މީގެ ހަތް އަހަރު ކުރިން، 20 މާޗް 2015 ވަނަ ދުވަހުގެ ރޭ މުންޑޫ ވަގުތީ ހިޔާގޭ ކައިރިން ހިނގާފައި ދަނިކޮށް ލ. މުންޑޫ، ނޫވިލު، އަލީ ޒިޔަދަމް މަރާލުމުގެ ކުށުގައި އުމުރަށް ޖަލަށްލާން އަލީ ސިފާމްގެ މައްޗަށް ކުރި ހުކުމް މިއަދު ހައި ކޯޓުގައި އިސްތިއުނާފު ކޮށްފި އެވެ.
އެ މައްސަލާގައި މިއަދު ހައި ކޯޓުގައި ބޭއްވި އަޑުއެހުމުގައި ސިފާމްގެ ފަރާތުން އެދުނީ ހުކުމް ބާތިލުކޮށް ދިނުމަށެވެ.
އަދި ކްރިމިނަލް ކޯޓުން, ސިފާމްގެ މައްޗަށް ކުށް ސާބިތިކުރުމުގައި ގާނޫނުލްއުގޫބާތުގެ 30 ވަނަ މާއްދާއަށް ރުޖޫއަވެ, ކުށުގެ އުންސުރުތައް ސާބިތުކޮށްފައިވާއިރު އަދަބު ކަނޑައަޅަން ޖެހޭނީ އެ ގާނޫނު 1002 ވަނަ މާއްދާގައިވާ އަދަބު ކަނޑައެޅުމުގެ ތާވަލާ އެއްގޮތަށް ކަމަށް އޭނާގެ ވަކީލު ފާހަގަ ކުރެއްވި އެވެ.
ދައުވާއަށް ޖަވާބު ދެމުން ދައުލަތުން ބުނީ, މި މައްސަލައިގައި ދަށު ކޯޓުން ގޮތް ކަނޑައަޅާފައި ވަނީ ބިރުދެއްކުމާއި, ތޫނު އެއްޗެއް ގެންގުޅުން މަނާ ކުރާ ގާނޫނުގެ 5 ވަނަ މާއްދާގެ ބ އަށް ކަމަށެވެ. އަދި ގާނޫނުލްއުގޫބާތުގެ 30 ވަނަ މާއްދައިގެ ބޭނުން ހިފީ ބިރު ދެއްކުމާއި, ތޫނު އެއްޗެއް ގެންގުޅުން މަނާ ކުރާ ގާނޫނުގައި ބައިވެރިވުމަކީ ކޮބާކަން ތަފްސީލީ ގޮތެއްގައި މާނަކޮށްފައި ނުވާތީ, މާނަ ކުރުމުގެ ވަސީލަތެއްގެ ގޮތުގައި ކަމަށެވެ.
ތޫނު އެއްޗެއް ގެންގުޅުން މަނާ ކުރާ ގާނޫނުގެ 25 ވަނަ މާއްދާ ތަތުބީއު ކުރުމުގައި ދަށު ގޯހެއް ހެދި, އެ ގާނޫނުގެ 5 ވަނަ މާއްދައިގެ ޅގެ ދަށުން އަދަބު ކަނޑައަޅާފައިވާ ކަމަށް ސިފަމްގެ ފަރާތުން ފާހަގަކޮށްފައި ނުވެ އެވެ. ނަމަވެސް ދަށު ކޯޓުގެ ފަނޑިޔާރުން ހައްދަވާފައިވާ ގޯހަކީ ކޮބައިކަން ތަފްސީލުކޮށް ބަޔާންކޮށްފައި ނުވާ ކަމަށް ދައުލަތުން ބުނެ އެވެ,
ދައުލަތުން ބުނީ ސިފާމްގެ މައްޗަށް އަދަބު ކަނޑައަޅަން ޖެހޭ ކަމަށް ބުނެ އޭނާގެ ފަރާތުން ފާހަގަކުރި ނުކުތާއަކީ ގާނޫނީ އަސާސެއް ނުވަތަ ބަހުސެއް ނެތް ނުކުތާއެއް ކަމަށެވެ. އަދި މައްސަލަ ނިންމުމުގައި ދަށު ކޯޓުން ގޯހެއް ހަދާފައިވާ ކަމަށް ބުނާ ނުކުތާއަކީ މުޅިން ހަމަޖެހޭ ނުކުތާއެއް ނޫން ކަމަށެވެ.
މި މައްސަލާގައި ދައުލަތުން އެދުނީ ސިފާމްގެ މައްޗަށް ކަނޑައަޅާފައިވާ ހުކުމް ބަދަލުކުރަންޖެހޭ ސަބަބެއް އިސްތިއުނާފު ކުރާ ފަރާތަށް ދެއްކިފައި ނުވާ ކަމަށް ކަނޑައަޅައި ދިނުމަށެވެ.
