ޖޭއެސްސީގެ ރައީސަކަށް މެންބަރު ހުސައިން ރިޒާ އިންތިިހާބުކޮށްފި

ޖުޑީޝަލް ސާވިސް ކޮމިޝަން (ޖޭއެސްސީ) ގެ ރައީސް ކަމަށް ރައްޔިތުންގެ މަޖިލީހުގެ މާފުށީ ދާއިރާގެ މެންބަރު ހުސައިން ރިޒާ އާދަމް އިންތިހާބުކޮށްފި އެވެ.

މެންބަރު ހުސައިން ރިޒާ އާދަމް އެ މަގާމަށް އިންތިހާބުކުރި ކަން، ޖޭއެސްސީގެ ރަސްމީ އެކައުންޓުން ކުރި ޕޯސްޓެއް މެދުވެރިކޮށް ވަނީ ހާމަކޮށްފަ އެވެ.

މިއީ އެ ކޮމިޝަނުގެ ރިޔާސަތު ސިޔާސީ ބޭފުޅަކު ބަލަހައްޓަވާ ދެވަނަ ފަހަރެވެ. ކޮމިޝަނުގެ ރައީސަކަށް އެންމެ ފަހުން ހުންނެވީ އޭރު ތުޅާދޫ ދާއިރާގެ މެންބަރު ހިސާން ހުސައިނެވެ. ނޮވެމްބަރު 2019، އިން ފެށިގެން މިދިޔަ މެއި 28، އަށް ކޮމިޝަނުގެ ރައީސަކަށް ހުންނެވީ އޭނާ އެވެ.

ޖޭއެސްސީގައި މިހާރު ސަރުކާރުގެ ހަތަރު މެންބަރުން ތިއްބަވާނެ އެވެ. ރައީސުލްޖުމްހޫރިއްޔާގެ މެންބަރުގެ ހައިސިއްޔަތުން އެ ކޮމިޝަނުގައި ވަކީލު މުހައްމަދު ސަމީރު އިންނަވަ އެވެ. އަދި ބަންޑާރަ ނައިބު އަހުމަދު އުޝާމާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް އެ ކޮމިޝަނުގައި އިންނަވަ އެވެ.

ޖޭއެސްސީގެ ރައީސަކަށް ހުސައިން ރިޒާ އިންތިހާބުކުރި އިރު، 18 ވަނަ ރައްޔިތުންގެ މަޖިލީހުގައި އެ ދާއިރާ ތަމްސީލު ކުރެއްވި އޭނާގެ ބޭބެ އިބްރާހިމް ރިޒާ ވެސް ވަނީ ޖޭއެސްސީގެ މެންބަރު ކަން ކުރައްވައިފަ އެވެ. 19 ވަނަ މަޖިލީހުގައި ވެސް އިބްރާހިމް ރިޒާ ތަމްސީލް ކުރައްވަމުން ދަނިކޮށް ކެންސަރު ބަލީގައި އަވާހަރަވީ މިދިޔަ އަހަރު ފެބްރުއަރީގަ އެވެ.

ޖޭއެސްސީގައި ސިޔާސީ ބޭފުޅުން ނުހިމެނުމަކީ މި ސަރުކާރުގެ ވެސް ވައުދުކެވެ. މި ދައުރު ގާނޫނު އަސާސީ އިސްލާހު ކުރަން ބިލެއް ފޮނުވާނެ ކަން ސަރުކާރުން ވަނީ ރައްޔިތުންގެ މަޖިލީހަށް ވެސް އަންގައިފަ އެވެ. ރައްޔިތުންގެ މަޖިލީހުގެ ސުޕަ މެޖޯރިޓީ ސަރުކާރު ހިންގާ ޕީއެންސީއަށް އެބަ އޮތެވެ.

ޖޭއެސްސީ އެކުލެވިގެންވާ ގޮތާއި މިހާރު ތިބި މެންބަރުން

• ރައްޔިތުންގެ މަޖިލީހުގެ ރައީސް (އަބްދުއްރަހީމް އަބްދުﷲ)
• ރައްޔިތުންގެ މަޖިލީހުގެ މެންބަރެއް (ހުސައިން ރިޒާ އާދަމް)
• މަޖިލީހުން ކަނޑައަޅާ އާންމު މީހެއް (ކުރީގެ މަޖިލީހުން ކަނޑައެޅި ޑރ. އުލްމުކުލްސޫމް)
• ސިވިލް ސާވިސް ކޮމިޝަންގެ ރައީސް (މުހައްމަދު ނާސިހު)
• ބަންޑާރަ ނައިބު (އަހުމަދު އުޝާމް)
• ރައީސުލްޖުމްހޫރިއްޔާ އައްޔަންކުރައްވާ ވަކީލެއް (މުހައްމަދު ސަމީރު)
• ވަކީލުން އިންތިހާބުކުރާ ވަކީލެއް (އަލީ އަބްދުއްލަތީފް)
• ސުޕްރީމް ކޯޓުގެ ފަނޑިޔާރެއް (ފަނޑިޔާރު ހުސްނުއްސުއޫދު)
• ހައި ކޯޓުގެ ފަނޑިޔާރެއް (ފަނޑިޔާރު މުހައްމަދު ނިޔާޒު)
• ދަށު ކޯޓުތަކުން ފަނޑިޔާރެއް (ފަނޑިޔާރު އަލީ ޝަރީފް)

ޖުޑިޝަލް ސާވިސް ކޮމިޝަނަކީ ފަނޑިޔާރުންގެ ސުލޫކީ ކަންކަން ބެލުމާއި މަގާމުގެ ކުރިއެރުން ދިނުމާއި ވަކިކުރުމާއި އާ ފަނޑިޔާރުން އައްޔަން ކުރުމުގެ މަސައްކަތްތައް މަތިކޮށްފައި އޮންނަ މުއައްސަސާ އެވެ. އެ ކޮމިޝަނުގައި ސިޔާސީ ބޭފުޅުން ތިއްބަވާތީ އެ ކޮމިޝަން މެދުވެރިކޮށް ކޯޓުތަކަށް ސިޔާސީ ނުފޫޒު ފޯރުވުމަކީ، ކޮންމެ ވެރިކަމެއްގައި ވެސް އަމާޒުވާ ތުހުމަތެކެވެ.