ހެމްބާގް (ޖޫން 19) - ކްރޮއޭޝިއާ އަކީ ބައިނަލްއަގުވާމީ ބޮޑެތި ފުޓްބޯޅަ މުބާރާތްތަކުގެ "ސިންދްރެއްލާ" ގެ ގޮތުގައި ދެކޭތީ އެކަމާ އެ ޓީމުގެ ކޯޗު ޒްލަޓްކޯ ޑާލިޗް ހިތްހަމަނުޖެހުން ފާޅުކޮށްފި އެވެ.
ޑާލިޗް މި ގޮތަށް ބުނެފައި މި ވަނީ ބޮޑެތި މުބާރާތްތަކުގައި ކްރޮއޭޝިއާ އިން ކިތަންމެ ކާމިޔާބެއް ހޯދިޔަސް އެ ޓީމާ މެދު މީހުން ދެކޭގޮތް ބަދަލުނުވެ، އަބަދުވެސް ފަހު ވަގުތު ކާމިޔާބާ ހަމަައަށް ދެވޭ ވަރަށް މަސައްކަތް ކުރެވޭތީ އެވެ.
މި ފަހަރުގެ ޔޫރޯގައި ކްރޮއޭޝިއާ ކުޅުނު ފުރަތަމަ މެޗުން ވަނީ ސްޕެއިން އަތުން 3-0 އިން ބަލިވެފަ އެވެ. ޑާލިޗް ބުނީ ފުރަތަމަ މެޗުގައި އެ ގޮތަށް ބަލިވުމަކީ އެއްގޮތަކަށް ވެސް ގަބޫލުކުރަން ފަސޭހަވި ކަމެއް ނޫން ކަމަށެވެ.
"އަހަރެމެން ތިން ފަހަރު ބައިނަލްއަގުވާމީ މުބާރާތްތަކުގެ ޕޯޑިއަމް ފިިނިޝް އަކަށް ގޮސްފިން. އެކަމަކު، އަދިވެސް އަހަރެމެންނަކީ ބޮޑެތި މުބާރާތްތަކުގެ ސިންދްރެއްލާ އިން. އަހަރެމެންނަކީ ކުޑަ ގައުމެއް، އެކަމަކު ބުނަން އޮތީ އަހަރެމެން އަމިއްލަ މަސައްކަތުން ގިނަ އެހެން ގައުމުތަކަކަށް ނުކުރެވޭ ކަންކަން ހާސިލްކޮށްފިން،" ޑާލިޗް ބުންޏެވެ.
"އަބަދުވެސް އަހަރެމެންނާ މެދު ދެކެނީ ޑާކް ހޯސްގެ ގޮތުގައި، އެ ގޮތުގައި ތިބެ ވެސް އަހަރެމެން ވާނީ މިދިޔަ ހަ އަހަރު ތެރޭ ތިން އިންޓަނޭޝަަނަލް މެޑަލް ހޯދައިފައި. ފްރާންސަށް ފަހު އަހަރެމެންނަކީ އެ ފަދަ ކަމެއް ހާސިލްކުރެވުނު ޓީމު. އެކަމަކު، އިންގްލެންޑް 1966 ވޯލްޑް ކަޕް ހޯދި ޓީމެއް އަދިވެސް އެ މީހުންނަކީ ފޭވަރިޓް، އަހަރެމެންނަކީ ޑާކް ހޯސް،"
ކްރޮއޭޝިއާ ވަނީ 2018 ވަނަ އަހަރުގެ ފީފާ ވޯލްޑް ކަޕްގެ ފައިނަލުގައި ކުޅެ، އެންމެ ފަހުން ބޭއްވި ވޯލްޑް ކަޕްގެ ތިން ވަނަ ހޯދައި، ޔުއެފާ ނޭޝަންސް ލީގުގެ ފައިނަލަށް ދަތުރުކޮށްފަ އެވެ. މިރޭ، މި ފަހަރު ޔޫރޯގައި ކްރޮއޭޝިއާ އިން ދެ ވަަނަ މެޗަކަށް އަލްބޭނިއާއާ ދެކޮޅަށް ނުކުންނައިރު، ގަދަ 16 އަށް ދިއުމަށް މި މެޗުގައި ނަތީޖާ ނެރުން މަޖުބޫރެވެ.
"މެޗުގެ ފަހު ވަގުތާ ހަމައަށް އަހަރެމެން އެބަޖެހޭ، ހަމަޖެހިލައިގެން އަމިއްލަ ގޭމް ކުޅެން. އަހަރެމެން އަމިއްލަ އަށް ގޯސް ހަދަން ފަށައިފިއްޔާ ގެއްލުން އޮތީ އަހަރެމެންނަށް. އެހެންވެ، ފަހު ވަގުތާ ހަމައަށް ސިކުނޑި ހަމައިގައި ބަހައްޓައިގެން، ޕްލޭނަށް މަސައްކަތްކުރަންވީ،" ޑާލިޗް ބުންޏެވެ.
"ފުރަތަމަ އެގާރަ އަށް ބަދަލުތަކެއް އަންނާނެ،"
މިއީ ބައިނަލްއަގުވާމީ މުބާރާތެއްގައި އަލްބޭނިއާ އާއި ކްރޮއޭޝިއާގެ ފުރަތަމަ ކުރިމަތިލުމެވެ. މެޗު ފަށާނީ 6 ޖަހާއިރު އެވެ.
