހަމަލާދިނީ، ރ. މަޑުއްވަރީ ބީޗްހައުސް، އިސްމާއިލް އާސިފެވެ. އޭނާ އަދިވެސް ހުރީ ބަންދުގަ އެވެ.
މީގެ ކުރިން ފުލުހުން އާންމުކުރި މައުލޫމާތުން އިނގޭ ގޮތުގައި ގޮތުގައި ހައްމާދު ހަރުކަށި ފިކުރުގެ ތެރެއަށް ވަނީ އެހެން ކުށެއްގައި އިއްވި ޖަލު ހުކުމެއް ތަންފީޒުކުރުމަށް ޖަލުގައި ބަންދުވެ އުޅުމެގެ ތެރޭގަ އެވެ.
ހައްމާދު، އެންމެ ފުރަތަމަ ޖަލަށްލީ 2012 ގައި ވީޓީވީ އަށް ގެއްލުންދީގެންނެވެ. އެ ހުކުމުން މިނިވަންވެފައި ހުއްޓައި ސެޕްޓެމްބަރު، 22، 2019 ގައި މާފުށީ ޖަލަށް ގިނަ އަދަދެއްގެ ފޯނާއި އެހެން ތަކެތި ވައްދަން އުޅޭކަމުގެ މައުލޫމާތު ލިބިގެން ވެސް އޭނާ ހައްޔަރުކޮށްފައިވެ އެވެ.
ހައްމާދު އެންމެ ފަހުން ހައްޔަރުކޮށް، ކުށުގެ ރެކޯޑު ތަފްސީލްކޮށްދެއްވަމުން ޕޮލިސް ކޮމިޝަނަރު މުހައްމަދު ހަމީދު ރައްޔިތުންގެ މަޖިލީހުގެ ކޮމިޓީއެއްގައި ވިދާޅުވެފައި ވަނީ ޖަލުން ނުކުތް ފަހުން، ދީނީ ހަރުކަށި ފިކުރަށް ތަބާވެ ހަރަކާތްތައް ހައްމާދު ހިންގާ ކަަމަށް ތުހުމަތު އޮތް ކަމަށެވެ.
ނުރައްކާތެރި ހައްމާދު ޖަލުން ނުކުތްއިރު ހުރީ ދީނުގެ ނަމުގައި ހަރުކަށި ފިކުރުގައި މާ މާ ނުރައްކާ ލެވެލެއްގަ އެވެ.
ހައްމާދު ތަބާވަނީ، އެނގިފައިވާ ގޮތުގައި، އައިސިސް އަށެވެ. ހަރުކަށި ފިކުރުގެ ތެރެއިން "ޣަނީމާ މުދާ" ކަމަށް ކަނޑައަޅައި ބޮޑެތި ވައްކަންތަކުގައި ހައްމާދު ބައިވެރިވި ކަމުގެ ތުހުމަތުތައް އެބަހުއްޓެވެ.
