ކިންގްސްޓައުން، ސެއިންޓް ވިންސެންޓް (ޖޫން 25) - މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގެ ސެމީ ފައިނަލުން އިންޑިއާ އާއި އަފްގާނިސްތާނުން ޖާގަ ހޯދިއިރު، އޮސްޓްރޭލިއާ ކަޓައިފި އެވެ.
ސުޕަ އެއިޓްސްގެ ގްރޫޕް އެކެއްގެ ފަހު މެޗުތައް ރޭ ކުޅުނުއިރު، އިންޑިއާ އިން ވަނީ 24 ލަނޑުން އޮސްޓްރޭލިއާ ބަލިކޮށްފަ އެވެ. އެ މެޗުގައި އިންޑިއާގެ ތަރި އަކީ 92 ލަނޑު ހެދި ޓީމުގެ ކެޕްޓަން، ރޯހިތު ޝަރްމާ އެވެ.
އެ ގްރޫޕްގެ ފަހު މެޗުން، އަފްގާނިސްތާނުން ވަނީ ޑީއެލްއެސް މެތަޑުން ބަލައިގެން، އަށް ލަނޑުން ބަންގްލަދޭޝް ބަލިކޮށްފަ އެވެ.
ގްރޫޕް އެކެއްގެ ތާވަލަށް ބަލާއިރު، އިންޑިއާ ވަނީ ތިން މެޗުން ވެސް މޮޅުވެ، ހަ ޕޮއިންޓް ހޯދައިފަ އެވެ. އަފްގާނިސްތާނުން ދެ މޮޅާ އެކު، ހަ ޕޮއިންޓް ހޯދިއިރު، އޮސްޓްރޭލިއާ އަށް އެއް މޮޅާ އެކު، ލިބުނީ ދެ ޕޮއިންޓެވެ. ބަންގްލަދޭޝް ކެޓީ ސުޕަ އެއިޓްސްގައި މޮޅެއް ނުލިބި އެވެ.
މިއީ، 2010 ވަނަ އަހަރުން ފެށިގެން ކްރިކެޓްގެ ބޮޑު މުބާރާތްތަކުގައި ވާދަކުރަން ފެށި ފަހުން އަފްގާނިސްތާނަށް ލިބުނު ބޮޑު ކާމިޔާބެކެވެ. އެ ޓީމުން ސެމީ ފައިނަލުގައި ކުޅޭނީ، ދެކުނު އެފްރިކާއާ ދެކޮޅަށެެވެ. އެ މެޗު އޮންނާނީ، މާދަމާ އެެވެ.
ބުރާސްފަތި ދުވަހު ދެ ވަނަ ސެމީ ފައިނަލުގައި އިންޑިއާ އިން ކުޅޭނީ އިންގްލެންޑާ އެެވެ. އިންގްލެންޑަކީ އެންމެ ފަހުގެ ޗެމްޕިއަން އެވެ. އެ ޓީމުން ތަށި ހޯދީ 2022 ވަނަ އަހަރު އޮސްޓްރޭލިއާ އިން ހޯސްޓްކުރި ޓީ20 ވޯލްޑް ކަޕް ފައިނަލުގައި ޕާކިސްތާން ބަލިކޮށްފަ އެވެ.