މިއަދު ބޭއްވި އަޑުއެހުމުގައި އިސްތިއުނާފީ ނުކުތާތަކާ ބެހޭގޮތުން އަދި ޖަވާބާ ގުޅޭގޮތުން ވާހަކަ ދެއްކުމުގެ ފުރުސަތު ދެ ފަރާތަށް ދިނުމަށްފަހު އަޑުއެހުން ނިންމަވާލައްވަމުން ފަނޑިޔާރުންގެ ބެންޗުން ވިދާޅުވީ, މައްސަލަ ދިރާސާ ކުރުމުގެ ތެރޭގައި އިތުރު ކަމެއް ނެތް ނަމަ ދެން އޮންނާނީ މި މައްސަލައިގައި ޝަރީއަތުން ގޮތް ނިންމުން ކަމަށެވެ.
ދަށު ކޯޓުގައި މައްސަލަ ހިނގައި ދިޔަ ގޮތް;
ޒިޔަދަމަށް މަސް ކަނޑާ ވަޅިއަކުން ހަމަލާ ދިން ދެ މީހުން ކަމަށްވާ އަލީ ސިފާމާއި މުހައްމަދު ޝަނޫނަކީ ވެސް އެ ރަށަށް ނިސްބަތްވާ ދެ މީހުންނެވެ. އޭގެ ތެރެއިން ޝަނޫންގެ މައްޗަށް ޒިޔަދަމް މަރާލުމުގެ ކުށް ސާބިތުވި އިރު، ސިފާމްގެ މައްޗަށް މަރާލުމުގައި ބައިވެރިވުމުގެ ކުށް ވަނީ ސާބިތުވެފަ އެވެ. މި މައްސަލާގައި ޝަނޫންގެ މައްޗަށް ކުރީ މަރުގެ ހުކުމެވެ.
މި މައްސަލާގައި ކްރިމިނަލް ކޯޓުގައި ބޭއްވި އަޑުއެހުމެއްގައި، ދައުލަތުން ހުށަހެޅި ސިއްރު ހެކިވެރިއެއް ބުނާ ގޮތުން ޒިޔަދަމް މަރާލުމުގެ ކުރިން ހޫނު ގަދަ ޒުވާބެއް ހިނގި ކަމަށް ވެއެވެ. އަދި އެ ޒުވާބު ހިނގާ ދިޔައީ ސިފާމްގެ ކޮއްކޮ އާއި ޒިޔަދަމާ ދެމެދު ހިނގި ކަންތައްތަކެއްގެ ސަބަބުންކަން އެނގޭ ކަމަށް ވެސް އެ ހެކިވެރިޔާ ބުންޏެވެ.
އޭނާ ބުނާ ގޮތުން ޒިޔަދަމް މަރާލާފައި އޮއްވާ ފެނުނީ ޒިޔަދަމްގެ ޅިޔަނުގެ ގޭގެ ބަދިގެ ތެރެއިންނެވެ.
އެ ގޭގެ ބަދިގެއިން އޭނާގެ ހަށިގަނޑު ނަގައިގެން ސިއްހީ މަރުކަޒާ ހަމައަށް ގެންދިޔައިރު ވެސް ހެކިވެރިޔާ ހުރި ކަމަށާއި ސިއްހީ މަރުކަޒު ކައިރިން މައްސަލައިގައި ތުހުމަތު ކުރެވޭ ޝަނޫނު ފެނުނު ކަމަށާއި އޭނާ އެތަނުގައި ވަރަށް އަޑުގަދަކުރި ކަމަށް ހެކިބަސް ދެމުން އޭނާ ކިޔައިދިނެވެ. އަދި ޝަނޫނުގެ ސޯޓުގައި އާއި އަތުގައި އެވަގުތު ލޭ ހުރިތަން ފެނުނު ކަމަށް ވެސް ހެކިވެރިޔާ ބުންޏެވެ.
ހާދިސާ ހިނގި ކަމަށް ބުނާ ތަނުން ޒިޔަދަމްއާއި ޝަނޫންގެ ލޭ ވެސް ފެނިފައިވެ އެވެ. ޒިޔަދަމަށް ހަމަލާ ދިނީ ޝަނޫން ކަމަށާއި، ޝަނޫނަށް އެ ކަމަށް އެއްބާރުލުން ދިނުމުގައި ސިފާމް ބައިވެރިވާ ކަން ސާބިތުވާ ކަމަށް ގާޒީ ޝަފީއު ވިދާޅުވެފައިވެ އެވެ.
