ހެމްބާގް (ޖޫން 16) - ޔޫރޯ ފުޓްބޯޅަ މުބާރާތުގައި ނެދަލެންޑްސްއާ ދެކޮޅަށް ޕޮލެންޑުން ކުޅޭ މެޗުގައި އެ ޓީމަށް މޮޅުވެވޭނެ ކަމުގެ ފުރުސަތެއް ނެތް ކަމަށް ގިނަ ބަޔަކު ދެކުނު ކަމުގައި ވިޔަސް އެ ކަމާ ނުވިސްނާނެ ކަމަށް ޕޮލެންޑްގެ ކޯޗު، މައިކަލް ޕްރޮބިއާޒް ބުނެފި އެވެ.
"އެންމެން ދެކެނީ އަހަރެމެން މި މެޗުން (ނެދަލެންޑްސް އަތުން) ބަލިވާނެ ކަމަށް، އަހަރެމެންނަށް ފުރުސަތެއް އޮތް ކަމަށް ގަބޫލުކުރާ ބަޔަކު ނެތް،" މިއަދުގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޕްރޮބިއާޒް ބުންޏެވެ.
"އެކަމަކު، މީގެ އަހަންނަށް އޮތް އެންމެ ބޮޑު ހިތްހަމަޖެހުމަކީ، އަހަރެމެން ޓީމެއް އެކުލަވާލައިގެން މިއައީ، އެކަކު އަނެކަކަށް އެހީވެގެން ފަހު ވަގުތާ ހަމައަށް ހިތްވަރު ކުރަން،"
ޕްރޮބިއާޒް ދެކޭގޮތުގައި ނެދަލެންޑްސް އަކީ، މި ފަހަރު ޔޫރޯ ކާމިޔާބު ކުރެވޭނެ ފަދަ ފެންވަރު ހުރި "ފޭވަރިޓް" އެކެވެ. އެ ގޮތުން، ނެދަލެންޑްސްގެ އިންޑިވިޖުއަލް ކުޅުންތެރިންގެ ކޮލިޓީއާ ކުރިމަތިލާން ޕޮލެންޑުން ބޭނުންކުރަން ޖެހޭނީ ޓީމު ރޫހު ކަމަށް ޕްރޮބިއާޒް ބުނެފައިވެ އެވެ.
މިދިޔަ އަހަރު ޕޮލެންޑްގެ ކޯޗުކަމާ ހަވާލުވި ޕްރޮބިއާޒް ބުނީ، ފުރަތަމަ މެޗުގައި ޕޮލެންޑްގެ ތަރި، ލެވަންޑޯސްކީ އަށް ނުކުޅެވޭނެ ކަމަށެވެ. އެހެންވެ، ޕޮލެންޑްގެ ކެޕްޓަން ބޭންޑް އަޅައިގެން މި މެޗުގައި ކުޅޭނީ ޕިއޮޓްރޭ ޒިއެލިންސްކީ އެވެ. އޭނާ ބުނީ، ގައުމީ ޓީމުގެ ކެޕްޓަންކަން ކުރުމަކީ، "ފަހުރެއް" ކަމަށެވެ.
ޕޮލެންޑުން އެންމެ ފަހުން ނެދަލެންޑްސްއާ ދެކޮޅަށް ކުޅުނު 12 މެޗުން ވެސް މޮޅެއް ނުލިބެ އެވެ. އެންމެ ފަހުން ޕޮޮލެންޑުން ނެދަލެންޑްސް ބަލިކުރީ 1980 ވަނަ އަހަރުގެ ޔޫރޯ ކޮލިފައިންގައި 2-0 އިންނެވެ.
ނެދަލެންޑްސް އާއި ޕޮލެންޑް ކުޅޭ މެޗު ފަށާނީ މިއަދު 6 ޖަހާއިރު އެވެ.
