ސަރުކާރުގެ އަމާޒަކީ މަސް ދޯނިފަހަރުން މިފްކޯއަށް ކިރާ ކަނޑު މަހަށް ލަސްވެގެން ދެ ހަފުތާ ތެރޭގައި ފައިސާ ދޫކުރުން ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.
ނޫސްވެރިންނާ އެކީ ބޭއްވި ނުރަސްމީ ބައްދަލުވުމެއްގައި މައުލޫމާތު ދެއްވަމުން ޝިޔާމް ވިދާޅުވީ މިފްކޯއިން މިއަދުން ފެށިގެން މަސް ގަންނާނީ ބައިނަލްއަގުވާމީ ބާޒާރުގައި އަގުތައް ހުރި ގޮތަށް ބެލުމުގެ އިތުރުން އެކްސްޕޯޓު ކުރުމަށް ހިނގާ ހަރަދަށް ރިއާޔަތްކުރުމަށްފަހު ކަމަށެވެ.
"އަމާޒަކީ މި ގެނެވޭ ބަދަލާއެކު، ދެ ހަފުތާ ތެރޭގައި ފައިސާ ދިނުން،" ޝިޔާމް ވިދާޅުވި އެވެ.
ޝިޔާމް ވިދާޅުވީ ކޮންމެ ހަފުތާއަކު މިފްކޯއިން މަސް ގަންނަ އަގުތައް ކޮންމެ އެ ހަފުތާއެއްގައިއިއުލާން ކުރާނެ ކަމަށާއި ބައިނަލްއަގުވާމީ މާކެޓަށް ރިއާޔަތް ނުކޮށް މަސް ގަތުމުން ކުންފުންޏަށް މާލީ ގޮތުން ގެއްލުންވަމުންދާ ކަމަށެވެ.
ނަމަވެސް މި ސަރުކާރުން ވެރިކަމަށް އައުމުގެ ކުރިން މަސްވެރިންނަށް ވެފައިވާ ވައުދަކީ ކިރާ މަހަށް 48 ގަޑިއިރު ތެރޭގައި ފައިސާ ދޫކުރުން ކަމަށްވާތީ، މަސްވެރިން އަންނަނީ އެ ވައުދު ފުއްދުމަށް ސަރުކާރަށް ގޮވާލަމުންނެވެ.
އެކަމާ ގުޅޭގޮތުން ޝިޔާމް ވިދާޅުވީ ސަރުކާރުގެ އަމާޒަކީ މާލީ ގޮތުން މިފްކޯއަށް ފައިދާވާ މިންވަރަށް ބަލައި, ކުރިއަށް އޮތް ދޮޅު އަހަރު ތެރޭގައި މިފްކޯއަށް ކިރާ މަހަށް 48 ގަޑިއިރު ތެރޭގައި ފައިސާ ދޫކުރުމުގެ އަމާޒަށް ވާސިލުވުން ކަމަށެވެ.
ބަދަލާއެކު މިފްކޯއަށް ގަނޑުކުރި މަސް ގަންނަ އަގު
1.5 ކިލޯއަށް ވުރެ ބަރު މަސް - ކިލޯއަކަށް 16ރ.
1.5 ކިލޯ ހަމަނުވާ މަސް - ކިލޯއަކަށް 7ރ.
ބަދަލާއެކު މިފްކޯއަށް ގަނޑު ނުކުރާ މަސް ގަންނަ އަގު
1.5 ކިލޯއަށް ވުރެ ބަރު މަސް - ކިލޯއަކަށް 14ރ.
1.5 ކިލޯ ހަމަނުވާ މަސް - ކިލޯއަކަށް 5ރ.
މިފްކޯއިން މީގެ ކުރިން ބުނެފައިވާ ގޮތުގައި މަސް ގަނެވޭނެ އެންމެ ބޮޑު އަގަކީ 12ރ. ކަމަށާއި އެހެންކަމުން އެއަށްވުރެ ބޮޑު އަގެއް ކަނޑައަޅައިފި ނަމަ ސަރުކާރުން ސަބްސިޑައިޒް ކުރާނެ އެވެ. އެގޮތުން މިހާރު އިއުލާން ކޮށްފައިވާ އަގުގެ 3ރ. ސަރުކާރުން ސަބްސިޑައިޒް ކުރަން ޖެހޭނެ އެވެ.
