މަސްވެރިންނަށް ފައިސާ ނުދީ ސަރުކާރަށް ދެއްކޭނެ ބަހަނާއެއް ނެތް ކަމަށް އިދިކޮޅު އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެ އެވެ.
ޝާހިދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މަސްވެރިންގެ އަތުން ސަރުކާރުން މަސް ގަނެފައި ފައިސާ ނުދައްކައިފިނަމަ އެއީ ގޯހެއް ކަމަށާއި އެކަމުގައި ދެއްކޭނެ ބަހަނާއެއް ނެތް ކަމަށެވެ.
ބަޔަކު އަތުން އެއްޗެއް ގަނެފިނަމަ އެއްޗެއްގެ އަގު އަދާކުރުމަކީ ގަންނަ ބައެއްގެ ވާޖިބުކަން ފާހަގަކުރައްވާ ޝާހިދު ވިދާޅުވީ ފައިސާ ދިނުމަކީ އެއްޗެއް ގަންނަ ބައެއްގެ ހެޔޮކަމުން ނުވަތަ ދީލަތިކަމުން ކުރަން ޖެހޭ ކަމެއް ނޫން ކަމަށެވެ.
"އައްޑޫ މަސްވެެރިންނާއި އެހެނިހެން މަސްވެރިން އަތުން ގަނެފައިވާ މަހަށް ނުދައްކާހުރި ފައިސާ ދައްކާ ހަލާސް ކުރުމަށްސަރުކާރަށް ގޮވާލަން،" ޝާހިދު ވިދާޅުވި އެވެ.
ސަރުކާރު ކުންފުނި މިފްކޯއިން މަސްވެރިން އަތުން މަސް ގަތުމަށްފަހު ފައިސާ ނުދޭ މައްސަލަ ބޮޑުވެފައިވާއިރު، އެކަމާ ގުޅިގެން އައްޑޫ ސިޓީގައި މިހާރު ވެސް މަސްވެރިން އަންނަނީ މުޒާހަރާ ކުރަމުންނެވެ.
އީދު ބަންދަށް މިފްކޯއިން 46 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް އެ ކުންފުނިން މައުލޫމާތުދެ އެވެ. އަދި ބާކީ ފައިސާ ދޫކުރުމާއި މެދު ހެދޭނެ ގޮތެއް ބަލައި، ސަރުކާރާއެކު މަޝްވަރާކޮށްގެން އަވަސް ގޮތެއް ހޯދާނެ ކަމަށް އެ ކުންފުނިން ބުނެ އެވެ.
ނަމަވެސް މަސްވެރިން އަތުން ގަންނަ މަހަށް 48 ގަޑިއިރު ތެރޭގައި ފައިސާ ދޫކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދު މި ސަރުކާރަށް ނުފުއްދޭތީ މަސްވެރިން އަންނަނީ އެކަމާ ދެކޮޅަށް އަޑު އުފުލައި، ވައުދު ފުއްދުމަށް ގޮވާލަމުންނެވެ.
