ރައީސް ޑރ. މުހައްމަދު މުއިއްޒަށް ދަ ޑިމޮކްރެޓްސް އިން ތާއީދުކުރީ އެމަނިކުފާނު އިންޑިއާއާ އެކު ސުލްހަވެރި ގުޅުމެއް ބާއްވާނެ ކަން ފެންނާތީ ކަމަށް އެ ޕާޓީ އުފެއްދެވުމުގެ މޭސްތިރިޔަކަށް ހުންނެވި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އިންޑިއާގެ ސިފައިން ރާއްޖޭން ބޭރު ކުރުމަށް ގޮވާލައި "އިންޑިއާ އައުޓް" ގެ ނަމުގައި ވަރުގަދަ ކެމްޕޭނެއް ކުރެއްވުމަށް ފަހު ވެރިކަމަށް ވަޑައިގެންނެވި މުއިއްޒުގެ ވެރިކަމުގެ ފުރަތަމަކޮޅު ފެނުނީ އިންޑިއާއާ ވަރަށް ގުޅުން ގޯސްވާ ތަނެވެ.
ނަމަވެސް އިންޑިއާ ސިފައިން ފޮނުވާލައި އޭގެ ބަދަލުގައި އުޅަނދުތައް އޮޕަރޭޓްކުރަން އެ ގައުމުގެ މަދަނީ ހިދުމަތްތެރިން ގެނެސް، އެ ގައުމުގެ ބޮޑު ވަޒީރު ނަރެންދުރަ މޯދީ ތިންވަނަ ދައުރަކަށް ހުވާ ކުރެއްވުމުގެ ރަސްމިއްޔާތަށް ރައީސް ވަޑައިގެން ދެ ލީޑަރުންގެ ފޮޓޯތައް ސަރުކާރުގެ ސަޕޯޓަރުން ދަނީ ދައުރުކުރަމުންނެވެ.
މި ދަނޑިވަޅުގައި ނަޝީދު ގެންގުޅުއްވާ ނުރަސްމީ އެކްސް އެކައުންޓް، "އެމްއެން އަން އޮފިޝަލް" އިން ކުރެއްވި ޕޯސްޓެއްގައި ވިދާޅުވީ އެމަނިކުފާނު ދެކެވަޑައިގަންނަވާ ގޮތުގައި ޑިމޮކްރެޓްސްއިން ރައީސަށް ތާއީދުކުރީ މިއަދު މި ދެކޭ ސުލްހަވެރި ގުޅުމާއި އިންޑިއާ ކަނޑުގެ ތަސައްވުރު ފެންނާތީ ކަމަށެވެ.
އަބަދުވެސް އިންޑިއާއާ ރާއްޖޭން ގާތް ގުޅުމެއް ބޭއްވުމަށް ވަކާލާތު ކުރައްވާ ނަޝީދު ދެން ލިޔުއްވީ، ރާއްޖޭގެ ހާރިޖީ ސިޔާސަތު އަބަދުވެސް އޮންނަންވީ އެ ގޮތަށް ކަމަށާއި ކޮންމެ ރިޔާސީ ދައުރަކަށް ފަހު ހާރިޖީ ސިޔާސަތު މުޅީން އެހެން ފުށަކަށް ޖެހުމުގެ ގެއްލުން ލިބޭނީ ދިވެހިންނަށް ކަމަށެވެ.
"އަޅުގަނޑު ދެކޭ ގޮތުގައި ޑިމޮކްރެޓްސް، ޑރ. މުއިއްޒަށް ތާއީދުކުރީ، މިއަދު މި ދެކޭ ސުލްހަވެރި، ގުޅުން ރަނގަޅު، އިންޑިއާ ކަނޑުގެ ތަސައްވުރު ފެންނަ ކަމުން، ރާއްޖޭގެ ހާރިޖީ ސިޔާސަތަކީ ކޮންމެ އިންތިހާބަކަށް ފަހު އަނެއް ފުށަށް ޖެހޭ ކަމެއްގެ ގޮތުގައި ޮތުމުން ދިވެހިންނަށް ލިބޭ ގެއްލުން ބޮޑު،" ރައްޔިތުންގެ މަޖިލީހުގެ ރައީސް ކަން ވެސް ކުރެއްވި ނަޝީދު ލިޔުއްވާފައިވެ އެވެ.
ނަޝީދު މިހެން ވިދާޅުވި ނަމަވެސް ރިޔާސީ އިންތިހާބުގެ ދެވަނަ ބުރުގައި ޑިމޮކްރެޓްސް އެއްވެސް ބަޔަކަށް ތާއީދު ނުކުރުމަށް ނިންމި އެވެ. ރިޔާސީ އިންތިހާބުގެ ފުރަތަމަ ބުރުގައި ތިންވަނަ ހޯދި ޕާޓީގެ ކައުންސިލްގެ ނިންމުމަކީ އެއްވެސް ބަޔަކަށް ތާއީދުނުކޮށް ތިބުމެވެ.
އެހެން ނަމަވެސް އިންތިހާބު ނިމިގެން ރައީސް މުއިއްޒުގެ ސަރުކާރުގައި ޑިމޮކްރެޓްސް ބައިވެރިވާނެ ކަމަށް އެ ޕާޓީގެ އިސް ވެރިން ވިދާޅުވަމުން ގެންދެވި އެވެ. އޭގެ ފަހުގައި ސަރުކާރުގައި އެ ޕާޓީގެ ބައިވެރިވުމެއް ނުފެނި، މަޖިލީހުގައި އިދިކޮޅު ޕާޓީއެއްގެ ގޮތުގައި އެމްޑީޕީއާ އެކު މަސައްކަތް ކުރަން ފެށި ތަން ފެނުނެވެ.
ވިހިވަނަ މަޖިލީހުގެ އިންތިހާބުގައި ޑިމޮކްރެޓްސްއަށް އެންމެ ގޮނޑިއެއް ކާމިޔާބު ވެފައި ނުވާއިރު އެ ޕާޓީގެ އިސް ސަފުގައި ތިބި ބައެއް ބޭފުޅުން އަދިވެސް ގެންދަނީ މި ސަރުކާރަށް ފާޑުވިދާޅުވަމުންނެވެ.
