ރޮސާރިއޯ، އާޖެންޓީނާ (ޖޫން 4) - މެންޗެސްޓާ ޔުނައިޓެޑްގެ ވިންގް، އަލެހަންދްރޯ ގާނާޗޯ، އަންނަ މަހު ފަށާ އޮލިމްޕިކްސްގައި ވާދަކުރާ އާޖެންޓީނާ ޓީމަށް ދޫނުކުރަން ޔުނައިޓެޑުން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ގާނާޗޯ، 19، އަށް ވަނީ މި މަހުގެ 20 އިން އަންނަ މަހުގެ 14 އަށް ކުރިއަށްދާ ކޮޕަ އެމެރިކާ ފުޓްބޯޅަ މުބާރާތުގައި ވާދަކުރާ އާޖެންޓީނާ ޓީމުގެ ސްކޮޑުން ވެސް ފުރުސަތު ދީފަ އެވެ. އޮލިމްޕިކްސްގެ ފުޓްބޯޅަ އިވެންޓްގައި ވާދަކުރާ އާޖެންޓީނާ ޓީމުގައި ގާނާޗޯ ހިމަނަން، އާޖެންޓީނާގެ ފުޓްބޯޅަ ފެޑެރޭޝަނުން ވަނީ މަސައްކަތްކޮށްފަ އެވެ.
އެކަމަކު، ދެކުނު އެމެރިކާގެ ކުޅިވަރު މީޑިއާ، ޓައިކް ސްޕޯޓްސް އިން ރިޕޯޓްކުރާ ގޮތުގައި، ގާނާޗޯ ދޫކުރެވެން ނެތް ކަމަށް ޔުނައިޓެޑުން ވަނީ އާޖެންޓީނާ ފުޓްބޯޅަ ފެޑެރޭޝަނަށް އަންގައިފަ އެވެ.
މި ސީޒަނުގައި ގާނާޗޯ ވަނީ ހުރިހާ މުބާރާތެއްގައި ޔުނައިޓެޑަށް 50 މެޗުން 10 ގޯލު ޖަހައި، ފަސް ގޯލު ޖަހަން ފުރުސަތު ތަނަވަސްކޮށްދީފަ އެވެ.
ޔުނައިޓެޑުން، ގާނާޗޯ، އޮލިމްޕިކްސް އަށް ދޫނުކުރާ ގޮތަށް ނިންމީ، އަންނަ ސީޒަން ފެށުމުގެ ކުރިން އޭނާ އަށް އަރާމްކުރަން އެކަށީގެންވާ ވަގުތު ދިނުމުގެ ގޮތުންނެވެ.
ފްރާންސްގެ ޕެރިހުގައި، އަންނަ މަހު 26 ގައި ފަށާ އޮލިމްޕިކްސް ކުރިއަށްދާނީ އޮގަސްޓް މަހުގެ 11 އަށެވެ. އިނގިރޭސި ޕްރިމިއާ ލީގުގެ އާ ސީޒަން ފަށާނީ އޮގަސްޓް، 17 ގަ އެވެ.
އޮލިމްޕިކްސް އަކީ، ސީނިއާ ފުޓްބޯޅަ އިވެންޓަކަށްނުވާއިރު، ގައުމީ ޓީމަށް ކުޅުންތެރިން ވީއްލަން ޖެހޭ، އުސޫލުން ކްލަބްތަކުން، އޮލިމްޕިކްސް އަށް ކުޅުންތެރިން ދޫކުރަން ލާޒިމެއް ނުކުރެ އެވެ. އެހެންކަމުން، އޮލިމްޕިކްސްގައި ކުޅޭ ކުޅުންތެރިން، ކްލަބުން ދޫކުރުން އޮންނަނީ އެ ކްލަބެއްގެ މެނޭޖްމަންޓްގެ އިހުތިޔާރީ ކަމަކަށްވެފަ އެވެ.
