މިއުނިކް (ޖޫން 22) - ޖަރުމަނުގައި މިހާރު ކުރިއަށްދާ ޔޫރޯ ފުޓްބޯޅަ މުބާރާތުގެ ސެކިއުރިޓީ އިންތިޒާމްތައް ހަމަޖައްސާފައިވާ ގޮތާ މެދު ޔުއެފާގެ ރައީސް ސްލޮވީނިއާގެ އަލެކްސަންޑަ ޗެފެރިން ހިތްހަމަޖެހުން ފާޅުކުރައްވައިފި އެެވެ.
މި ފަހަރުގެ ޔޫރޯގެ ސެކިއުރިޓީ ވަރުގަަދަ ކުރުމުގެ ގޮތުން، މުބާރާތުގައި ވާދަކުރާ 24 ގައުމުގެ ތެރެއިން 300 އެއްހާ ސެކިއުރިޓީ ތަޖުރިބާކާރުން، މުބާރާތް ބާއްވާ ގައުމު ޖަރުމަނުގައި ހަރަކާތްތެރިވެ އެވެ. އެ ފަރާތްތަކުން މަސައްކަތްކުރާނީ އިންޓަނޭޝަނަލް ޕޮލިސް ކޯޕަރޭޝަން ސެންޓަރު (އައިޕީސީސީ)އާ އެކުގައި އެ ކަމަށް ހާއްސަ ސެންޓަރެއްގަ އެވެ. އެ ސެންޓަރަށް ޔުއެފާގެ ރައީސް ޗެފެރިން ވަޑައިގެންނެވި އެވެ.
"އައިޕީސީސީގެ ކަންކަން މި ހުރީ އަހަރެން ހީކުރި ވަރަށް ވުރެ ވެސް މާ ރަނގަޅަށް. މިއީ ފަސޭހަ ވަޒީފާއެއް ނޫން. އުނދަގޫ ވަޒީފާއެއް ފަސޭހަވަނީ ހިދުމަތެއް ކޮށްދިނުމުގެ ގޮތުން ޝައުގުވެރިކަމާ އެކު ކަންކަން ކޮށްގެން، އެ މަންޒަރު އަހަންނަށް މި ތަނުން އެބަފެނޭ،" ޗެފެރިން ވިދާޅުވި އެވެ.
އޭނާ ވިދާޅުވީ ރަނގަޅު ސެކިއުރިޓީއަކާ ނުލައި، މުބާރާތް ކުރިއަށްނުދާނެ ކަމަށާއި އެކަމުގެ ކްރެޑިޓް ދޭން ޖެހޭނެ ބަޔަކީ، ޖަރުމަނު ފުލުހުންނާއި އައިޕީސީސީ ސެންޓަރުގައި މަސައްކަތްކުރާ ފަރާތްތައް ކަމަށެެވެ.
މިދިޔަ އަހަރު ޔުއެފާ އިން ވަނީ ޔޫރަޕިއަން ގްރޫޕް އޮފް ޕޮލިސިން ފުޓްބޯލް އެންޑް ނެޝަނަލް ފުޓްބޯލް އިންފޮމޭޝަން ޕޮއިންޓް އެކްސްޕާޓްސް (އެންއެފްއައިޕީ)އާ އެކު އެއްބަސްވުމެއްގައި ސޮއިކޮށްފަ އެވެ.
އޭގެ ބޭނުމަކީ، ޔޫރަޕްގެ އެކި ސަރަހައްދުގައި ކުޅޭ މެޗުތަކުގެ ސެކިއުރިޓީއާ ގުޅޭ މައުލޫމާތުތައް އެއްކޮށް ނަގަން ޖެހޭ ފިޔަވަޅުތައް އަވަހަށް ނަގައި، ސެކިއުރީޓީ ލެވަލް މައްޗަށް ޖައްސައިލުމެވެ. މި އެއްބަސްވުމުގެ ތެރެއިން މި ފަހަރުގެ ޔޫރޯގައި ވެސް ސެކިއުރީޓީގެ ކަންކަން އަންނަނީ ފުރިހަމަ ކުރަމުންނެވެ.
