ފޭސް 2 ގައި ހިޔާ ފްލެޓް އެޗް ފަހެއްގެ ތިނެއްގެ 18 ނަންބަރު އެޕާޓްމަންޓުގައި ބްލެއިކްމެއިލް ކޮށްގެން މީހުން އަތުން ފައިސާގެ އިތުރުން އެހެން އެއްޗެހި ފޭރެން ހިންގި "ބްލެކްމެއިލް ރިންގް" ގެ މައްސަލައިގައި ހަތް މީހުން ހައްޔަރުކޮށްފައިވާ ކަމަށް ފުލުހުން މިއަދު ބުނެފި އެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ހުޅުމާލެ ފޭސް 2 ޕޮލިސް ސްޓޭޝަންގެ ހެޑް ރަޖްނީ ޝުއައިބު ވިދާޅުވީ ބްލެއިކްމެއިލްއާ ގުޅިގެން ޖުމްލަ ފަސް މައްސަލައެއް ހުޅުމާލެ ފޭސް 2 ޕޮލިސް ސްޓޭޝަނަށް ހުށަހަޅާފައިވާ ކަމަށެވެ.
އެ ފަސް މައްސަލައިގެ ތެރެއިން ޖެނުއަރީގައި އެއް މައްސަލަ، އެޕްރިލް މަހު ތިން މައްސަލަ އަދި މެއި މަހު ތެރޭގައި އެއް މައްސަލަ ހުށަހަޅާފައިވާ ކަމަށް ރަޖްނީ ވިދާޅުވި އެވެ.
އޭގެއިތުރުން އެ އެޕާޓްމަންޓާ ގުޅުންހުރި ގިނަ މައްސަލަތައް ރިޕޯޓު ކޮށްފައިނުވާކަން ވެސް ފާހަގަކުރެވާކަން ފާހަގަކުރައްވާ ރަޖްނީ ވިދާޅުވީ ކުށް ހިންގުމުގެ ކުރިން ފުލުހުންނާއި އާންމުން އެކަން ހުއްޓުވާފައިވާ ކަމަށެވެ.
"އެތަނުގެ ތެރޭގައި ހަށި ވިއްކުމާއި އޮޅުވާލައިގެން އެކި މީސް މީހުން އެ އެޕާޓްމަންޓަށް ގެންގޮސް ގަދަކަމުން ބަރަހަނާކޮށް، ބަރަހަނާ ވީޑިއޯ ނަގައި ބްލެކްމެއިލްކޮށް، ފައިސާ ހޯދުމާއި އެތަނުގެ ތެރޭގައި މަސްތުވާތަކެތި ވިއްކައި ވިޔަފާރިކުރުމާއި މަސްތުވާތަކެތި ބޭނުންކުރުންފަދަ ގާނޫނާ ހިލާފް އެތައް އަމަލެއް ހިންގާފައިވޭ،" ރަޖްނީ ވިދާޅުވި އެވެ.
މައްސަލައިގައި ހައްޔަރުކުރެވުނު ހަތް މީހުން:
- އައިމިނަތު ހުމައިނާ ޒަކަރިއްޔާ، މ. ގޯނބިލިގަސްދޮށުގެ / ކ. މާލެ، 24އ (ދޫކޮށްލާފައި)
- އާޔަތު އައްބާސް، ދަފްތަރު ނަންބަރު ދރ. 1835، 30އ (ބަންދުގައި)
- މުހައްމަދު އާދަމް، ޕެލަސް ހައުސް / ގއ. ދާންދޫ، 43އ (ބަންދުގައި)
- ސަމާހު އަލީ، ގ. ކަނދަމާގެއާގެ / ކ.މާލެ، 31އ (ބަންދުގައި)
- މުހައްމަދު މުނީރު، ސަންފްލާވާ / ދ. ކުޑަހުވަދޫ، 35އ (ބަންދުގައި)
- އަހުމަދު މާޖިދު، ހިފާޒް / ނ. ވެލިދޫ، 33އ (ބަންދުގައި)
- އަހުމަދު މަދީހު، މ. ސީނަރީވިއު / ކ. މާލެ، 34އ (ދޫކޮށްލާފައި)
މި މައްސަލައިގައި ހިމެނޭ އައިމިނަތު ހުމައިނާއަކީ މިކަމުގައި އިސްކޮށް އުޅޭ އެއް ފަރާތް ކަމަށާއި، ނަމަވެސް އޭނާއަކީ މާބަނޑު މީހެއް ކަމުން ހާލަތަށް ރިއާޔަތްކޮށް ދޫކޮށްލާފައިވާ ކަމަށް ރަޖްނީ ވިދާޅުވި އެވެ. އަދި އަހުމަދު މަހުދީ ވެސް ވަނީ ކޯޓުން ދޫކޮށްލާފައި ކަމަށެވެ.
ރަޖްނީ ވިދާޅުވީ މި މައްސަލައިގައި މީހުން އެޕާޓްމަންޓްތަކަށް ގެންގޮސްފައި ވަނީ ހަށިވިއްކާނެ ކަމަށް ބުނެ އޮޅުވާލައިގެން ކަމަށާއި، އަދި އެއަށްފަހު ބްލެކްމެއިލްކޮށް ފޭރިފައިވާ ކަމަށެވެ.
މީގެއިތުރުން ފޭރުނު ތަކެތީގެ ތެރޭގައި އަގުބޮޑު މޯބައިލް ފޯނާއި، އެހެނިހެން ތަކެތި ވެސް ހިމެނޭ ކަމަށް ވެސް ރަޖްނީ ވިދާޅުވި އެވެ.
