މިދިޔަ ހަ މަސް ދުވަހުގެ ތެރޭގައި ތަރައްގީގެ މަޝްރޫއުތަކަށް ހަރަދުކުރި ފައިސާގެ އަދަދު، މިދިޔަ އަހަރުގެ މިމުއްދަތުގައި ހަރަދުކުރި ވަރަށް ވުރެ މަދުވެފައިވާ ދެއްކުމުން، އެ ހިސާބުތަކާ މެދު އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު ސުވާލު އުފައްދަވައިފި އެވެ.
ފިނޭންސް މިނިސްޓްރީން އެންމެ ފަހުން ނެރުނު ވީކްލީ ފިސްކަލް ޑިވެލޮޕްމެންޓް ރިޕޯޓްގައިވާ ގޮތުން މި އަހަރުގެ މި މުއްދަތުގައި ތަރައްގީގެ މަޝްރޫއުތަކަށް ހަރަދުކުރީ 1.8 ބިލިޔަން ރުފިޔާ (18،35.7 މިލިޔަން ރުފިޔާ) އެެވެ. މިދިޔަ އަހަރުގެ މި މުއްދަތުގައި 4.4 ބިލިޔަން ރުފިޔާ (4،494.4 މިލިޔަން ރުފިޔާ) ހަރަދުކުރި އެވެ.
އިންފްރާސްޓްރަކްޗާ މިނިސްޓްރީން މިދިޔަ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި، "އަދަދު" އިން އެކަމާ ސުވާލުކުރުމުން މިނިސްޓަރު ވިދާޅުވީ ފިނޭންސް މިނިސްޓްރީގެ ހިސާބުތަކުގައި "ރިޕޯޓިން އިޝޫތަކެއް" ހުރި ކަމަށް ވެދާނެ ކަމަށެވެ.
"އަޅުގަނޑަށް ހީވަނީ މީގައި ރިޕޯޓިން އިޝޫސްތަކެއް އެބަ އުޅޭކަންނޭނގެ، މިހާރު އެ ބޭފުޅުން އެކުރާ ހަރަދުތަކުގެ ތެރޭގައި ކުރީގެ ޕްރޮޖެކްޓް ހިންގާފައި ހުރި ލޯނުފައިސާ، ދައްކާފައި ހުރި ފައިސާ ހިމެނޭތޯ ނޫންތޯ، ކުރިން އެބޭފުޅުން އެ ރިޕޯޓްކުރި ފޯ ބިލިޔަންގައި ކިހާވަރެއްތޯ ކުރީގައި ހިންގާފައި ހުރި ޕްރޮޖެކްޓްތަކަށް ނަގާފައި ހުރި ލޯނުތަކަށް ދައްކާފައި ހުރީ،" ފިނޭންސާ ކުރަން ޖެހޭ ސުވާލުތަކުގެ ގޮތުގައި މުއްތޮލިބު ފާހަގަކުރެއްވި އެވެ.
އޭނާ ވިދާޅުވީ ފިނޭންސް މިނިސްޓްރީން ރިޕޯޓްކުރުމުގައި ކުރިއާ މިހާރާ ތަފާތުތަކެއް ހުރިތޯ ބަލައިލުން ރަނގަޅުކަމަށާއި ހިންގަމުން އަންނަ މަޝްރޫއުތައް މަދުނުވާ ކަމަށެވެ.
"އަަޅުގަނޑަށް އެނގޭ އެއްޗަކީ ހިނގަމުންދާ މަޝްރޫއުތައް މަދެއް ނޫންކަން، ސަރުކާރުން އެއްވެސް މަޝްރޫއެއް ހުއްޓާލައިފައެއް ނޯންނާނެ، ހުއްޓާލަން އަންގައިފައެއް ނޯންނާނެ، އެ ޑެސިޝަނެއް މޭކްކޮށްފައެއް ނޯންނާނެ،" މުއްތޮލިބު ވިދާޅުވި އެވެ.
ޕީއެސްއައިޕީއަށް ކުރާ ހަރަދު ސަރުކާރުން ކުޑަކުރީއޭ ބުނުމަކީ އިންސާފަކަށް ނުވާނެ ކަމަށް ވެސް އޭނާ ވިދާޅުވި އެވެ.
