ސަރުކާރުގެ މަސް ކުންފުނި މިފްކޯއަށް ކިރާފައިވާ މަހަށް ދޭން ޖެހޭ 53 މިލިއަން ރުފިޔާ ޖަމާކުރަން ފަށައިފި އެވެ.
މިފްކޯއިން ބުނީ މަސްވެރިންނަށް މިދިޔަ ބުރާސްފަތި ދުވަހުގެ ނިޔަލަށް ދޭން ޖެހޭ ފައިސާ ފަށާފައިވާ ކަމަށެވެ. މި ފައިސާ ޖަމާކުރަން މިފްކޯއިން މި ފެށީ އެ ފައިސާ ނުދީގެން، މަސްވެރިން އަޑުއުފުލަމުން އަންނަތާ ގިނަ ދުވަސްތަކެއްވީ ފަހުންނެވެ.
މަހުގެ އަގަށް ގެނައި ބަދަލާ ގުޅޭ ގޮތުން ފިޝަރީޒް މިނިސްޓަރު އަހުމަދު ޝިޔާމް މިއަދު ނޫސްވެރިންނަށް ވިދާޅުވީ އަގަށް ގެނެވުނު ބަދަލާއެކު މަސްވެރިންނަށް މަދުވެގެން ދެ ހަފުތާ ތެރޭގައި ފައިސާ ޖަމާކުރުމަކީ އަމާޒެއް ކަމަށެވެ.
ހަމަ އެހެންމެ މިފްކޯގެ މާލީ ހާލަތަށް ރިއާޔަތްކޮށް ކުރިއަށް އޮތް ދޮޅު އަހަރު ތެރޭގައި މަސްވެރިންނަށް ސަރުކާރުގެ ވައުދާ އެއްގޮތަށް މަސް ކިރާތާ 48 ގަޑިއިރު ތެރޭގައި ފައިސާ ދޫކުރުމަކީ ވެސް އަމާޒެއް ކަމަށް ޝިޔާމް ވިދާޅުވި އެވެ.
ސަރުކާރުގެ ވައުދާ އެއްގޮތަށް 48 ގަޑިއިރު ތެރޭގައި ކިރާފައިވާ މަހަށް ފައިސާ ނުދޭތީ މަސްވެރިން އަންނަނީ އެކި ކަންކޮޅުގައި އިހުތިޖާޖު ކުރަމުންނެވެ. އަދި ވަކި އުސޫލެއްގެ ތެރެއިން ފައިސާ ދޫކުރަން މަސްވެރިން އެދިފައިވެ އެވެ.
މިފްކޯއިން ވަނީ އެ ކުންފުންޏަށް ގަނޑުކުރި މަސް ކިލޯއެއް 16ރ. އަށް ގަނޑު ނުކުރާ މަސް ކިލޯއެއް 14ރ. އަށް ގަންނަން ފަށާފަ އެވެ.
އަގަށް ގެނައި ބަދަލަށް މިފްކޯގެ މެނޭޖުމަންޓުން ވެސް ތާއީދުކޮށްފައިވާއިރު، ފިޝަރީޒް މިނިސްޓްރީން ދެކެނީ މިއާ ގުޅިގެން މިފްކޯ ހަމައަކަށް އެޅުމުގެ އިތުރުން މަސްވެރިކަމުގެ ސިނާއަތުގައި ހަރަކާތްތެރިވާ އަމިއްލަ ކުންފުނިތަކުގެ ވިޔަފާރިތައް ދެކޮޅު ޖައްސާ ފައިދާ ނެރެން ވެސް ފަހި ވެގެން ދާނެ ކަމަށެވެ.
