ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ "ގާތްވުމަށް" ސިހުރު ހެދިކަމުގެ ތުހުމަތުގައި ހައްޔަރުކޮށްފައިވާ ސްޓޭޓް މިނިސްޓަރު ޝަމްނާޒް އަލީ ސަލީމްގެ ކުރީގެ ފިރިމީހާ މިނިސްޓަރު އާދަމް ރަމީޒް، ޝަމްނާޒް ވަރި ކުރީ ޓެކްސްޓް މެސެޖަކުން ކަމަށާއި ކޯޓަށް ހުށަހެޅިތާ ދެ ދުވަސް ތެރޭ ވަރި ސާބިތުވިކަން އެނގިއްޖެ އެވެ.
މި ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި އާދަމް ރަމީޒު އޭނާގެ ކުރީގެ އަނބިމީހާ ޝަމްނާޒް ވަރި ކުރީ ޖޫން 10، ގަ އެވެ. އޭގެ ފަހުން ވަރި ސާބިތު ކުރަން ހުށަހެޅީ ޖެހިގެން އައި ޖޫން 11، ވަނަ ދުވަހެވެ. ޖޫން 13، ގައި ކޯޓުން ވަނީ ވަރި ސާބިތުކޮށްދީފަ އެވެ.
އެ މައްސަލައިގައި އާދަމް ރަމީޒު ކޯޓަށް ހާޒިރުވެ ހަމަޖައްސާފައި ވަނީ ބަދަލުގައި ދާނެ މީހެކެވެ. ޝަމްނާޒު ވެސް ކޯޓަށް ހާޒިރެއް ނުވެ އެވެ. އެކަމަކު، ކޯޓަށް ދާން ކިޔާފައިވާ ދުވަހަށް ކޯޓަށް ނުދެވޭނެތީ އެކަން އީމެއިލަކުން އަންގާފައިވާނެ ޝަމްނާޒުގެ އާއިލާއިން ބުނެ އެވެ.
ޝަމްނާޒްގެ ބަހެއް ޝަރީއަތަށް ލިބިފައިނުވާތީ ވަރި ސާބިތު ކުރިއިރު، އޭނާ ހުރީ ހަށިހުސްކޮށްކަން ނުވަތަ މާބަނޑު ހާލަތުގައިކަން އެނގެން ނެތް ކަމަށް ކޯޓުން ވަނީ ނިންމައިފަ އެވެ. އެ މައްސަލައިގައި ހުކުމްކޮށްފައި ވަނީ އާއިލާއާ ބެހޭ ކޯޓުގެ އިސް ގާޒީ އިބްރާހިމް މާހިރެވެ.
ޝަމްނާޒްގެ ވަރި ސާބިތު ކުރުމުގެ މައްސަލަ އާއިލާއާ ބެހޭ ކޯޓުން ތިން ދުވަހުގެ ތެރޭގައި ނިންމިއިރު، ވަރި ސާބިތު ކުރަން ހުށަހަޅާ މައްސަލަތައް އެހާ އަވަހަށް މީގެ ކުރިން ނިންމާކަން އެނގިފައެއް ނުވެ އެވެ. މި ނޫހަށް މައުލޫމާތު ދިން ބައެއް މީހުން ބުނެފައި ވަނީ ވަރި ސާބިތު ކުރަން މަދުވެގެން ހަފުތާއެއް ނަގާ ކަމަށެވެ.
ސިހުރު ހެދި ކަމަށް ތުހުމަތުކޮށް ޝަމްނާޒް އާއި އޭނާގެ އެއްބަނޑު އެއްބަފާ ކޮއްކޮއަކު އަދި ސިހުރު ހެދި ކަމަށް ބުނާ މީހަކު ހައްޔަރު ކުރީ މިދިޔަ އާދީއްތަ ދުވަހެވެ. އޭގެ ކުރިން ޝަމްނާޒް ދިރިއުޅެމުންދިޔަ ގެ ކޯޓު އަމުރެއްގެ ދަށުން ފުލުހުން ބަލައި ފާސް ކުރި އެވެ. އަދި އެގެއިން ބައެއް ތަކެތި ވެސް ފުލުހުން ގެންދިޔަ އެވެ. ޝަމްނާޒުގެ ފޯނު ވެސް އޮތީ ފުލުހުންގެ ބެލުމުގެ ދަށުގަ އެވެ.
ޝަމްނާޒް ކުރިން މަސައްކަތް ކުރެއްވީ ރައީސުލްޖުމްހޫރިއްޔާގެ ގަނޑުވަރު މުލީއާގޭގަ އެވެ. ނަމަވެސް މިފަހުން އޭނާ ވަނީ ތިމާވެއްޓާ ބެހޭ މިނިސްޓްރީއަށް ބަދަލުކޮށްފަ އެވެ.
ރައީސް މުއިއްޒުއާ ގާތްވުމަށް ސިހުރުު ހެދިކަމުގެ ތުހުމަތުގައި ޝަމްނާޒް ހައްޔަރު ކުރިއިރު، އޭނާގެ ކުރީގެ ފިރިކަލުން އާދަމް ރަމީޒު "އެކަހެރި" ކޮށްފައިވާކަމުގެ އަޑުތައް ވަނީ ގިނަވެފަ އެވެ. ރައީސް މުއިއްޒުއާ ވަރަށް ގާތްކޮށް މަސައްކަތް ކުރެއްވި އާދަމް ރަމީޒް، ރައީސްއާ އެއްކޮށް ނުފެންނަތާ މަސްތަކެއްވެއްޖެ އެވެ.
ޝަމްނާޒް ހައްޔަރު ކުރިއިރު، އޭނާގެ ތިން ކުދިން ތިބެ އެވެ. އޭގެ ތެރޭގައި އުމުރުން ދެ އަހަރު ނުފުރޭ ތުއްތު ކުއްޖަކު ވެސް ހިމެނެ އެވެ.
