ރ. އުނގޫފާރުގައި މަގުބައްތި ހޮޅިދަނޑިއަކުން ކަރަންޓުގައި ޖެހުނު ޒުވާނާ މިއަދު މަރުވެއްޖެ އެވެ.
ހުސެއިން އަތީކް، 18، ނިޔާވީ މިއަދު ހެނދުނު އައިޖީއެމްއެޗުގައި ފަރުވާ ދެނިކޮށެވެ. އޭނާއަށް ފަރުވާ ދެމުން ދިޔައީ ވެންޓިލޭޓަރަކަށް ލައިގެންނެވެ.
ކަރަންޓުގައި ޖެހުނު ހާދިސާގައި އެ އަތީކުގެ މޭ ކަށިގަނޑު ބިންދައިގެން ދިޔުމުގެ އިތުރުން، ކިޑްނީ ވެސް އޮތީ ފެއިލްވެފަ އެވެ.
މެއި 23، ގައި ހިނގި މި ހާދިސާގައި ޒުވާނާގެ އިތުރުން ދެ ކުއްޖަކު ވެސް ކަރަންޓުގައި ޖެހުނެވެ. ނަމަވެސް ހާލު ސީރިއަސް ވެގެން މެއި 25، ގައި މާލެ ގެނައީ އަތީކު އެކަންޏެވެ.
އޯޓިސްޓިކު ބަލި ހުންނަ މި ޒުވާނާ ކަރަންޓުގައި ޖެހުނީ، ހޮޅިދަނޑި ކައިރީގައި ވާރޭވެހިގެން ހެދިފައި އޮތް ފެންގަނޑުގައި ކުޅެން ތިބި ދެ ކުދިން ސަލާމަތް ކުރަން އުޅުމުގެ ތެރޭގަ އެވެ.
ކަރަންޓުގައި ޖެހުނު އަނެއް ދެ ކުދިންނަކީ 12 އަހަރުގެ އަންހެން ކުއްޖަކާއި، އަށް އަހަރުގެ ފިރިހެން ކުއްޖެކެވެ. އެ ދެ ކުދިންނަށް އުނގޫފާރު ހޮސްޕިޓަލުން ފަރުވާ ދިނުމަށްފަހު ވަނީ ދޫކޮށްލާފަ އެވެ.
