މާލޭ ވިޔަފާރިބަނދަރު ބޭރުގެ ކުންފުންޏަކަށް ކުއްޔަށް ދިނުމަކީ އިންޑިއާގެ ޖީއެމްއާރަށް ވެލާނާ އިންޓަނޭޝަނަލް އެއާޕޯޓް ކުއްޔަށްދިނުމާ އެއްފަދަ ކަމެއް ކަމަށް ސިފަކުރައްވައި، ސަރުކާރުގެ އެ ނިންމުމަށް ކުރީގެ ހޯމް މިނިސްޓަރު އުމަރު ނަސީރު ވަރަށް ބޮޑަށް ފާޑުވިދާޅުވެއްޖެ އެވެ.
އެމްޑީޕީގެ ފުރަތަމަ ވެރިކަމުގައި 2010 ވަނަ އަހަރު އިންޑިއާގެ ޖީއެމްއާރަށް ވެލާނާ އިންޓަނޭޝަނަލް އެއާޕޯޓް ދިނުމުން އެކަމާ ދެކޮޅަށް އޭރުގެ އިދިކޮޅު ފަރާތްތަކުން ބޮޑެތި މުޒާހަރާތައް ކުރި އެެވެ. މިހާރުގެ ސަރުކާރު ހިންގާ ޕީއެންސީގެ އަސްލަކީ އޭރުގެ އިދިކޮޅު ޕާޓީ ޕީޕީއެމް އެވެ.
ޖީއެމްއާރަށް އެއާޕޯޓް ކުއްޔަށް ދިނުމުގެ އެއްބަސްވުން ބާތިލު ކުރީ ކުރީގެ ރައީސް މުހައްމަދު ނަޝީދު 2012 ވަނަ އަހަރު އިސްތިއުފާ ދެއްވައި އެމްޑީޕީގެ ފުރަތަަމަ ސަރުކާރު ވެއްޓުމާ އެކު ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރުންނެވެ.
ސޯޝަލް މީޑިއާ ޕްލެޓްފޯމް 'ފޭސްބުކް' ގައި ކުރެއްވި ޕޯސްޓެއްގައި އުމަރު ވިދާޅުވީ މާލޭގެ ކަނޑުގެ ބަދަރާއި ތިލަފުށީ ކަނޑުގެ ބަނދަރު ބޭރުގެ ފަރާތަކަށް ދިގު މުއްދަތަށް ކުއްޔަށް ދިނުމުގެ މަޝްވަރާތަކެއް ސަރުކާރުން ކުރައްވަމުން ގެންދަވާތީ ނުހަނު ކަންބޮޑުވުން ފާޅުކުރައްވާ ކަމަށެވެ.
އެ ޕޯސްޓުގައި އޭނާ ވިދާޅުވީ "ދިވެހީންގެ އަމިއްލަ އެސެޓްތައް އެހެން ފަރާތްތަކަށް ދޫކޮށްލުމަކީ 'ދިވެހީންގެ ރާއްޖެ' އިން ކުރައްވައިގެން ވާނެ ކަމެއް ނޫން" ކަމަށެެވެ. "ދިވެހީންގެ ރާއްޖެ" އިން ކުރައްވަންވާނެ ކަމަކީ އެސެޓްތައް އުފައްދާ އެ ތަކެތި ދިވެހިންގެ އަތްމަތީގައި ބެހެއްޓުން ކަމަށް ވެސް އުމަރު ވިދާޅުވި އެވެ.
"މި ފަދަ އެސެޓްތައް ބޭރުގެ ފަރާތަކަށް ވިއްކާލުމާ، ދިގު މުއްދަތަށް ކުއްޔަށް ދިނުމަކީ ކަންކަން އަމިއްލަ އަށް ކުރަން ނުދަންނަ، ކަންނެތް މީހުންއުޅޭ ގައުމުތަކުންކުރާ ކަމެއް. މިއީ މާލޭގެ ވައިގެބަނދަރު ވިއްކާލުމަށް ކުރީގައި ކުރެވުނު މަސައްކަތްފަދަ އިގުތިސާދީ ގޮތުން ނުރައްކާތެރި މަސައްކަތެއް،" އުމަރު ވިދާޅުވި އެވެ.
އޭނާ ވިދާޅުވި ގޮތުގައި ވިޔަފާރި ބަނދަރު ކުއްޔަށް ދީފި ނަމަ އެކަމުގެ ސަބަބުން މުދަލުގެ އަގުބޮޑުވެ، ދިވެހި ވިޔަފާރިތަކަށް އެތައް ދަތިތަކާ ކުރިމަތިވާނެ އެވެ. ދައުލަތުގެ މި ފަދަ ސްޓްރެޓެޖިކް އެސެޓްތަކަކީ އަބަދުވެސް ދިވެހީންގެ އަތްމަތީގައި ބަހައްޓައިގެން ވީހާވެސް ހެޔޮ އަގުގައި ހިދުމަތް ދެވޭ ތަންތަނަށް ވާންޖެހޭނެ ކަަމަށް ވެސް އޭނާ ވިދާޅުވި އެވެ.
މާލޭ ވިޔަފާރި ބަނދަރުގެ ބަދަލުގަ ތިލަފުށީގައި ޓްރާންޝިޕްމަންޓް ބަނދަރު ތަރައްގީ ކުރުމަށް ޝައުގުވެރިވާ ބޭރުގެ ބައެއް ފަރާތްތަކާއެކު މަޝްވަރާ ކުރަމުންދާ ކަމަށް، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނީ މިމަހުގެ 18 ވަނަ ދުވަހު އެެވެ.
ސަރުކާރުން ވަނީ ތިލަފުށީގަ ބަނދަރު ތަރައްގީ ކުރުމަށް 20 ހެކްޓަރުގެ ބިމެއް ހަމަޖައްސައި ކޮންސެޕްޓް ޑިޒައިން އެކުލަވާލައިފަ އެވެ. ކުރީ ސަރުކާރުން ގުޅިފަޅުގައި އަޅަން ނިންމި ބަނދަރު ތިލަފުއްޓަށް ބަނދަލުކުރިކަން ރައީސް މުހައްމަދު މުއިއްޒު އިއުލާނު ކުރެއްވީ މި އަހަރުގެ ޖެނުއަރީ 4، ގަ އެވެ.
"އަދަދު" އަށް މައުލޫމާތު ލިބިފައިވާ ގޮތުގައި ތިލަފުށި ބަނދަރު ތަރައްގީ ކުރުމަށް އިންވެސްޓަރަކު ހޯދުމަށް، އެމްޕީއެލްގެ ސީއީއޯ މުހައްމަދު ވަޖީހް އިބްރާހިމް ދާދި ފަހުން ވަނީ ޕިލިޕީންސްއަށް ދަތުރެއް ކުރައްވާފަ އެވެ.
