ކިންގްސްޓައުން، ސެއިންޓް ވިންސެންޓް (ޖޫން 23) - އެމެރިކާ އާއި ވެސްޓް އިންޑީސްގައި މިހާރު ކުރިއަށްދާ ޓީ20 ވޯލްޑް ކަޕްގެ ސުޕަ އެއިޓްސްގެ ގްރޫޕް އެކެއްގައި ކުޅުނު މެޗުން އޮސްޓްރޭލިއާ 21 ލަނޑުން ބަލިކޮށް އަފްގާނިސްތާނުން ސެމީ ފައިނަލަށް ދަތުރުކުރުމުގެ އުންމީދު ދަމަހައްޓައިފި އެވެ.
ސުޕަ އެއިޓްސް ގްރޫޕް އެކެއްގައި އަފްގާނިސްތާން ވަނީ ކުޅުނު ފުރަތަަމަ މެޗުން އިންޑިއާ އަތުން 47 ލަނޑުން ބަލިވެފަ އެވެ. މޮޅުވާން މަޖުބޫރު މެޗަކަށް ނުކުމެ، އަފްގާނިސްތާނުން ވަނީ އޮސްޓްރޭލިއާގެ މައްޗަށް ބޮޑު މޮޅެއް ހޯދައިފަ އެވެ.
މެޗުގައި ޓޮސް ދިމާވުމުން، އޮސްޓްރޭލިއާ އިން ނިންމީ ފީލްޑް ކުރުމަށެވެ. އަފްގާނިސްތާނުން ކުޅެން އަރައި 20 އޯވަރުގެ ތެރޭގައި، ހަ ކުޅުންތެރިން ނުބައިވެގެން 148 ލަނޑު ހެދި އެވެ. އެ ޓީމުން އެންމެ ރަނގަޅު ކުޅުމެއް ދެއްކީ، 49 މެޗުން 60 ލަނޑު ހެދި ރަހުމާނުﷲ ގުރްބާޒް އެވެ. އަދި އިބްރާހިމް ޒަރުދާން ވަނީ 48 ބޯޅައިން 51 ލަނޑު ހަދައިފަ އެވެ.
މި އިނިންގްސްގައި އޮސްޓްރޭލިއާގެ ޕެޓް ކަމިންސް ވަނީ ތިން ވިކެޓް ނަގައިފަ އެވެ.
ޖަވާބުގައި އޮސްޓްރޭލިއާ އިން ކުޅެން އަރައި، 19.2 އޯވަރުގެ ތެރޭގައި ހުރިހާ ކުޅުންތެރިން ނުބައިވިއިރު، ހެދުނީ 127 ލަނޑެވެ. އެންމެ ރަނގަޅަށް ކުޅުނީ، 41 ބޯޅައިން 59 ލަނޑު ހެދި ގްލެން މެކްސްވެލް އެވެ.
އަފްގާނިސްތާނުގެ ތަރި އަކީ މި އިނިންސްގައި ހަތަރު ވިކެޓް ނެގި ގުލްބަދިން ނައިބް އެވެ. އެ ޓީމުގެ ނަވީން އުލް ހައްގު ވަނީ ތިން ވިކެޓް ނަގައިފަ އެވެ.
ސުޕަ އެއިޓްސްގެ ގްރޫޕް އެކެެއްގެ އެއް ވަަނައިގައި އޮތީ ދެ މެޗުން މޮޅުވެ، ހަތަރު ޕޮއިންޓާ އެކު އެވެ. ދެ ވަނައިގައި އޮތް އޮސްޓްރޭލިއާ އާއި ތިން ވަނައިގައި އޮތް އަފްގާނިސްތާނަށް ވަނީ ދެ މެޗުން ދެ ޕޮއިންޓް ލިބިފަ އެވެ. އޮސްޓްރޭލިއާ ކުރީގައި އޮތީ ނެޓްރަންރޭޓުންނެވެ. މި ގްރޫޕްގެ ފުލުގައި އޮތީ، ދެ މެޗުން ބަލިވި ބަންގްލަދޭޝް އެެވެ.
